ތިން މީހެއްގެ ޕީއެޗްޑީ ގަބޫލުކުރަން ކުރި އަމުރު ސުޕްރީމް ކޯޓުގައި އިސްތިއުނާފުކުރަނީ

ތިން މީހެއްގެ ޕީއެޗްޑީ ސަނަދު ބަލަައިގަތުމަށް ހައިކޯޓުން މޯލްޑިވްސް ކޮލިފިކޭޝަން އޮތޯރިޓީއަށް އެންގި މައްސަލަ ދިވެހިރާއްޖޭގެ ސުޕްރީމް ކޯޓުގައި އިސްތިއުނާފުކުރުމަށް އެމްކިއުއޭއިން ނިންމައިފި އެވެ. 

ހައިކޯޓުން އިއްޔެ ނިންމި މައްސަލައަކީ، ގދ. ތިނަދޫ ޓުވައިލައިޓް ޝައްމޫން އާދަމް އާއި މ. ސިނައެކަތަ ފާތިމަތު މުމްތާޒާ އާއި ނ. ވެލިދޫ މަނާމް ނިއުމާ މުހައްމަދުގެ ފަރާތުން ހުށަހެޅި މައްސަލައެކެވެ.

މި މައްސަލައަކީ އެމްކިއުއޭއިން ގަބޫލުކުރާނެކަމަށް ބުނުމުން ސްރީލަންކާގެ އެއިމްސް ކޮލެޖުގައި ހިންގަމުންދިޔަ ފިލިޕީންސްގެ އެލްޑާސްގޭޓް ކޮލެޖުން ޕީއެޗްޑީ ދޭ ކޯހެއް ފުރިހަމަކުރުމަށްފަހު ސަނަދު ވެލިޑޭޓުކުރަން ހުށަހެޅުމުން އެ ސަނަދުތައް ބަލައިނުގަތުމަށް އެމްކިއުއޭއިން ނިންމުމުން ސިވިލް ކޯޓަށް ފުރަތަމަަ ހުށަހެޅި މައްސަލަައެކެވެ. 

އެ ސެޓިފިކެޓުތައް ގަބޫލުނުކުރީ އެމްކިއުއޭގެ އެޑްވައިޒަރީ ބޯޑުން 2021 ގައި ފިލިޕީންސްގެ އެލްޑާސްގޭޓް ކޮލެޖުގެ ޕީއެޗްޑީ ސަނަދު ބަލައިނުގަތުމަށް ނިންމުމާ ގުޅިގެންނެވެ. އެ ނިންމުން ނިންމީ އެ ކޮލެޖުގެ ފެންވަރު ދަށްވެގެންނެވެ. 

މައްސަލަ ހުށަހެޅި ތިން މީހުންގެ ފަރާތުން ސިވިލް ކޯޓުގައި ފާހަގަކުރި ގޮތުގައި ކޯސް ނިންމީ ކޯހަށް ވަނުމުގެ ޝަަރުތު ފުރިހަމަވާ ދަރިވަރުންގެ ސަނަދު ބަލައިގަންނާނެކަމަށް އެމްކިއުއޭއިން ލިޔުމުން ދީފައި އޮތް ޔަގީންކަމަކަށް ކުރި އިތުބާރެއްގެ މައްޗަށް ކަމަށެވެ. އަދި ކޯސް ނިމުނުތާ އަހަރު ދުވަސްފަހުން އެ ސަނަދު ބަލައިނުގަތުމަށް ނިންމުމުން އިއާދަނުކުރެވޭ ގެއްލުން ލިބުނު ކަމަށެވެ. 

އެ މަައްސަލާގައި އެ މީހުން އެދިފައިވަނީ އެމީހުންގެ ސަނަދު ބަލައިގަތުމަށް އެމްކިއުއޭގެ މައްޗަށް އަމުރުކޮށްދިނުމަށެވެ. އެފަދަ އަމުރެއް ނެރެވެން ނެތްނަމަ ޝަމްއޫނަށް 23.6 މިލިއަން ރުފިޔާ އަދި ނިއުމާއާއި މުމްތާޒާ ކުރެ ކޮންމެ މީހަކަށް 16 މިލިއަން ރުފިޔާގެ ބަދަލެއް ހޯދުމަށެވެ. 

އެ މައްސަލާގައި ސިވިލް ކޯޓުން ނިންމާފައިވަނީ އެމީހުންގެ ސެޓްފިކެޓު ގަބޫލުކުރަން އެމްކިއުއޭގެ މައްޗަށް އަމުރެއް ނެރެވެން ނެތް ކަމަށެވެ. އަދި އެ ފަރާތްތަކަށް ބަދަލެއް ނަގައިދެވެން ނެތްކަަމަށްވެސް ސިވިލް ކޯޓުން އަމުރުކުރި އެވެ. 

ހައިކޯޓުންވަނީ ސިވިލް ކޯޓުގެ އެ ނިންމުން ބާތިލުކޮށް އެ ތިން މީހުންނަށް ފިލިޕީންސްގެ އެލްޑާސްގޭޓްއިން ދޫކުރި ޕީއެޗްޑީ ސަނަދުތައް ބަލައިގަތުމަށް އެމްކިއުއޭގެ މައްޗަށް އަމުރުކޮށްފަ އެވެ. 

އެމްކިއުއޭއިން މިއަދު ބުނެފައިވަނީ އެ މައްސަލަަ ސުޕްރީމް ކޯޓުގައި އިސްތިއުނާފުކުރަން ނިންމާފައިވާ ކަމަށެވެ.