މިއަހަރުގެ މިހާތަނަށް 402 އިމާމުން ތަމްރީނު ކޮށްފި

ވަކި ހާއްސަ މަންހަޖެއްގެ ތެރެއިން އިމާމުން ތަމްރީނު ކުރުމަށް ސަރުކާރުން ފަށާފައިވާ ޕްރޮގްރާމުގެ ތެރެއިން މިހާތަނަށް 402 އިމާމުން ތަމްރީނު ކޮށްފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓްރީގެ މަސައްކަތްތަކާ ބެހޭ މައުލޫމާތު ހިއްސާ ކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ ސަރުކާރުގެ އަމާޒަކީ މިއަހަރު ނިމުމުގެ ކުރިން ރާއްޖޭގެ ހުރިހާ މިސްކިތެއްގައި މަސައްކަތް ކުރާ އިމާމުން ތަމްރީނުކޮށް ނިންމުން ކަމަށެވެ. އެއީ ގާތްގަނޑަކަށް 700 އިމާމުންނެވެ.

މިހާތަނަށް ތަމްރީނު ކޮށްފައިވާ އިމާމުންނަކީ؛

މިނިސްޓަރު ވިދާޅުވީ މިއަހަރު ނިމުމުގެ ކުރިން ރާއްޖޭން ބޭރުން 100 އިމާމުން ތަމްރީނު ކުރުމަކީ ވެސް އަމާޒެއް ކަމަށެވެ. އެގޮތުން މިހާތަނަށް 60 އިމާމުން ވަނީ ރާއްޖޭން ބޭރުން ތަމްރީނު ކޮށްފަ އެވެ. އެއީ ސައުދީ އަރަބިއްޔާއިން 40 އިމާމުންނާއި ބުރުނާއީ އިން 20 އިމާމުންނެވެ.

"މި ދަންނަވާ އަދަދުތަކަކީ ހަގީގީ އަދަދުތަކެއް. މީ ރާއްޖޭގެ ތާރީހުގަ މިހާތަނަށް މިހާ ކުރު މުއްދަތެއްގެ ތެރޭގަ ކުރެވިފަ އޮތް ކަމެއް ނޫން،" މިނިސްޓަރު ވިދާޅުވި އެވެ.

ޝަހީމް ވިދާޅުވީ ޒުވާން ހަތީމުން ތަމްރީނު ކުރުމުގެ ޕްރޮގްރާމުގެ ދަށުން ފުރަތަމަ ބެޗުން 65 އަދި ދެވަނަ ބެޗުން 169 ހަތީބުން ތަމްރީނުކޮށްފައިވާ ކަމަށެވެ. ސަރުކާރުގެ އަމާޒަކީ ދައުރު ނިމުމުގެ ކުރިން 1000 ހަތީބުން ތަމްރީނު ކުރުމެވެ.

"އަޅުގަނޑު އެންމެ އުފާވި ކަމަކީ މިގޮތުން ސަނަދު ހާސިލް ކުރި ފަރާތްތައް، މި ޒުވާން ހަތީބުން ރަށްރަށަށް ދިއުން ރަށްތަކުން އެކުދިންނަށް އިސްތިގުބާލުކޮށް، މާބޮނޑި އަރުވާ، ކައުންސިލްތަކުގެ ސޯޝަލް މީޑިއާގަ އެކުދިންނާ ބެހޭ ގޮތުން، އެކުދިންގެ ޕްރޮފައިލް ހާމަކޮށް، އެކުދިންގެ މައިންބަފައިންނަށް މަރުހަބާ ކިޔާ، އަދި ބައެއް ރަށްރަށުގަ ޒުވާން ހަތީބުން ލައްވާ ހުކުރު ކުރުވާ އަދި އީދު ނަމާދުގަ ވެސް ޖަމާއަތުގަ އެކުދިންނަށް އިމާމުކަން ދީ، މިކަން ފެނިގެން ދިޔަތަން އަޅުގަނޑުމެންނަށް ފެނިގެން ދިޔަތަން އެއީ ލިބުނު ވަރަށް ބޮޑު އުފަލެއް،" މިނިސްޓަރު ފާހަގަކުރެއްވި އެވެ.

ހަތީބުން ތަމްރީނު ކުރުމުގެ ޕްރޮގްރާމަކީ މުޖުތަމައު ވަރަށް ބޮޑަށް ބަލައިގެންފައިވާ ޕްރޮގްރާމެއް ކަމަށް މިނިސްޓަރު ވިދާޅުވި އެވެ. އޭގެ މާނައަކީ ރާއްޖޭގެ އިސްލާމީ މުސްތަގު ބަލު ވަރަށް އުޖާލާވެގެން ދާނެ ކަމެއް ކަމަށް ވެސް ފާހަގަކުރެއްވި އެވެ.

މިނިސްޓަރު ވިދާޅުވީ ރާއްޖޭގައި އަރަބި ބަހުން ވާހަކަ ދަންނަ މީހުން ގިނަ ކުރުމަކީ ރައީސް ޑރ. މުހައްމަދު ގެންގުޅުއްވާ ވަރަށް ބޮޑު އަމާޒެއް ކަމަށެވެ. އެ އަމާޒުގެ ދަށުން އިމާމުންނަށް އަރަބި ބަސް ދަސްކޮށްދިނުމަށް ޕްރޮގްރާމްތަކެއް ހިންގަމުން ގެންދާކަން ފާހަގަކުރެއްވި އެވެ.

އެގޮތުން، އަލްއަޒްހަރު ޔުނިވާސިޓީއާ ގުޅިގެން 33 އިމާމުންނަށް އަރަބި ބަސް ދަސްކޮށްދިނުމުން އެކިއެކި ޕްރޮގްރާމުތައް ހިންގާފައިވާ ކަމަށް ވެސް ވިދާޅުވި އެވެ.

އޭގެ އިތުރުން ރާއްޖޭގައި ފުރަތަމަ ފަހަރަށް ބާއްވާ އިމާމުންގެ މަހާސިންތާ، މިމަހުގެ 21 ވަނަ ދުވަހު އޮންނާނެ ކަމަށް ވެސް ވިދާޅުވެފައިވެ އެވެ.