ބީއެމްއެލްގެ ޒިންމާދާރު މަގާމުތަކަށް ދިވެހިން ލާން ގޮވާލައިފި

ބޭންކް އޮފް މޯލްޑިވްސް (ބީއެމްއެލް)ގެ ޒިންމާދާރު މަގާމުތަކަށް ދިވެހިން ލުމަށް ރައްޔިތުންގެ މަޖިލީހުގެ ނައިބް ރައީސް އަހުމަދު ނާޒިމް ގޮވާލައްވައިފި އެވެ.

ނާޒިމް މިފަދައިން ގޮވާލައްވާފައި ވަނީ މިއަދު ކުރިއަށްދާ ދައުރުން ބޭރު ދެވަނަ ޖަލްސާގައި ވާހަކަ ދައްކަވަމުންނެވެ. މިއަދުގެ ޖަލްސާ ބާއްވާފައި ކުންފުނިތަކުގެ ގާނޫނަށް ހުށަހަޅާފައިވާ އިސްލާހާ މެދު ބަހުސްކޮށް ގޮތެއް ނިންމުމަށެވެ. ސަރުކާރުގެ ފަރާތުން މު ބިލު މަޖިލީހަށް ހުށަހެޅުއްވީ ފޭދޫ އުތުރު ދާއިރާގެ މެންބަރު އިސްމާއިލް ނިޒާރެވެ.

އެ ބިލުގައި ހުށަހަޅާފައިވާ އިސްލާހުގައި ވަނީ، ހިއްސާދާރުންގެ ހާއްސަ އާންމު ޖަލްސާއަކަށް ނޯޓިސް ފޮނުވަން އޮންނަ 21 ދުވަހުގެ މުއްދަތު ތިން ދުވަހަށް ކުރު ކުރުމަށެވެ. މި އިސްލާހު ހުށަހަޅަން ޖެހުނީ ބީއެމްއެލްގައި ދާދިފަހުން ހިނގައިިދިޔަ ކަންކަމުގެ ސަބަބުން ކަމަށް ނާޒިމް ވިދާޅުވި އެވެ.

"21 ސެޕްޓެމްބަރުގައި އީޖީއެމްއެއް ބާއްވަން ގޮވާލާފައިވަނިކޮށް އެ ކުންފުނީގެ ސީއީއޯ ވަނީ އިސްތިއުފާ ދެއްވާފައި. އެހެންކަމުން ވަރަށް އަވަހަށް އިތުރު އީޖީއެމް އެއް ބާއްވަން އެބަ ޖެހޭ ސީއީއޯ އެއް ނޫނީ އެމްޑީއެއް އައްޔަން ކުރަން،" ނާޒިމް ވިދާޅުވި އެވެ.

ނާޒިމްގެ ވާހަކަފުޅުގައި ވިދާޅުވެފައި ވަނީ ހާއްސަ އާންމު ޖަލްސާތައް ބާއްވަން އޮންނަ މުއްދަތު ކުރުކުރުމަކީ މިހާލަތުގައި ކޮންމެހެން ކުރަން ޖެހިފައިވާ ކަމެއް ކަމަށެވެ. މި އިސްލާހު ގެނެވުމާއެކު އަވަހަށް ޖަލްސާތައް ބޭއްވިގެން ދާނެކަން ވެސް އޭނާ ފާހަގަކުރެއްވި އެވެ.

"އަޅުގަނޑުމެންނަށް ދާދި ފަހުން ދިމާވި ބެންކް އޮފް މޯލްޑިވްސްގެ ކާޑުތަކުގެ މައްސަލަތައް ދިމާވިއިރުވެސް އެކުންފުނީގެ އެންމެ ޒިންމާދާރު މަގާމުތަކުގައި ތިއްބެވި ބޭފުޅުން ރާއްޖެއަކު ނެތް. އޭގެ ތެރޭގައި އޮޕަރޭޝަންސް ޑިރެކްޓަރެއް ނެތް. ކްރެޑިޓް ކޮންޓްރޯލް މެނޭޖަރެއް ނެތް. އަިދ ރިސްކު މެނޭޖަރެއް ވެސް ނެތް. މިއީ ރާއްޖެއިން ބޭރުގެ ބޭފުޅުން،. 15000 ޑޮލަރުގެ މުސާރަ ދެއްވާފަ ތިބި އެންމެ ޒިންމާދާރު ތިން މީހުން ރާއްޖެއަކު ނެތް،" ނާޒިމް ވިދާޅުވި އެވެ.

ނާޒިމް ފާހަގަކުރެއްވި ގޮތުގައި، 15000 ޑޮލަރުގެ މުސާރައަކީ ކުޑަ އަދަދެއް ނޫނެވެ. އެހެންކަމުން ޕީސީބީ އާއި ފިނޭންސް މިނިސްޓްރީން ދުވަހުން ދުވަހަށް އެބޭފުޅުންގެ ކަންކަން ބަލަން ޖެހޭ ކަމަށް ވެސް އޭނާ ވިދާޅުވި އެވެ.

"މި މަގާމުތަކަށް ދިވެހިން ލެވޭތޯ ބަލަން އެބަ ޖެހޭ. އަޅުގަނޑުމެންގެ ބޭންކު އަޅުގަނޑުމެންގެ އެއްވެސް ކޮންޓްރޯލެއް ނެތި މިގޮތަށް ހިނގަމުންދާ ކަމަށްވަންޏާ އެދުވަހު ދިމާވި ކަންތަކަށްވުރެ ސީރިއަސް ކަންކަން ކުރިމަތިވެދާނެ،" ނާޒިމް ވިދާޅުވި އެވެ.

އެ ގާނޫނަށް ދެން ހުށަހަޅާފައިވާ އަނެއް އިސްލާހަކީ، ކުންފުނިތަކުގެ މެނޭޖިން ޑިރެކްޓަރުންނާއި ޑިރެކްޓަރުންގެ މަގާމު ހުސްވެއްޖެނަމަ އެ މަގާމަށް 30 ދުވަސް ތެރޭގައި މީހުން އައްޔަން ކުރަން އެންގުމަށް ރަޖިސްޓްރާ އޮފް ކޮމްޕެނީސްއަށް ދީފައިވާ ބާރު 10 ދުވަހަށް ކުރު ކުރުމަށެވެ.