ބަންކަރިން ހިދުމަތް ދިނުމަށް ކަސްޓަމްސްގެ ގަވާއިދު އިސްލާހު ކޮށްފި

ބަންކަރިންގެ ހިދުމަތް ދިނުމާ ބެހޭ ބާބެއް އިތުރުކޮށް، ކަސްޓަމްސްގެ އާންމު ގަވާއިދު އިސްލާހު ކޮށްފި އެވެ.

ރާއްޖޭގައި ބަންކަރިން ހިދުމަތް ރަސްމީކޮށް އިފުތިތާހު ކޮށްފައި ވަނީ މިދިޔަ ބުރާސްފަތި ދުވަހު އެވެ. މި ހިތުމަތާ ގުޅިގެން ކަސްޓަމްސްގެ ގަވާއިދަށް ގެނައި އިސްލާހުގައި ބަންކަރިންގެ ހިދުމަތް ދެވޭނެ ފަރާތްތަކާއި، އެ ހިދުމަތް ދިނުމާ ބެހޭ އުސޫލު އެކުލަވާލައި އާންމު ކުރުމާއި އަދި ގަވާއިދާ ހިލާފުވުން ފިޔަވަޅުން އެޅުންފަދަ ކަންކަން ހިމަނާފައިވެ އެވެ.

މިހާރު ގެޒެޓް ކޮށްފައިވާ ގަވާއިދު ބުނާ ގޮތުން، ބަންކަރިންގެ ހިދުމަތް ދެވޭނީ ސަރުކާރުގެ ކަމާބެހޭ އިދާރާތަކުން ހިދުމަތް ދިނުމަށް ހުއްދަ ދީފައިވާ ފަރާތްތަކަށް އެކަންޏެވެ. މި ހިދުމަތް ދިނުމަށް ރާއްޖެއަށް ގެންނަން ތެޔޮ، ޑިއުޓީ ނުދައްކައި ބެހެއްޓުމަށް ފްލޯޓިން ބޮންޑެއް ނުވަތަ ފެސިލިޓީއެއް ކަސްޓަމްސްގައި ރަޖިސްޓްރީ ކުރަން ވާނެ ކަމަށް ގަވާއިދުގައި ބަޔާންކޮށްފައިވެ އެވެ. އެ ތެޔޮ ޑިއުޓީ ނުދައްކައި 90 ދުވަހު ބެހެއްޓޭނެ އެވެ.

ގަވާއިދު ބުނާ ގޮތުގައި، ބަންކަރިންގެ ހިދުމަތްދޭ ތަން ނުވަތަ ސަރަހައްދު އޮންނަން ވާނީ ކަސްޓަމްސްގެ ކޮންޓުރޯލުގަ އެވެ. އޭގެ ތެރޭގައި ސަރުކާރުގެ ކަމާބެހޭ އިދާރާތަކުން ކަނޑައަޅާ އޮފް ޕޯޓް ލިމިޓާއި، އޮފްޝޯ ސަރަހައްދާއި، ހާއްސަ ހާލަތެއް މެދުވެރިވެގެން އެ ތަންތަނުން ބޭރުން ހިދުމަތް ދޭ ސަރަހައްދުތަކާއި، ޑިއުޓީ ނުދައްކާ ހުންނަ ތެޔޮ ރައްކާކޮށްފައި ހުންނަ ފެސިލިޓީތައް ހިމެނެ އެވެ.

ރާއްޖޭން ބޭރަށް ދަތުރު ކުރާ އުޅަނދު ފަހަރަށް އަޅައިދޭ ތެލަށް، ކަސްޓަމްސްއަށް ރީ-އެކްސްޕޯޓް ޑިކްލަރޭޝަން ހުށަހަޅަން ޖެހެ އެވެ. އަދި ބަންކަރިންގެ ހިދުމަތް ދޭ އުޅަނދަކީ ތެޔޮ އަޅައިދޭ ވަގުތުން ފެށިގެން 48 ގަޑިއިރުގެ ތެރޭގައި ރާއްޖެއިން ފުރަން ތައްޔާރުވެފައި އޮތް އުޅަނދެއް ނަމަ، ޑިއުޓީ ނުދައްކާ ހުންނަ ތެޔޮ އެ އުޅަނދަށް އަޅައިދެވިދާނެ އެވެ.

ނަމަވެސް، އެ މުއްދަތުގެ ތެރޭގައި އައުޓްވާޑް ކްލިއަރެންސް ހޯދައިގެން އެ އުޅަނދު ރާއްޖޭން ބޭރަށް ފުރައިފިނަމަ، އެ އުޅަނދަށް އެޅި ތެލަށް ބަންކަރިން ހިދުމަތް ދިން ފަރާތުން އިމްޕޯޓް ޑިއުޓީ ދައްކަން ވާނެ ކަމަށް ވެސް ގަވާއިދުގައި ބަޔާންކޮށްފައިވެ އެވެ.

ގަވާއިދު ބުނާ ގޮތުގައި ޑިއުޓީ ނުދައްކާ ހުންނަ ތެޔޮ، ލޯކަލް އުޅަނދުތަކަށް އަޅައިދެވޭނީ އެ ތެލަށް އިމްޕޯޓް ޑިއުޓީ ދެއްކުމުންނެވެ. އިމްޕޯޓް ޑިއުޓީ ދައްކަންޖެހޭނީ ހިދުމަތް ދޭ ފަރާތުންނެވެ.

ކަސްޓަމްސްގެ ހުއްދަ ނެތި ބަންކަރިންގެ ހިދުމަތް ދިނުމަށް ދޫކުރާ ތެލަށް އިމްޕޯޓް ޑިއުޓީ ނުދައްކައި ބޭނުން ކުރުމާއި، ރީ-އެކްސްޕޯޓް ރޯޔަލްޓީ ނުދައްކައި ރާއްޖެއިން ބޭރުކުރުމާއި ރާއްޖެއިން ބޭރުކުރުމަށް ދޫކުރުމަކީ މަނާ ކަމެކެވެ.

އެކުށް ކުރާ ފުރަތަމަ ފަހަރު އެ މައްސަލައިގައި ހިމެނޭ ތެލަށް ކަސްޓަމްސް އިން ކަނޑައަޅާ އެފްއޯބީ އަގުގެ 25 ޕަސެންޓް އިން ޖޫރިމަނާ ކުރާނެ އެވެ. އަދި، ދެ އަހަރު ދުވަހުގެ ތެރޭގައި ތަކުރާރު ކުރާ ކޮންމެ ފަހަރަކު ޖޫރިމަނާގެ 25 ޕަސެންޓް އިތުރު ކުރާނެ އެވެ. މިގޮތުން ޖޫރިމަނާ ކުރެޭނީ ދެލައްކަ ރުފިޔާއާ ހަމައަށްކަން ގަވާއިދުގައި ބަޔާންކުރެ އެވެ.