ރަށް އިސްތިހާރު ކުރަން ކައުންސިލްތަކަށް ތައިލެންޑުގައި ޓޫރިޒަމް ފެއާއެއް

ރާއްޖޭގެ ކޮންމެ ރަށަކީ ވަކި މަންޒިލެވެ. ވަކި ހާއްސަ ސިފަތަކެއް ހުރި ތަންތަނެވެ. ނަމަވެސް އެ ރަށްތައް ވަކި މަންޒިލުތަކެއްގެ ގޮތުގައި އިސްތިހާރުކޮށް ޕްރޮމޯޓުކުރެވިފައިނުވެ އެވެ. ސަބަބަކީ ކައުންސިލްތަކަށް އެކަމަށް ފުރުސަތު ނެތުމެވެ. އެކަމަކު އަމިއްލަ ކުންފުންޏެއް ކަމަށްވާ މޯލްޑިވްސް އައިލެންޑް އެޑްވަޑައިޒިން (އެމްއައި އެޑްވަޑައިޒިން) އިން މިވަނީ ތައިލެންޑުގައި ކައުންސިލްތަކަށް ރަށްތައް އިސްތިހާރު ކުރަން އިވެންޓެއް ބާއްވަން ނިންމާފަ އެވެ. 

އެ ކުންފުނިން ބުނެފައިވާ ގޮތުގައި މި އިވެންޓަކީ ރާއްޖޭގެ ކައުންސިލްތަކަށް ހާއްސަކޮށްގެން ޑެސްޓިނޭޝަންގެ ގޮތުގައި ވަކިވަކި ރަށްތައް ބޭރު ދުނިޔޭގައި އިސްތިހާރު ކުރަން ފަށާ ހަރަކާތެކެވެ. މި އިވެންޓު ބާއްވަން ނިންމާފައިވަނީ ތައިލެންޑުގެ އެންމެ ގިނަ މީހުން ޖަމާވާ އެެއް ޝޮޕިން މޯލް ކަމަށްވާ ސެންޓްރަލް ވޯލްޑުގަ އެވެ. 

މި އިވެންޓު އޮންނަ ދުވަސް ވަރަކީ ތައިލެންޑުގައި އެންމެ ގިނަ ހަރަކާތްތައް ހިންގާ ޗައިނީސް ނިއު އިޔާ ފާހަގަކުރާ ދުވަސްވަރެވެ. އެހެންވެ ރާއްޖޭގެ އެފޯޑަބަލް ޓޫރިޒަމްގައި ހުރި ގިނަ ފުރުސަތުތަކެއް މި އިވެންޓު މެދުވެރިކޮށް ގިނަ ބަޔަކަށް އެނގިގެންދާނެ އެވެ. 

މި އިވެންޓު އިންތިޒާމު ކުރާ ކުންފުނިން ވަނީ ތައިލެންޑުގެ މީޑިއާގައި މި އިވެންޓް އިސްތިހާރުކޮށް ގިނަ އިންވެސްޓަރުންގެ ޝައުގުވެރިކަން މި އިވެންޓަށް އުފެދޭނެ ގޮތް ބަލައި އިންވެސްޓަރުންނާއި ކައުންސިލްތަކާ ގުޅުވާލަން ނިންމާފަ އެވެ. މި އިވެންޓް ކުރިއަށްދާއިރު ތައިލެންޑުގެ އިވެންޓް ޕާޓްނަރެއްގެ ގޮތުގައި ޑޫލައިން ހަރަކާތްތެރިވާނެ އެވެ. އިވެންޓު ބޭއްވުމަށްޓަކައި ސެންޓްރަލް ވޯލްޑާއެކު މިހާރު ވަނީ ސޮއިކޮށްފަ އެވެ.