ހަތަރުފުރޮޅުލީ އުޅަނދުތަކާ ޓޯކުރާ އުޅަނދުތަކަށް ބިމެއް ހަމަޖައްސައިފި

ހަތަރުފުރޮޅުލީ އުޅަނދުތަކާ ޓޯކުރާ އުޅަނދުތައް ބަހައްޓަން ހުޅުމާލެ އިން ބިމެއް ހަމަޖައްސައިފި އެވެ.

ޓްރާސްޕޯޓް މިނިސްޓްރީން ބުނި ގޮތުގައި ހުޅުމާލޭގައި ޓެކްސީތަކާއި ހަތަރު ފުރޮޅުލީ އުޅަނދުފަހަރު ޕާކުކުރުމަށް ހާއްސަ ކޮށްފައި ވަނީ ހުޅުމާލެ ސަހަރާ ކުރިމަތީ އޮތް ބިމެވެ. އެ ބިން ސާފުކޮށް މިހާރު ވަނީ ފަސްގަނޑު އެއްވަރުކޮށް ބިންހަމަ ކުރުމުގެ މަސައްކަތް ކޮށްފަ އެވެ.

ޓްރާސްޕޯޓް މިނިސްޓަރު މުހައްމަދު އަމީން މިއަދު ވިދާޅުވި ގޮތުގައި އެ ބިމުގައި ޕާކުކުރުމުގެ ފުރުސަތު ދެ ދުވަހެއްގެ ތެރޭގައި ހުޅުވާލާނެ އެވެ. މިނިސްޓަރު ވިދާޅުވި ގޮތުގަައި މިއީ މާލެ ސަރަހައްދު ގައި ދިމާވެފައިވާ ޓްރެފިކް ތޮއްޖެހުމާއި ޕާކިންގެ ދަތިކަން ހައްލުކުރުމަށްޓަކައި ޓްރާސްޕޯޓް މިނިސްޓްރީ އާއި ކަމާގުޅުން ހުރި އެހެނިހެން މުއައްސަސާތަކުން ކުރަމުންދާ މަސައްކަތުގެ ތެރެއިން ކުރަމުންދާ ކަމެވެ.

މިނިސްޓްރީން ބުނި ގޮތުގައި މިއީ 90،000 އަކަފޫޓުގެ ބިމެކެވެ. މިތަނުގެ އެއްބައި ހާއްސަ ކުރަނީ ހަތަރުފުރޮޅުލީ ވެހިކަލްތަކަށެވެ. އެ ގޮތުން 50،000 އަކަފޫޓް ވަނީ އެކަމަށް ހާއްސަކޮށްފަ އެވެ.

އަނެެއް 40،000 އަކަފޫޓް ބާއްވާނީ ޓޯކުރާ ވެހިކަލްތައް ބޭއްވުމަށެވެ.

ޓްރެފިކް ތޮއްޖެހުމާއި ޕާކިންގެ ދަތިކަން ހައްލުކުރުމަށްޓަކައި ގިނަ މަސައްކަތްތަކެއް ކުރަން ސަރުކާރުން ވަނީ ވައުދުވެފަ އެވެ. ނަމަވެސް މިހާތަނަށް އެކަށީގެންވާ ބޮޑު ކާމިޔާބެއް އަދި ނުހޯދެ އެވެ.