ސިހުޔޫނީ ޣައިރު ގާނޫނީ އާބާދުވެރިން ފަލަސްތީނު ސުކޫލަކަށް ހަމަލާދީފި

ޣައުރު ގާނޫނީ ސިހުޔޫނީ އާބާދުވެރިންތަކެއް ހުޅަނގު އައްސޭރީގައި ހުންނަ ފަލަސްތީނު ސުކޫލަކަށް ވަދެގަނެ އެ ސުކޫލުގައި ތިބި ދަރިވަރުންނާއި މުދައްރިސުންނަށް ހަމަލާދީ އަނިޔާކޮށްފި އެވެ. 

ފަލަސްތީނުގެ އެކްޓިވިސްޓުންވަނީ އެ ހަމަލާގެ ވީޑިޔޯ މީސްމީޑިޔާގައި ހިއްސާކޮށްފަ އެވެ. އިސްރާއީލުގެ އާބާދުވެރިން އަރައިގަނެ ހަމަލާދިން ސުކޫލަކީ ހުޅަނގު އައްސޭރީގެ މުއައްރަޖަތު ސަރަހައްދުގައި ހުންނަ ޕްރައިމަރީ ސުކޫލެކެވެ. 

ޢަރަބްލް ކަޢަބްނާ ޕްރައިމަރީ ސުކޫލަށް ވަދެ އިސްރާއީލުގެ އާބާދުވެރިން ދަރިވަރުންނާއި މުދައްރިސުންނަށް ދިން ހަމަލާތަކުގައި ބައެއް މީހުންނަށް އަނިޔާވެފައިވާކަމަށް އަލްބަދާއިރު އެންޖީއޯއަށް ނިސްބަތްވެވަޑައިގަންނަވާ ހަސަން މްލެއިހާތާ ހަވާލާދީ އަނާޟޯލް ނޫސް އެޖެންސީން ރިޕޯޓުކޮށްފައިވެ އެވެ.

ފަލަސްތީނުގެ ރެޑް ކްރެސެންޓް ސޮސައިޓީން ބުނެފައިވަނީ ޣައިރު ގާނޫނީ އާބާދުވެރިންގެ ހަމަލާތަކުގައި ހަތް މީހަކު ޒަހަމްވެ ހޮސްޕިޓަލަށް ގެންގޮސް ފަރުވާކޮށްފައިވާ ކަމަށެވެ. 

އާބާދުވެރިން ދިން ހަމަލާއާ ގުޅިގެން ސުކޫލުގެ ޕްރިންސިޕަލު ހިމެނޭހެން ދެ މީހަކު އިސްރާއީލުގެ ސަލާމަތީ ބާރުތަކުން ހައްޔަރުކުރި އެވެ. އެ ދެ މީހުން ހައްޔަރުކުރީ އާބާދުވެރިންނަށް އެމީހުން ހަމަލާދިން ކަމަށް ތުހުމަތުކޮށެވެ. 

ފަލަސްތީނުގެ ތައުލީމާ ބެހޭ ވުޒާރާއިން އެ ހަމަލާ ކުށްވެރިކޮށް ބުނެފައިވަނީ އިސްރާއީލުގެ އާބާދުވެރިން ފަލަސްތީނުގެ ކުޑަކުދިންނަށް ބިރުދައްކައި، ކިޔެވުމާއި އުނގަންނައިދިނުމަށް ގަސްތުގައި ހުރަސްއަޅާފައިވާ ކަމަށެވެ. 

"ކުޑަކުދިންގެ ހައްގުތަކަށް ރިއާޔަތްކުރުމެއް ނެތި އިސްރާއީލުން ހިންގަމުންދާ މި އަމަލުތަކުގެ ސަބަބުން އިސްރާއީލުގެ އިސްތިއުމާރުގެ މުޑުދާރު މޫނު ވަރަށް ސާފުކޮށް އަންނަނީ ކަޝްފުވަމުން،" ފަލަސްތީނުގެ ތައުލީމާ ބެހޭ ވުޒާރާގެ ބަޔާނުގައި ބުނެފައިވެ އެވެ. 

ޣައްޒާއަށް އިސްރާއީލުން ދެމުންދާ އުދުވާނީ ހަމަލާތަކުގެ ސަބަބުން ހުޅަނގު އައްސޭރީގައި ނުތަނަވަސްކަން ބޮޑުވެފައިވަނިކޮށް އިސްރާއީލުންވަނީ އެ ސަރަހައްދުގައި މިފަހުގެ ތާރީހުގައި ނުހިންގާވަރުގެ ބޮޑު އޮޕަރޭޝަނެއް ފަށައި އަނިޔާވެރިކަން އިތުރުކޮށްފަ އެވެ. 

އިސްރާއީލުން ޣައްޒާއަށް ދެމުންދާ ހަމަލާތަކުގައި 41،000 އަށްވުރެ ގިނަ މީހުން ޝަހީދުކޮށްލާފައިވާއިރު، ހުޅަނގު އައްސޭރީގައި އިސްރާއީލުން ހިންގާ އޮޕަރޭޝަނުގައޮި 704 މީހަކު ޝަހީދުކޮށްފައިވެ އެވެ. އޭގެ ތެރޭގައި 159 ކުޑަކުދިން ހިމެނެ އެވެ.