އިރާގުގައި ދާއިޝްގެ ހަތަރު ލީޑަރަކު މަރާލައިފިކަމަށް އެމެރިކާއިން ބުނެފި

އެމެރިކާއާއި އިރާގުގެ އަސްކަރިއްޔާ ގުޅިގެން ފާއިތުވި މަހު ހިންގި އަސްކަރީ އޮޕަރޭޝަނެއްގައި، އިސްލާމިކް ސްޓޭޓް ނުވަތަ ދާއިޝްގެ ހަތަރު ލީޑަރަކު މަރާލާފައިވާކަމަށް އެމެރިކާގެ އަސްކަރިއްޔާގެ އޮފިޝަލުން ވިދާޅުވެއްޖެ އެވެ.

ހުކުރުދުވަހު އެމެރިކާގެ އަސްކަރީ އޮފިޝަލުން އިއުލާނުކުރެއްވި ގޮތުގައި ދާއިޝާ ދެކޮޅަށް އެމެރިކާއާއި އިރާގު ގުޅިގެން ބޮޑު އޮޕަރޭޝަނެއް ހިންގީ އޯގަސްޓު 29 ވަނަ ދުވަހު އެވެ. ދާއިޝަށް އިންތިޒާމުވެގެން އިރާގު ތެރޭގައި އަދި އިރާގުގެ ބިންތައް ބޭނުންކޮށްގެން އެހެން ގައުމުތަކަށް ހަމަލާތައް ދިނުމުގެ ގާބިލުކަން ހީނަރުކުރުމުގެ މަގުސަދުގައި ހިންގި އޮޕަރޭޝަނުގައި ދާއިޝްގެ 14 ހަނގުރާމަވެރިޔަކު މަރައިލެވުނުކަމަށް އެމެރިކާއިން ބުންޏެވެ. 

މި އޮޕަރޭޝަނުގައި މަރައިލެވުނު ދާއިޝްގެ ހަތަރު އިސްވެރިންގެ ތެރޭގައި އިރާގުގައި އެ ޖަމާއަތުން ހިންގާ ހުރިހާ ހަރަކާތްތަކެއްގެ އެންމެ އިސްވެރިޔާގެ މަގާމުގައި ހުރި އަހްމަދު ހާމިދު ހުސައިން އަބްދުލްޖަލީލް އަލްއިސްވަނީއާއި ހުޅަނގު އިރާގުގައި އެ ޖަމާއަތުގެ ހަރަކާތްތަކުގެ އިސްވެރިޔާ އަބޫ ހައްމާމް ހިމެނެ އެވެ. 

އެ ދެ މީހުންގެ އިތުރަށް އެ ޖަމާއަތުގެ ފަންނީ ތަރައްގީގެ ކަންކަން ހިންގުމުގެ އިސްވެރިޔާގެ މަގާމުގައި ހުރި އަބޫ އަލީ އައްތޫނިސީއާއި ހުޅަނގު އިރާގުގައި އެ ޖަމާއަތުގެ އަސްކަރީ ހަރަކާތްތައް ހިންގުމުގެ އިސްވެރިޔާ ޝާކިރު އަހްމަދު އަލްއީސަވީވެސް މަރާލާފައިވާކަމަށް އެމެރިކާއިން ބުނެފައިވެ އެވެ. 

ވޮޝިންޓަން ޕޯސްޓުން ރިޕޯޓުކުރި ގޮތުގައި މި ހަމަލާ ފެށުމުގެ ކުރިން އިސްލާމިކް ސްޓޭޓުގެ ދެ އަމާޒުފަތްގަނޑަކަށް ވައިގެ މަގުން ހަމަލާތަކެއް ދިނެވެ. އަދި މި ހަމަލާތައް ދީފައިވަނީ ވާދީ އަލްގަދަފް ސަރަހައްދުގަ އެވެ. 

މި ހަމަލާތަކުގައި އެމެރިކާގެ އަސްކަރިއްޔާގެ ހަތް މީހަކަށް އެކި މިންވަރުގެ އަނިޔާވި އެވެ. މިއީ އެމެރިކާގެ އަސްކަރީ އޮޕަރޭޝަންތަކުގައި އަނިޔާވާ އޮފިސަރުންނާ އަޅާބަލާއިރު ނިސްބަތުން ގިނަ އަދަދެކެވެ. 

އިރާގުގައި އެމެރިކާގެ 2،500 ސިފައިން ތިބޭއިރު އަވައްޓެރި ސޫރިޔާގައި 900 އެއްހައި އެމެރިކާ ސިފައިން ތިބެ އެވެ. އެމީހުންގެ މައިގަނޑު މަސައްކަތަކީ އިސްލާމިކް ސްޓޭޓު ހަންމަތަކޮށް އިތުރަށް ފުޅާވިޔަނުދީ ހިފަހެއްޓުމެވެ.