"އިޔާޒް އަންހެނުން ވަރިކުރާކަށް ނުބުނަން، ހެކި ދައްކާ"

ދީނީ އިލްމުވެރިޔާ، ޑރ. މުހައްމަދު އިޔާޒް އަބްދުލްލަތީފްގެ އަނބިކަނބަލުން ވަރިކުރަން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވި ކަމަށް ބުނާ ވާހަކަ ދޮގު ކުރައްވައިފި އެވެ.

ޑރ. އިޔާޒްގެ އަނބިކަނބަލުން މ. ބަޑިކުޅިމާގެ އާއިޝަތު ޝާދިޔާ (48) އަދި ގދ. ރަތަފަންދޫ ލިލީގެ، ޑރ. ޝަޒްރާ އިބްރާހިމް (36) ދާދި ފަހުން ވަނީ ސައުދީ ސަފީރު އުޅުއްވާ ގޭގެ ދޮރުމަތީ އަޑުގަދަ ކުރާތީ ހައްޔަރު ކޮށްފަ އެވެ. ބަންދު ދޫކޮށްލުމުން ނޫހަކަށް ދިން އިންޓަވިއުއެއްގައި މިނިސްޓަރު ޝަހީމްގެ ނަން ހާމަނުކޮށް، ދީނީ އިލްމުވެރި ވަޒީރަކު ގުޅުއްވާފައި އެ މީހުންގެ ފިރިން ކައިރީގައި އެ މީހުން ވަރިިކުރަން އެދުނު ކަމަށް އެމީހުން ވަނީ ބުނެފަ އެވެ.

އެ އިންޓަވިއުއަށްފަހު، އިޔާޒަށް ގުޅުއްވައި އޭނާގެ އަންހެނުން ވަރިކުރަން ޑރ. ޝަހީމް އެދިވަޑައިގަތް ކަމުގެ ވާހަކަތައް ސޯޝަލް މީޑިއާގައި ފެތުރެމުން ދިޔަ އެވެ. އެ ތުހުމަތު މިނިސްޓަރު ދޮގު ކުރައްވާފައި ވަނީ މިއަދު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުންނެވެ.

މިނިސްޓަރު ވިދާޅުވީ އިޔާޒަށް ނުގުޅުއްވާތާ ވަރަށް ދުވަސްވެފައިވާ ކަމަށެވެ. ނަމަވެސް އޭނާގެ އަންހެނުން "ކޮންޓްރޯލް" ނުވާކަމުގެ ވާހަކަތައް މީހުން ކައިރީ ދައްކަވާ ކަމަށެވެ.

"ޑރ. އިޔާޒް މީހުން ކައިރީ ކިޔަނީ ތިމަންނަ އަންހެނުން ތިމަންއަކަށް ކޮންޓްރޯލެއް ނުވެޔޭ. ތިމަންނަ ބުނާ ބަހެއް މީނަ ނާހައޭ. އެހެންވެއްޖިއްޔާ މީހަކު ބުނެދާނެދޯ، ޑރ. އިޔާޒަކީ ނުލާހިކު މާތް ބޭފުޅެއް، އެކަހަލަ ބަސްނާހާ ކުއްޖަކާ އެއްކޮށް އުޅެގެން ނުވާނެއޭ،" މިނިސްޓަރު ވިދާޅުވި އެވެ.

ނަމަވެސް ސީދާ މިނިސްޓަރު އެގޮތަށް ދަންނަވާފައި ނުވާނެ ކަމަށް ތަކުރާރުކޮށް ވިދާޅުވި އެވެ. އެފަދަ ވާހަކައެއް މިނިސްޓަރު ވިދާޅުވެފައިވާނަމަ، އެކަމުގެ ހެކި އިޔާޒު ދައްކަން ވާނެ ކަމަށް ވެސް ވިދާޅުވި އެވެ.

އެ މައްސަލައިގައި ވާހަކަ ދައްކަވަމުން މިނިސްޓަރު ވިދާޅުވީ، އެ ދެ އަންހެނުން ބަންދު ކުރީ ފަލަސްތީނުގެ ހައްގުގައި އަޑުއުފުލައިގެން ކަމަށް ގަބޫލު ނުކުރެއްވޭ ކަމަށެވެ. ސަފީރުން އުޅުއްވާ ގޭގޭ ދޮރުމަތީގައި އަޑުގަދަކޮށް އެއްޗެހި އެޅުމަކީ މުޅި ދުނިޔޭގެ ގާނޫނުގައި ވެސް މަނާ ކަމެއް ކަމަށް ވިދާޅުވި އެވެ.

"ރާއްޖެ މީ ހިޔާލު ފާޅުކުރުމުގެ މިނިވަންކަން ނުލާހިކު ފުޅާ ދާއިރާއެއްގައި އޮތް ގައުމެއް. ފަލަސްތީނަށްޓަކާ ކިހާ މުޒާހަރާއެއް ރާއްޖޭގަ ހިނގަނީ، ކިހާ އިޖުތިޖާޖެއް، ކިތައް ސަތޭކަ މީހުން މާލޭ މަގުތަކަށް ނުކުންނަނީ؟ އެއްވެސް މީހަކު ހައްޔަރު ކުރިތޯ؟ ނުކުރޭ،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ ވަކި ގައުމެއްގެ ބަޔަކަށް ޓާކެޓްކޮށް، ފަތިސް ނަގާމުން ފައިބާ ގޮތަށް ގޮސް އަޑުގަދަ ކުރުމަކީ ދީނީ ގޮތުން ވެސް ކޮށްގެން ވާނެ ކަމެއް ނޫން ކަމަށެވެ. ކޮންމެ ދީނެއްގެ ބަޔަކަށް ވިޔަސް ގޭގެއަށް ހުރުމަތްތެރިކޮށް ހިތައި، އުޅެންވާނީ ދީނީ މިންގަނޑުގެ ތެރޭގައި ކަމަށް ވިދާޅުވި އެވެ.