ޖަނަވަރީ އެކަކުން ފެށިގެން ޗައިނާއިން އެތެރެކުރާ މުދަލުގެ %91 އިން ޑިއުޓީ ނުނަގާނެ

އަންނަ އަހަރުގެ ޖަނަވަރީ އެއްވަނަ ދުވަހުން ފެށިގެން ޗައިނާއިން ރާއްޖެއަށް އެތެރެކުރާ ވަރަށް ގިނަ މުދަލުން ޑިއުޓީ ނުނަގާނެކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ. 

މިނިވަން ވިޔަފާރިއަށް ރާއްޖެ ހުޅުވައިލުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރިޔާސީ ވައުދުފުޅެއްކަން ފާހަގަކުރައްވަމުން ސައީދު ވިދާޅުވީ ރައީސް އަބްދުﷲ ޔާމީނުގެ ވެރިކަމުގައި ޗައިނާއާއެކު ގާއިމުކުރެވުނު މިނިވަން ވިޔަފާރީގެ އެއްބަސްވުން ތަންފީޒުކުރާނެ ގޮތުގެ ތާވަލެއް އެކުލަވައިލާ އެ އެއްބަސްވުމުގެ ދަށުން ތަންފީޒުކުރަންޖެހޭ ކަންކަން ތަންފީޒުކުރުމަށް ތާރީހުތަކެއް މިހާރު ކަނޑައެޅިފައިވާ ކަމަށެވެ. 

އައްޑޫއަށް ކުރެއްވި ދަތުރުފުޅުގައި ބައްދަލުވެވަޑައިގެންނެވި ޒުވާން ދެ ވިޔަފާރިވެރިޔަކަށް އިޝާރާތްކުރައްވައި ސައީދު ވިދާޅުވީ އެ ވިޔަފާރިވެރިން ފަދައިން ޗައިނާއިން މުދާ އެތެރެކޮށް ހޯލްސޭލުކޮށް ވިއްކާ ފަރާތްތަކަށް އަންނަ އަހަރުގެ ޖަނަވަރީ އެއްވަނަ ދުވަހުން ފެށިގެން ޗައިނާއިން ރާއްޖެއަށް އެތެރެކުރާ ވަރަށް ގިނަ މުދަލަށް ޑިއުޓީ ދައްކަންނުޖެހޭނެ ކަމަށެވެ. 

އޭގެ އިތުރަށް އައްޑޫއަށް އިޓަލީން ލެދާ ގެނެސްގެން އެކި ބާވަތުގެ މުދާ އުފައްދާ ވިޔަފާރިއަކަށް އިޝާރާތްކުރައްވައި ސައީދު ވިދާޅުވީ އެފަދަ މުދާ ޗައިނާއަށް ބޭރުކުރާއިރު ޑިއުޓީ ދައްކަންނުޖެހޭނެ ކަމަށެވެ. އަދި ޑިއުޓީ ދެއްކުމުގެ އިތުރަށް ޗައިނާއަށް މުދާ އެތެރެކުރުމުގައި ފުރިހަމަކުރަންޖެހޭ ވަރަށް ގިނަ އިޖުރާއާތުތައް ފުރިހަމަކުރުމުގައި ވަރަށް ބޮޑު ލުއިތަކެއް ލިބިގެންދާނެކަން އޭނާ ފާހަގަކުރެއްވި އެވެ. 

"މި މުދާ ޗައިނާއަށް އެތެރެކުރާއިރު ޑިއުޓީ ދައްކާކަށް ނުޖެހޭނެ. އަދި މުދާ އެތެރެކުރާއިރު ހުންނަ ނަން ޓެރިފް ބެރިއާސް ކަސްޓަމްސް އަދި ކަސްޓަމްސް ނޫން ބައެއް މަސައްކަތްތައް ވަރަށް ބޮޑަށް ލުއިވެގެންދާނެ،" ސައީދު ވިދާޅުވި އެވެ. 

"ހޯލްސޭލްކޮށް ޗައިނާއިން މުދާ އެތެރެކުރާ ފަރާތްތަކަށް ދަންނަވަން ބޭނުންވަނީ އެކެއް ޖަނަވަރީ 2025 އިން ފެށިގެން ޗައިނާއިން އެތެރެކުރާ މުދަލުގެ 91 އިންސައްތައަށް ޑިއުޓީއެއް ދައްކަންނުޖެހޭނެ،"

އިތުރަށް ސައީދު ވިދާޅުވީ ޗައިނާއާއެކު ހަދާ ކަރަންސީ ސެޓްލްމެންޓު އެގުރީމެންޓުގެ ސަބަބުން ޗައިނާއިން މުދާ އެތެރެކުރުމުގައި ޑޮލަރަށް ބަރޯސާވުން ވަރަށް ބޮޑަށް ނިމުމަކަށް އަންނާނެ ކަމަށެވެ. އެކަމުގެ ސަބަބުން ދިވެހި ރުފިޔާ ބޭނުންކޮށްގެން ޗައިނާއިން ގެންނަ މުދަަލަށް ބޭންކެއް މެދުވެރިކޮށް އަގު އަދާކުރެވޭނެ ކަމަށެވެ. 

މި ދެ އެއްބަސްވުމުގެ ސަބަބުން ޗައިނާއިން ރާއްޖެއަށް އެތެރެކުރާ މުދަލުގެ އަގު ވަަަރަށް ބޮޑަށް ހެޔޮވެގެންދާނެކަން ސައީދު ފާހަގަކުރެއްވި އެވެ. 

އެވެރެޖުކޮށް އަހަރެއްގެ މައްޗަށް 700 މިލިއަން ޑޮލަރުގެ މުދާ ޗައިނާއިން މިހާރު ރާއްޖެއަށް އެތެރެކުރެ އެވެ. ޗައިނާއަކީ އެއް ބިލިއަން މީހުންގެ އާބާދީއެއް އޮތް ގައުމަކަށްވާއިރު އެއީ މިހާރު ދުނިޔޭގެ އެންމެ ބޮޑު ކޮންޒިއުމާ ބާޒާރެވެ. ޗައިނާއަށް ރާއްޖޭގެ އުފެއްދުންތައް ބާރުކޮށް އިސްތިހާރުކޮށް ވިއްކޭނަމަ ދިވެހި ވިޔަފާރިތަކަށް ބޮޑު ފައިދާއެއް ހޯދުމުގެ ފުރުސަތު އޮންނާނެ އެވެ.