ޝަހީމް ޖިނާއީ ކުށެއް ކުރައްވައިފި، ފިޔަވަޅު އަޅުއްވައިދެއްވުމަށް ރައީސަށް ދަންނަވައިފި

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ދައުލަތުގެ ވަސީލަތްތައް ބޭނުންކޮށްގެން މީޑިއާ މެދުވެރިކޮށް ޒާތީ ޕީއާރު ރަނގަޅު ކުރަން މަސައްކަތް ކުރައްވާފައިވާ ކަމަށާ އެއީ މަގާމުގެ ނުފޫޒު ނަހަމަ ގޮތުގައި ބޭނުންކޮށްގެން ތިމާއަށް ފައިދާ ހޯދަން އުޅުމުގެ ޖިނާއީ ކުށެއް ކަމުން ޝަހީމާމެދު ފިޔަވަޅު އަޅުއްވައި ދެއްވުމަށް ދީނީ އިލްމުވެރިޔާ ޑރ. މުހައްމަދު އިޔާޒް އަބްދުލްލަތީފް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަރިހުގައި އެދިވަޑައިގެންފި އެވެ.

ޑރ. އިޔާޒްގެ އަނބިކަނބަލުން މ. ބަޑިކުޅިމާގެ އާއިޝަތު ޝާދިޔާ (48) އަދި ގދ. ރަތަފަންދޫ ލިލީގެ، ޑރ. ޝަޒްރާ އިބްރާހިމް (36) ދާދި ފަހުން ވަނީ ސައުދީ ސަފީރު އުޅުއްވާ ގޭގެ ދޮރުމަތީ އަޑުގަދަ ކުރާތީ ހައްޔަރު ކޮށްފަ އެވެ. ބަންދު ދޫކޮށްލުމުން ނޫހަކަށް ދިން އިންޓަވިއުއެއްގައި މިނިސްޓަރު ޝަހީމްގެ ނަން ހާމަނުކޮށް، ދީނީ އިލްމުވެރި ވަޒީރަކު ގުޅުއްވާފައި އެ މީހުންގެ ފިރިން ކައިރީގައި އެ މީހުން ވަރިިކުރަން އެދުނު ކަމަށް އެމީހުން ވަނީ ބުނެފަ އެވެ.

އެ އިންޓަވިއުއަށް ފަހު، އިޔާޒަށް ގުޅުއްވައި އޭނާގެ އަންހެނުން ވަރިކުރަން ޑރ. ޝަހީމް އެދިވަޑައިގަތް ކަމުގެ ވާހަކަތައް ސޯޝަލް މީޑިއާގައި ފެތުރެމުން ދިޔަ އެވެ. އެ ތުހުމަތު މިނިސްޓަރު ދޮގު ކުރައްވާފައި ވަނީ އިއްޔެ ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުންނެވެ.

މިނިސްޓަރު ވިދާޅުވީ އިޔާޒަށް ނުގުޅުއްވާތާ ވަރަށް ދުވަސްވެފައިވާ ކަމަށެވެ. ނަމަވެސް އޭނާގެ އަންހެނުން "ކޮންޓްރޯލް" ނުވާކަމުގެ ވާހަކަތައް މީހުން ކައިރީ ދައްކަވާ ކަމަށެވެ.

"ޑރ. އިޔާޒް މީހުން ކައިރީ ކިޔަނީ ތިމަންނަ އަންހެނުން ތިމަންއަކަށް ކޮންޓްރޯލެއް ނުވެޔޭ. ތިމަންނަ ބުނާ ބަހެއް މީނަ ނާހައޭ. އެހެންވެއްޖިއްޔާ މީހަކު ބުނެދާނެދޯ، ޑރ. އިޔާޒަކީ ނުލާހިކު މާތް ބޭފުޅެއް، އެކަހަލަ ބަސްނާހާ ކުއްޖަކާ އެއްކޮށް އުޅެގެން ނުވާނެއޭ،" މިނިސްޓަރު ވިދާޅުވި އެވެ.

އެ މައްސަލައާ ގުޅިގެން އިޔާޒް މިއަދު ވަނީ ރައީސް މުއިއްޒަށް ސިޓީފުޅެއް ފޮނުއްވާފަ އެވެ. އިޔާޒްގެ ސިޓީގައި ވިދާޅުވީ ދައުލަތުގެ ނިޝާން ޖެހި ޕޯޑިއަމަލެއްގައި ހުންނަވައިގެން ދެމަފިރިއެއްގެ ދިިރިއުޅުމުގެ ތެރެއަށް ވެދަވަޑައިގަތް ކަމަށް ބެލެވޭ ވާހަކަތަކެއް ދައްކަވާފައިވާ ކަމަށާ މިފަދަ އަމަލަކީ މިސްޓަރެއްގެ ހައިސިއްޔަތުން ކުރެއްވުމަށް އެކަށީގެން ނުވާ އަދި އިސްލާމީ އަހްލާގާއި ދިވެހި މުޖްތަމައުގެ އާދަކާދައާ ހިލާފު އަމަލެއް ކަމުގައި ދެކޭ ކަމަށެވެ.

ގައުމީ ނިޝާންޖެހި ޕޯޑިއަމް ގައި ވާހަކަފުޅު ދައްކަވަން ކޮންމެ ބޭފުޅަކަށް ވެސް ލިބިވަޑައިގަންނަވަނީ ރަސްމީ ހައިސިއްޔަތަކުން ރަސްމީ ވާހަކަފުޅު ދެއްކެވުމަށް ކަމަށާ ދައުލަތުގެ ވަސީލަތްތައް ބޭނުންކޮށްގެން މީޑިއާ މެދުވެރިކޮށް ޒާތީ ޕީއާރު ރަނގަޅު ކުރަން މަސައްކަތް ކުރައްވާފައިވާ ކަމަށާ އެއީ މަގާމުގެ ނުފޫޒު ނަހަމަ ގޮތުގައި ބޭނުންކޮށްގެން ތިމާއަށް ފައިދާ ހޯދަން އުޅުމުގެ ޖިނާއީ ކުށެއް ކަމަށެވެ.

އެއީ އޭސީސީން ބަލަން ޖެހޭ ކަމެއް ކަމަށް ވެސް އިޔާޒްގެ ސިޓީގައި ވިދާޅުވި އެވެ.

"ވީމާ މި މައްސަލަ ބައްލަވައި މިނިސްޓަރު ޝަހީމްގެ މި އަމަލު ކުށްވެރި ކުރައްވާ އޭނާގެ މައްޗަށް އެކަށީގެންވާ ފިޔަވަޅު އަޅުއްވައި ދެއްވުމަށް އެދި ދެންނެވީމެވެ. އަދި މުސްތަގުބަލު ގައި މިފަދަ ކަންކަން ތަކުރާރުވިޔަ ނުދިނުމަށްޓަކައި އަޅުއްވަން ޖެހޭ ފިޔަވަޅުތައް އެޅުއްވުމަށް ވެސް ދެންނެވީމެވެ،" އިޔާޒްގެ ސިޓީގައި ވިދާޅުވެފައިވެ އެވެ.