ކްރިއޭޓާ އިކޮނޮމީ | ދިވެހި ފަންނުވެރިންނަށް 50،000ރ. އާއި 300،000ރ ގެ ފަންޑެއް

ފަސް އަހަރުގެ ސްޓްރެޓެޖިކް ޕްލޭނެއްވެސް ވަނީ ތައާރަފުކޮށްފަ 

ދިވެހި ފަންނުވެރިންގެ އިގްތިސޯދުގެ ފަސް އަހަރުގެ ސްޓްރެޓެޖިކް ޕްލޭން އާއި އެ ފަރާތްތައް ކުރިއަށް ގެންދަން އެހީތެރިވެދޭ 50،000ރ. އާއި 300،000ރ ގެ ފަންޑެއް ތައާރަފުކޮށްފި އެވެ. 

ދަރުބާރުގޭގައި މިރޭ ބޭއްވި ރަސްމިއްޔާތެއްގައި ބިޒްނަސް ސެންޓާ ކޯޕަރޭޝަން (ބީސީސީ) އިން ބަލަހައްޓާ ކްރިއޭޓިވް އިކޮނޮމީގެ ގައުމީ އުފެއްދުންތެރިކަމުގެ ޕްލޭންތަކާއި ދިވެހި ފަންނުވެރިންނަށް އެހީތެރިވެދޭ ފަންޑު ލޯންޗްކޮށްދެއްވީ އިކޮނޮމިކް މިނިސްޓަރު މުހައްމަދު ސައީދު އެވެ. މިއީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. މިފަންޑުން ފުރަތަމަ މިއަހަރު އެހީތެރިވެދޭނީ ހަތަރު ދާއިރާއަކުންނެވެ. 

ބީސީސީ އިން ތައާރަފުކުރި ކްރިއޭޓިވް އިކޮނޮމީ ފަންޑަކީ ޕްރޮޖެކްޓް ބޭސްޑް ފަންޑެކެވެ. މި ފަންޑުން އެހީތެރިވެދޭން ނިންމާފައިވަނީ ފިލްމް އުފައްދާ ފަރާތްތަކާއި މިއުޒކް އުފައްދާ ފަރާތްތައް އަދި ކްރިއޭޓިވް ކޮންޓެންޑް އުފައްދާ ފަރާތްތަކާއި އާޓް އެންޑް ކްރާފްޓް ފަރާތްތަކަށެވެ. މި ފަންޑަށް ކުރިމަތިވާން އަންނަ މަހުގެ 10 ވަނަ ދުވަހު ހުޅުވާލާނެ އެވެ. މި ފައިނޭންސިން ސްކީމުގެ ތެރޭން އާމްދަނީ ލިބޭ ވަރުން ފައިސާ ދެއްކޭނެ އުސޫލެއް ތައާރަފު ކުރާނެ އެވެ. އަދި ރަހުނަކާ ނުލައި ފައިނޭންސް ދެވޭނެ އެވެ. މި ފަންޑުގެ ސައިޒަކި 50،000ރ، އާއި 300،000ރ. ގެ ފަންޑެކެވެ. 

ދިވެހީގެ ފަންނުވެރިންގެ އިގްތިސޯދީ ޕްލޭންގެ މައުލޫމާތު ދެއްވަމުން ޑރ. ޝަހުދާ ވިދާޅުވީ މުޅި މި ނިޒާމު ބައްޓަންކޮށްފައިވަނީ ދިވެހި ޒުވާނުންގެ އުފެއްދުންތެރިކަން މަތި ކުރުމަށެވެ. 

ދިވެހި ފަންނުވެރިންގެ ސްޓްރެޓެޖިކް ޕްލޭންގައި ހިމެނޭ ބައެއް ކަންތައްތަކުގެ ތެރޭގައި އުފެއްދުންތެރިންގެ އުފެއްދުންތައް ރައްކާތެރިކުރަން ގާނޫނީ އޮނިގަނޑު ވަރުގަދަ ކުރުމާއި އުފެއްދުންތަކަށް ދުނިޔޭގެ އެކި ހިސާބުތަކުން މާކެޓު ހޯދައި ދިނުން
މަސައްކަތްތަކަށް ފައިސާ ލިބޭނެ އިންތިޒާމެއް ހަމަޖައްސައި ދިނުން ހިމެނެ އެވެ. މީގެ އިތުރުން ތަމްރީން ދިނުމާއެކު ރިސާޗްގައި އެހީތެރިވެދިނުމާއި މަސައްކަތް ކުރާނެ އިންފްރާސްޓްޗަކްޗާ ގާއިމްކޮށް ދިނުން އަދި  ތިމާވެއްޓާއި ރަހުމަތްތެރި ސިފަތަކެއްގައި މަސައްކަތް ކުރުވަން ބާރު އެޅުންފަދަ ލަނޑުދަނޑިތަކެއް ހިމެނެ އެވެ. މި ލަނޑުދަނޑިތައް ހާސިލް ކުރަން ކަނޑައަޅާފައިވަނީ ފަސް އަހަރު ދުވަހަށް ބަހާލައިގެންނެވެ. 

މި ސަރުކާރުން ވަނީ ނޭޝަނަލް އިކޮނޮމިކް ކްރިއޭޓިވް ކައުންސިލް އެކުލަވާލާފަ އެވެ. މި ކައުންސިލުން ވަނީ ރާއްޖޭގައި ކްރިއޭޓިވް މަސައްކަތް ކުރާ ގިނަ ފަރާތްތަކާއެކު މަޝްވަރާކޮށްފަ އެވެ. މި ޕްލޭންނުގެ ދަށުން 78 ވައުދެއް ހިމެނެ އެވެ. މިއީ އުފެއްދުންތެރިންގެ އުފެއްދުންތައް މާކެޓުކޮށް ކުރިއަރުވާނެ ކަމުގެ ގައުމީ ވައުދެކެވެ.