ރާއްޖޭގައި ފްލޯޓިން ސޯލާ ޕެނަލް ހަރުކުރުމުގެ މަސައްކަތް ފަށައިފި

ސޯލާ ޕެނެލް ހަރުކުރުމަށް ރާއްޖެއިން ބިން ލިބުން ދަތިވާތީ ފްލޯޓިން ސޯލާ ޕެނެލް ހަރުކުރުމުގެ މަސައްކަތް މިހާރު ކުރަމުންދާ ކަމަށް އެންވަޔަރަމަންޓް މިނިސްޓަރު ތާރިގް އިބްރާހިމް ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ތާރިގް ވިދާޅުވީ ރާއްޖޭގައި އިއާދަ ކުރަނިވި ހަކަތަ އުފައްދަން މީގެ ކުރިން ވެރިކަން ކުރެއްވި އެެއްވެސް ރައީސަކު މަސައްކަތް ނުކުރައްވާ ކަމަށާއި އެހެން ނަމަވެސް ރައީސް ޑރ. މުހައްމަދު މުއިއްޒު އިއާދަކުރަނިވި ހަކަތައިގެ މަސައްކަތްތަށް ގާތުން ބައްލަވައި އެކަމަށް އެއްބާރުލުން ދެއްވާ ކަމަށެވެ.

ތާރިގް ވިދާޅުވީ ކުރިއަށް އޮތް ދުވަސްތަކުގައި ރާއްޖޭގައި 33 ޕަސެންޓު ކަރަންޓު އުފައްދާނީ އިއާދަކުރަނިވި ހަކަތައިން ކަމަށެވެ. 

"އިއާދަ ކުރަނިވި ހަކަތައިގެ މަޝްރޫއުގެ ދަށުން އަންނަ އޮކްޓޫބަރުގެ ނިޔަލަށް 700 ގޭގެ ސޯލާ ޔުުނިޓު ރާއްޖެ ގެނެވޭ. ރާއްޖެ އަކީ ބިން ކުޑަ ތަނަކަށް ވުމުން އަޅުގަނޑުމެން މިހާރު ވާނީ ފްލޯޓިން ސޯލާ ޕެނެލް ހަރުކުރުމުގެ މަސައްކަތް ފަށާފަ. އެގޮތުން އައްޑު ސިޓިގައި 10 މެގަވޯޓުގެ ފުލޯޓިން ސޯލާ ގާއިމުކުރުމަށް އަދި މާލެ ސަރަހއްދުގައި 100 މެގަވޮޓުގެ ސޯލާ ހަރުކުރުމަށް އަޅުގަނޑުމެން ވާނީ އިއުލާން ކޮށްފަ،" އޭނާ ވިދާޅުވިއެވެ.

މީގެ އިތުރުން މިނިސްޓަރު ތާރިގު ވަނީ އދ.ގެ އާންމު ޖަލްސާގެ ހަވާސާގައިި ވެސް އިއާދަ ކުރަނިވި ހަކަތައިގެ މަޝްރޫއުތަކާއި ގުޅޭ ގޮތުން މަޝްވަރާ ކުރައްވާނެ ކަމަށާއި އެންވަޔަރަމަންޓާއި ގުޅުން ހުރި ގިނަ ކަންކަމާ މި ހަވާސާގެ ތެރެއިން މަޝްވަރާ ކުރައްވާނެ ކަމަށް ވިދާޅުވެފައެވެ.

ޔުނައިޓެޑް އެރެބް އެމިރޭޓްސް (ޔޫއޭއީ) ގެ ދުބާއީ ގައި ކުރިއަށްދިޔަ 28 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވާކް ކޮންވެންޝަން އޮން ކްލައިމެޓް ޗޭންޖް (ކޮޕް28) ބައްދަލުވުމުގެ މަތީ ފަންތީގެ ސެގްމެންޓް ގައި ވާހަކަ ދައްކަވަމުން މިދިޔަ ޑިސެމްބަރު މަހުގެ އެއް ވަނަ ދުވަހު ރައީސް ޑރ. މުއިއްޒު ވިދާޅުވީ ރާއްޖެއިން ކަނޑައަޅާފައިވާ ލަނޑުދަނޑި އަކީ ރާއްޖޭގައި ބޭނުންކުރާ ކަރަންޓުގެ 33 އިންސައްތަ އުފައްދައި ދޭނެ އިއާދަކުރަނިވި ހަކަތައިގެ ނިޒާމެއް ގާއިމު ކުރުން ކަމަށެވެ.

އެ އަމާޒަށް ކުރިއަށް އޮތް ފަސް އަހަރުތެރޭ ވާސިލުވުމަކީ ވެސް އަމާޒެއް ކަމަށް ރައީސް ޑރ. މުއިއްޒު ވިދާޅުވި އެވެ.

އެމަނިކުފާނު ވިދާޅުވީ އެ އަމާޒަށް ވާސިލްވުމަށް މަދުވެގެން 600 މިލިއަން ޑޮލަރު ބޭނުންވާ ކަމަށެވެ. އެެހެން ކަމުން އަދި ދިވެހީންގެ މި އަމާޒަށް ވާސިލްވުމަށް ބައިނަލްއަގްވާމީ މުޖުތަމައުގެ އެހީތެރި ކަމަށް ރައީސުލްޖުމްހޫރިއްޔާ ވަނީ އެދިވަޑައިގެންފައެވެ.


ދިވެހިރާއްޖޭގައި އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެން ކަރަންޓު އުފެއްދުން އިތުރުކުރުމަށް އޭޝިއަން ޑިވެލޮޕްމަންޓް ބޭންކް (އޭޑީބީ) އާ ގުޅިގެން 75.5 މިލިއަން އެމެރިކާ ޑޮލަރުގެ މަޝްރޫއެއްގެ އެއްބަސްވުމުގައި ޑިސެންބަރު 12، 2024 ގައި ވަނީ ސޮއިކުރައްވައިފައެވެ.