މާލޭ މަގުތަކުގައި ހުރި ބާ އުޅަނދުތައް ނަގަން ފަށައިފި
ސިޓީ ކައުންސިލުން ބުނީ، ބާވެ ހަލާކުވާން ކައިރިވެފައިވާ އުޅަނދުތައް ނައްތާލުމުގެ ކުރިން އިއުލާނެއް ކުރާނެ ކަމަށެވެ.
ސިޓީ ކައުންސިލުން މި މަސައްކަތް މިއަދު ފަށާފައި ވަނީ ފުލުހުންގެ ހިދުމަތާ ގުޅިގެންނެވެ. ސިޓީ ކައުންސިލުން ބުނީ، ބާވެ ހަލާކުވާން ކައިރިވެފައިވާ އުޅަނދުތައް ނައްތާލުމުގެ ކުރިން އިއުލާނެއް ކުރާނެ ކަމަށެވެ. ވެރިފަރާތަކުން ހަވާލު ނުވާ އުޅަނދުތައް ނައްތާލާނެ ކަމަށް އެ ކައުންސިލުން ބުންޏެވެ.
ވެހިކަލްތައް ނެގުމުގެ މަސައްކަތް ފަށާފައި ވަނީ މެރީބްރައުން ކައިރިންނެވެ. އެއަށްފަހު އެ ސަރަހައްދުތަކަށް ގޮސް އެފަދަ އުޅަނދުތައް ނަގަމުން ގެންދާނެ ކަމަށް ކައުންސިލުން ބުންޏެވެ.
މެރީބްރައުން ސަރަހައްދުގައި ގިނަ ދުވަސް ވެފައިވާ ވަރަށް ގިނަ ބާ އުޅަނދު އެބަ ހުއްޓެވެ. އޭގެ އިތުރުން ވެސް އެ ތަންތަނުގައި މިފަދަ އުޅަނދުތައް ބަހައްޓާފައި ހުރުމުގެ ސަބަބުން ޕާކު ކުރާނެ ޖާގައެއް ނުލި އެވެ.
ސިޓީ ކައުންސިލުން ވަނީ ޓްރާންސްޕޯޓް މިނިސްޓްރީ އާއި ފުލުހުންނާ ގުޅިގެން މިދިޔަ ފެބްރުއަރީ މަހު ވެސް ބާ އުޅަނދު ނައްތާލުމުގެ ޕްރޮގްރާމެއް ފަށައިފަ އެވެ. އެ ޕްރޮގްރާމުގައި ގާތްގަނޑަކަށް 300 އެއްހާ އުޅަނދު ވަނީ ނައްތާލާފަ އެވެ.
ކޮމެންޓް
Republic of Maldives