އާސަންދަ ހަމަޖައްސައިދޭނެ ކަމަށް ބުނެ ގެއަކަށް ވައްދާ ފޭރެން އުޅެފި

މަގުމަތިން ދިޔަ ބަލި މީހަކަށް އާސަންދަ ހަމަޖައްސައިދޭނެ ކަމަށްބުނެ ގެއަކަށް ވައްދައި ފޭރެން މަސައްކަތް ކޮށްފި އެވެ.

މި މައްސަލަ އާއި ގުޅިގެން ފުލުހުން ވަނީ، ފޭރުމާއި، މާރާާމާރީ ހިންގި ކަމުގެ ތުހުމަތުގައި ގދ. ތިނަދޫ، ވެސްޓްސައިޑް، އިއްފަތު މުހައްމަދު 41އ، ހައްޔަރުކޮށްފަ އެވެ.

އޭނާގެ ބަންދާ މެދު ގޮތެއް ނިންމުމަށް ކުރިމިނަލް ކޯޓަށް ހާޒިރު ކުރުމުން އެ ކޯޓުން ވަނީ އޭނާގެ ބަންދަށް 15 ދުވަސް ދީފަ އެވެ.

ބަންދު އަމުރުގައިވާގޮތުން، ޖުމްހޫރީ މައިދާން ކައިރިން ދިމާވި ބަލި މީހަކަށް އާސަންދަ ހަމަޖައްސައިދޭނެ ކަމަށްބުނެ، ފިނިހިޔާ ގޯޅީގައި ހުރި ގެއަކަށް ވެއްދި ކަމަށެވެ. އަދި އެ ގެއަށް ވައްދައި ގަލަމެއް ކަރުގައި ޖައްސައި ހަޅޭއްނުލަވަން ބުނެ އެމީހާގެ ފޯނާއި ވޮލެޓު ފޭރެން މަސައްކަތް ކޮށްފައިވާ ކަމަށެވެ.


އަމުރުގައިވާ ގޮތުން އޭނާ އަކީ ވައްކަމާއި ފޭރުމާއި މާރާމާރީގެ ކުށުގެ ރެކޯޑު ގިނަ މީހެކެވެ. 

މީގެ ކުރިންވެސް މަގުމަތިން ދިޔަ މީހަކަށް ގޮވައި އެއީ އޭނާގެ ރައްޓެއްސެއްގެ ދަރިއެއް ކަމަށްބުނެ، ގެއަކަށް ވައްދައި ގަލަމެއް ކަރުގައި ޖައްސައި ގަލަން ހަރާނެ ކަމަށްބުނެ ވޮލެޓާއި ހަ ރަން ފަށް އޭނާ ވަނީ ފޭރިގެންފައެވެ.