ރާއްޖޭގެ ތާރީހުގައި އެންމެ ގިނަ ލޯނު ނެގީ މިދިޔަ ސަރުކާރުން: ފަޒާދު

ރާއްޖޭގެ ތާރީހުގައިވެސް އެންމެ ގިނަ ލޯނު ނެގި ސަރުކާރަކީ ނިމިދިޔަ އެމްޑީޕީ ސަރުކާރު ކަމަށް ފުވައްމުލަކު މެދު ދާއިރާގެ މެމްބަރު އަލީ ފަޒާދު ވިދާޅުވެއްޖެ އެވެ.

ސަންގު ޓީވީގެ ހަބަރަށްފަަހު ޕްރޮގްރާމްގައި ވާހަކަ ދައްކަވަމުން ފަޒާދު ވިދާޅުވީ އިގުތިސާދު ހީނަރުވާ ވާހަކަ، އިދިކޮޅު ފަރާތްތަކުން ދައްކަމުންދާއިރު، ރާއްޖެއިން ދައްކަންޖެހޭ ދަރަނީގެ އަދަދު މި ސަރުކާރުން ހާމަކުރުމުން އިދިކޮޅު އެއްވެސް ފަރާތަކުން އެކަން ދޮގު ނުކުރާ ކަމަށެވެ. އަދި ލޯނު ނަގާފަ ހުރި އަދަދު ހާމަކުރުމުން އެކަންވެސް ވެރިކަން ކޮށްފަ ހުރި އެއްވެސް ރައީސަކު ދޮގުކޮށްފައިނުވާ ކަމަށްވެސް އޭނާ ވިދާޅުވި އެވެ.

ފަޒާދު ވިދާޅުވީ ދިވެހި ތާރީހުގައި އެންމެ ގިނައިން ލޯނު ނަގާފައިވަނީ ނިމިދިޔަ ސަރުކާރުގެ ފަސް އަހަރުގެ ވެރިކަމުގައި ކަމަށެވެ.

"އަޅުގަނޑަށް ލިބިފައިވާ މައުލޫމާތު ކުށް ކަމުގައި ނުވާނަމަ ރައީސް މައުމޫންގެ ވެރި ކަމުގައި 1979 ވަނަ އަހަރު ފާސްކުރެއްވި ބަޖެޓަކީ 49 ނޫނީ 42 މިލިއަން ރުފިޔާ. ބިލިއަނެއްވެސް ނޫން އިނގޭތޯ. އެކަމަކު މިހާރު އަޅުގަނޑުމެން ރަށުގަ މިހުން އަތޮޅު ހޮސްޕިޓަލުގެ ބަޖެޓުވެސް އެއަށްވުރެ ބޮޑުވާނެ. ރައީސް މައުމޫނުގެ 30 އަހަރުގެ ވެރިކަން ނިމިގހެންދިޔައިރު މި ރާޢްޖެއަށް ފާސްކޮށްފަ ހުންނާނީ 85 އާއި 95 މިލިއަނާއި ދެމެދުގެ ބަޖެޓެއް. ރައީސް ޔާމީނުގެ ސަރުކާރުގަ މުޅި ރާއްޖެއަށް ފާސްކޮށްފަ އިނީ 125 ބިލިއަން ރުފިޔާގެ ބަޖެޓެއް. އެއަށްވުރެ މާގިނަ ނިމިދިޔަ އިބްރާހިމް މުހައްމަދު ސޯލިހުގެ ސަރުކާރުގަ." އޭނާ ވިދާޅުވިއެވެ.

ފަޒާދު ވިދާޅުވީ، އިދިކޮޅުން ކުޑަރަށެއް ބޮޑުރަށެއް ނުބަލައި ތަރައްގީ ކުރި ވާހަކަ ދައްކަވާއިރު، އޭގެ ކުރީ ސަރުކާރުން ބޮޑެތި ރަށްތަކުގަ ފެނާއި ނަރުދަމާގެ މަސައްކަތް ނިންމާފައިވާ ކަމަށެވެ. އަދި ބޮޑެތި ބައެއް މަޝްރޫއުތައްވެސް ފައްޓައި ނިމުމަކާ ގާތަށް ގެނެސްފައި ހުރި ކަމަށެވެ. މިއީ ރައްޔިތުންނަށް އޮޅުވާލުމަށް ދައްކަވަމުންދާ ވާހަކަތައް ކަމަށެވެ.

މީގެ އިތުރުން އޭނާ ވިދާޅުވީ އިދިކޮޅު ފަރާތްތަކުން އިގުތިސާދުގެ ވާހަކަ ދައްކަމުންދާއިރު، ރާޢްޖެ މިހާލަތުގައި އޮތީވެސް ރައީސް ޑރ. މުހައްމަދު މުއިއްޒު އަޅުއްވާފައިވާ ހަރުދަނާ ފިޔަވަޅުތަކުގެ ސަބަބުން ކަމަށެވެ. އަދި އިދިކޮޅުން އިގްތިސާދުގެ ވާހަކަ ދެއްކުމުން އެވަނީ ޖޯކަކަށް ކަމަށްވެސް ވިދާޅުވިއެވެ. 

ގައުމު މިހާލަތަށް ދިޔައީ އިދިކޮޅުގެ ސަބަބުންކަން އެމީހުން ގަބޫލު ކުރަންޖެހޭނެ ކަމަށާއި ނަގާފައި ހުރި ލޯނުތަކާއި އޭގެ ރީޕޭމެންޓުގެ އަދަދު ހާމަކުރުމުން އެއްވެސް މީހަކު އެކަން ދޮގުނުކުރުމަކީ އެކަމުގެ އެއް ހެކި ކަމަށްވެސް ވިދާޅުވިއެވެ.