ކުޅުދުއްފުށީ ފަޅު ތެރެއިން ފެނުނު މީހާ އޮތީ މަރުވެފައި

ކުޅުދުއްފުށީ ފަޅު ތެރެއިން ހަބަރު ހުސްވެފައި އޮއްވައި ފެނުނު މީހާ އޮތީ މަރުވެފައި ކަމަށް އެ ސިޓީ ހޮސްޕިޓަލުން ބުނެފި އެވެ. 

ފުލުހުން ބުނި ގޮތުގައި ކުޅުދުއްފުށީ ފަޅު ތެރެއިން ހަބަރު ހުސްވެފައި އޮތް މީހަކު ފެނިގެން ސީނުގައި ފުލުހުންދަނީ ހަރަކާތްތެރިވަމުންނެވެ. އެކަމާ ގުޅޭ އިތުރު އެއްވެސް ތަފުސީލެއް ފުލުހުން ހާމަނުކުރެ އެވެ. 

ސޯޝަލް މީޑިޔާ ބައެއް ޕޭޖުތަކުގައި ކުޅުދުއްފުށީ ފަޅު ތެރެއިން ފެނުނު މީހާ ފެނުނުއިރުވެސް އޮތީ މަރުވެފައިކަމަށް ބުނެ ފޮޓޯތަކެއް އަންނަނީ ދައުރުވަމުންނެވެ. އެ ފޮޓޯތަކުން ފެންނަނީ ފަޅު ތެރޭގައި އޮތް މީހާ ނަގާ ތަނެވެ. 

ކުޅުދުއްފުށީ ހޮސްޕިޓަލުގެ މީޑިޔާ އޮފިޝަލުވަނީ އެމީހާ ހޮސްޕިޓަލަށް ގެނައިއިރުވެސް މަރުވެފައިވާކަން ކަށަވަރުކޮށްދީފަ އެވެ. މީޑިޔާ އޮފިޝަލު ވިދާޅުވި ގޮތުގައި އޭނާ ހޮސްޕިޓަލަށް ގެނައީ މިއަދު ހެނދުނު 8:38 ހާއިރު އެވެ. 

ފަޅު ތެރެއިން ފެނުނު މީހަކީ އުމުރުން 36 އަހަރުގެ ދިވެހި ފިރިހެނެއްކަމަށް ހޮސްޕިޓަލުން ބުނެފައިވެ އެވެ. 

ހޮސްޕިޓަލުން ބުނި ގޮތުގައި އޭނާގެ ހަށިގަނޑުން އެއްވެސް ޒަހަމެއް ފެންނަން ނެތެވެ. 

ކުޅުދުއްފުށީ ފަޅު ތެރެއިން ހަބަރު ހުސްވެފައިވާ މީހަކު ފެނިފައިވާކަން ހާމަކުރުމާއެކު ފުލުހުން ބުނެފައިވަނީ އިތުރު މައުލޫމާތު ލިބޭ މިންވަރަކުން އެ މައުލޫމާތު ހިއްސާކުރަމުންދާނެ ކަމަށެވެ.