ޖަޕާނުގައި ގަރުނަކަށްވުރެ ދުވަސްވީ މީހުން 95،000 އަށް، ގިނައީ އަންހެނުން
ޖަޕާނުގައި ގަރުނަކަށްވުރެ އުމުރުން ދުވަސްވީ އާބާދީ 95،000 އަށްވުރެ މަތިވެފައިވާއިރު އެމީހުންގެ 88.3 އިންސައްތައަކީ އަންހެނުންނެވެ.
ޖަޕާނުގައި ސަތޭކަ އަހަރަށްވުރެ ދޮށީ މީހުންގެ އާބާދީ ޖެހިޖެހިގެން 54 އަހަރު އިތުރުވެ، ރެކޯޑު މިންވަރަކަށް މި އަހަރު އިތުރުވއްޖެ އެވެ.
ޖަޕާނުގައި ފާހަގަކުރާ ދުވަސްވީ މީހުންނަށް އިހުތިރާމު ކުރުމުގެ ދުވަހުގެ މުނާސަބަތުގައި އެ ގައުމުގެ ސިއްހީ ވުޒާރާއިން އާންމުކޮށްފައިވާ ހިސާބުތަކަށް ބަލާއިރު ނިމުނު އަހަރާ އަޅާބަލާއިރު މި އަހަރު އެ ގައުމުގައި ތިބި ސައްތައެއް ފުރިފައިވާ މީހުންގެ އާބާދީ 2،980 އިން އިތުރުވެފައިވެ އެވެ.
އެ މިނިސްޓްރީން ހާމަކުރި ތަފާސްހިސާބުތަކުން އެނގޭ ގޮތުގައި އުމުރުން 100 އަހަރު ފުރިފައިވާ ޖަޕާނު މީހުންގެ ބޮޑު އިންސައްތަައަކީ އަންހެނުންނެވެ. އެގޮތުން ސައްތައެއް ފުރިފައިވާ މީހުންގެ ތެރެއިން 83،958 މީހުންނަކީ އަންހެނުންނެވެ. އެއީ ސަތޭކަ އަހަރު ވެފައިވާ މީހުންގެ 88.3 އިންސައްތަ އެވެ.
އިތުރަށް މިނިސްޓްރީން އާންމުކޮށްފައިވާ ހިސާބުތަކުން ދައްކާ ގޮތުގައި އުމުރުން 65 އަހަރުން މަތީގެ ދުވަސްވީ މީހުންގެ އާބާދީގެ 2023 ވަނަ އަހރުގެ ނިޔަލަށް 36.25 މިލިއަނަށް އަރާފައިވެ އެވެ. އަދި އެމީހުންގެ ތެރެއިން 25 އިންސައްތަ މީހުންނަކީ މަސައްކަތްކުރާ މީހުންނެވެ.
މިވަގުތު ދުނިޔޭގައި ހުރި އެންމެ ދުވަސްވީ މީހާގެ ގޮތުގައި ޖިނިސް ވޯލްޑް ރެކޯޑްސްއިން ގަބޫލުކުރާ މީހަކީ 116 އަހަރުގެ ޖަޕާނު އަންހެނެއްކަމަށްވާ ޓޮމިކާ އިޓޫކާ އެވެ. އެންމެ ދޮށީ ޖަޕާނު ފިރިހެނަކީ 110 އަހަރުގެ ކިޔޮޓްކާ މިޒޫނޯ އެވެ.
2023 ވަނަ އަހަރު ޖަޕާނުގެ އާބާދީ 122.42 މިލިއަނުން 121.56 މިލިއަނަށް މަދުވިކަމަށް އެ ގައުމުގެ ދާހިލީ ވުޒާރާއިން ބުނެފައިވެ އެވެ.
އެހެންކަމުން ނިމުނު އަހަރަކީ ޖެހިޖެހިގެން ޖަޕާނުގެ އާބާދީ ދަށްވި 15 ވަނަ އަހަރެވެ. އަދި އެއީ ޖަޕާނުގައި އާބާދީގެ ސާވޭތައް ހަދަން 1968 ވަނަ އަހަރު ފެށިފަހުން އާބާދީ އެންމެ ބޮޑަށް ދަށްވި އަހަރެވެ.
ކޮމެންޓް
Republic of Maldives