"ޔޫޓިއުބާއި ގޫގުލް ޕޭގެ އެކްސެސް ހޯދަން ވަރަށް އަވަހަށް ޕްރޮޕޯސަލް ހުށަހަޅާނަން"

ރާއްޖޭގައި ޔޫޓިއުބް މެދުވެރިކޮށް އާމްދަނީ ހޯދުމަށާއި ގޫގުލް ޕޭގެ އެކްސެސް ހޯދުމަށް ވަރަށް އަވަހަށް ޕްރޮޕޯސަލް ހުށަހަޅުއްވާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

ޒުވާނުންގެ ގިނަ ބަޔަކު އޮންލައިން ވިޔަފާރި ކުރުމުގައި ހުރި ގޮންޖެހުންތަކަށް ހައްލު ހޯދަން، ސަރުކާރުން މިހާރު ވަނީ ޕޭޕަލްގެ ހިދުމަތް ހޯދަން ވެސް ޕްރޮޕޯސަލް ހުށަހަޅާފަ އެވެ. ކްރިއޭޓިވް އިކޮނޮމީގެ ސްޓްރެޓެޖީ އާއި ފަންޑު ތައާރަފްކުރުމަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ވިދާޅުވީ ދާދިފަހުން ޕޭޕަލް އިން އެދުނު އިތުރު މައުލޫމާތުތައް ވެސް ހިއްސާކޮށްފައި ވާނެ ކަމަށެވެ.

ޔޫޓިއުބާއި ގޫގުލް ޕޭގެ އެކްސެސް ހޯދަން ސަރުކާރުން އެފަރާތްތަކާ ވާހަކަ ދައްކަމުން އަންނަ ކަމަށް ކުރިން ވެސް މިނިސްޓަރު ވަނީ ވިދާޅުވެފަ އެވެ. ރޭ މިނިސްޓަރު ވިދާޅުވީ ވަރަށް އަވަހަށް ޕްރޮޕޯސަލް ހުށަހަޅުއްވާނެ ކަމަށެވެ. އަދި އެމެޒޯންގައި ދިވެހި އުފެއްދުންތައް ލިސްޓު ކުރެވޭނެ ގޮތް ހެދުމަށް، އެމެޒޯންއާ ވެސް ސަރުކާރުން ވާހަކަ ދައްކަމުންދާ ކަމަށް ވިދާޅުވި އެވެ.

"އަޅުގަނޑުމެންގެ އާބާދީ ކުޑައީ. އެހެން ނަމަވެސް މި އެކްސެސް ދިވެހި ކްރިއޭޓަރުންނަށް ދިނީމާ ރާއްޖޭގެ ޑިޖިޓަލް އިކޮނޮމީއެއް ނުވަތަ ކްރިއޭޓިވް އިކޮނޮމީއެއް އުފެދިގެން މި އަންނަނީ. މީގެ ޖާގަ އެބައޮތް، މިކަން ވާން އެބައޮތް،" މިނިސްޓަރު ވިދާޅުވި އެވެ.

މި ހިދުމަތްތައް ރާއްޖޭގައި ތައާރަފް ކުރަން ބޭނުންވާ އެންމެ ބޮޑު މަގުސަދަކީ މިނިސްޓަރު ވިދާޅުވި ގޮތުގައި ދިވެހި އުފެއްދުންތެރިންގެ މަސައްކަތްތައް ދުނިޔޭގެ ބާޒާރަށް ނެރުމަށެވެ. މިހާރު ވެސް އެކި އުފެއްދުންތައް އުފައްދައިގެން ވިއްކާ 400 ވިޔަފާރިވެރިން ތިބިކަން މިނިސްޓްރީން އެއްކުރި މައުލޫމާތުން އެނގޭ ކަމަށް މިނިސްޓަރު ވިދާޅުވި އެވެ.

ކޮންމެ ހަފްތާއަކު މިފަދަ ވިޔަފާރި ވެރިންނަށް ބައްދަލު ކުރައްވަމުން ގެންދަވާކަން ފާހަގަކުރައްވަމުން މިނިސްޓަރު ވިދާޅުވީ، ރާއްޖޭން ލިބެން ހުރި ޓެކްނޮލޮޖީގެ މަދު ވަސީލަތްތަކާއެކު ބޭރުގެ ފަރާތްތަކާ ގުޅިގެން އުފެއްދުންތައް އުފައްދާ ޒުވާނުން ރާއްޖޭގައި އެބަތިބި ކަމަށެވެ.

"ރާއްޖޭގަ ސަންޓޭން ލޯޝަން މިސާލަކަށް، އޮސްޓްރޭލިއާގެ ލެބަކުން ރިސާޗް ކޮށްގެން ރާއްޖޭގެ ކްލައިމެޓަށް އުފައްދާ ޒުވާނުން އެބަތިބި. އިޓަލީން ލެދާ ޕްރޮޑަކްޓްސްގެ ރޯލް ގެނެސްގެން ބޮޑު ޑިއުޓީ ދައްކައިގެން ގެނެސް، ޑިޒައިން އައިޑިއޭޝަނުން ޑިޒައިންކޮށް، ހޭންޑްމޭންޑް ޕްރޮޑަކްޓަރާ ހަމައަށް ގެންދާ ޒުވާނުން އެބަތިބި،" މިނިސްޓަރު ވިދާޅުވި އެވެ.

އޭގެ އިތުރުން މިނިސްޓަރު ވިދާޅުވީ ޓިކްޓޮކުން ވެސް އާމްދަނީ ހޯދޭނެ ގޮތްތައް ހޯދޭތޯ މަސައްކަތް ކުރައްވާ ކަމަށެވެ. އެގޮތުން ރަގަޅު ކޮންޓެންޓް އުފައްދާ އާޓިސްޓުންނަށް ފައިދާވާނެ ގޮތްތައް ހޯދޭތޯ ސަރުކާރުން މަސައްކަތް ކުރާކަން ފާހަގަކުރެއްވި އެވެ.

"އެހެންވީމަ މިހުރިހާ ކަމަކުން އަޅުގަނޑު ދަންނަވާނީ މިކަމަކީ ރައީސުލްޖުމްހޫރިއްޔާގެ ވިޝަން ހަގީގަތަކަށް ހެދުމަށްޓަކައި، އަދި ރާއްޖެ މިއޮތް ހާލަތު ބަދަލުކުރުމަށްޓަކާ އަޅުގަނޑުމެން ކުރަން ޖެހޭ ހުރިހާ ކަމެއް ވަރަށް ސާބިތުކަމާއެކު ކުރިއަށް ގެންދާނެ ވާހަކަ،"