"މެރިޓައިމް ސިނާއަތް ވާނީ އާމްދަނީ ލިބޭ ތިންވަނަ އަށް އެންމެ ބޮޑު ސިނާއަތަށް"

މެރިޓައިމް ސިނާއަތް ވެގެން ދާނީ ރާއްޖެއަށް އިގްތިސޯދީ ގޮތުން ނަފާ ހޯދައިދޭ ތިން ވަނައަށް އެންމެ ބޮޑު ސިނާއަތަށް ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މެނޭޖިން ޑިރެކްޓަރު މުހައްމަދު ވަޖީހު ވިދާޅުވެއްޖެ އެވެ.

ރާއްޖޭގައި އާ ސިނާއަތެއް ގާއިމް ކުރަން ރައީސް ޑރ. މުހައްމަދު މުއިއްޒު ވެފައިވާ ވައުދުފުއްދުގެ ގޮތުން ފަށާ މެރިޓައިމްގެ ދާއިރާގެ ގިނަ މަސައްކަތްތައް ގާއިމް ކުރަން އެމްޕީއެލްއިން ރޭ ވަނީ ހއ. އުލިގަމްގައި އައިއެސްޕީއެސް ގޭޓެއް ގާއިމްކޮށްފަ އެވެ.

އަދި އެސްޓީއޯއިން އޮފްޝޯވްކޮށް ބަންކަރިން ވިޔަފާރި މިއަދު ފަށާއިރު އެއާ ގުޅުންހުރި 14 ހިދުމަތެއްދޭން އެމްޕީއެލްއިން ވަނީ ތައްޔާރުވެފަ އެވެ.

ރޭގެ ރަސްމިއްޔާތުގައި ވާހަކަ ދައްކަވަމުން ވަޖީހު ވިދާޅުވީ މިވަރުގެ ކަމެއް އެންމެ އަށެއްކަ މަސް ދުވަހުގެ ތެރޭގައި ކުރެވޭނީ ވަރަށް ވިޝަން ރަގަޅު ވެރިޔަކަށް ކަމަށެވެ. ގައުމެއްގެ ތަރައްގީ ގެނެވޭނީ، އެގައުމަކުން އުފެދޭ ވެރިޔެއްގެ ވިޝަންގެ މައްޗަށް ކަމަށާއި، އެ ތަރައްގީ ގެނެވޭނީ އެބޭފުޅަކު ހިންގެވި މަގެއްގެ މައްޗަށް ކަމަށެވެ.

"އަދުގެ ރައީސް ހާއްސަ ގޮތެއްގައި ރާއްޖޭގެ އިހުތިސޯދު ކޮޅަށް ޖެއްސުވުމަށް ފެއްޓެވި މަޝްރޫއު، ކުރެއްވި މަސައްކަތްތަކަކީ މިހާ ހިސާބަށް ގައުމެއްގެ ރައީސަކު ނުކުރައްވާ މަސައްކަތްކަން އަޅުގަނޑުމެން ގަބޫލުކުރަން ޖެހޭ،" ވަޖީހު ވިދާޅުވި އެވެ.

ވަޖީހު ވިދާޅުވީ އުލިގަމުގައި އައިއެސްޕީއެސް ގޭޓް ފެށިގެންދާއިރު، އުލިގަމްގައި ތިން ޕްރޮޖެކްޓެއް ހިންގާނެ އެވެ. އެގޮތުން ޔޮޓް މެރީނާއެއްގެ މަސައްކަތް ފަށަން އިއުލާނު ކުރުމުން ރާއްޖޭން ބޭރުގެ 6 ފަރާތަކުން ވަނީ އެކަމަށް ޝައުގުވެރިވެފަ އެވެ. މި މަޝްރޫއުގެ އިތުރުން ކްރޫޒްލައިން ޓާމިނަލަކާއި ސިޓީ ހޮޓަލެއްވެސް އެރަށުގައި އަޅާނެ ކަމަށް އޭނާ ވިދާޅުވި އެވެ.

"މިކަންކަމަށް އެމްޕީއެލްއިން ފެސިލިޓޭޓް ކޮށްދޭނީ. މަސައްކަތްކޮށް ހިދުމަތް ދޭނީ އަޅުގަނޑުމެނެއް ނޫން، އެކަމާ ގުޅުންހުރި ފަރާތްތަކުން،" ވަޖީހު ވިދާޅުވި އެވެ.

އެމްޕީއެލްއިން އުލިގަމްގައި ގާއިމްކުރި އައިއެސްޕީއެސް ގޭޓާއެކު ސެކިއުރިޓީ ހިދުމަތްތާއި މުވައްޒަފުން ތިބޭނެ އިމާރާތެއް ވަނީ ގާއިމްކޮށްފަ އެވެ.