ހިރިމަރަދޫ ރައްޔިތުން ތުލުސްދޫއަށް ބަދަލުކޮށްދޭން އެދިއްޖެ

ހދ. ހިރިމަރަދޫގައި ދިރިއުޅޭ ރައްޔިތުން، ކ. ތުލުސްދޫއަށް ބަދަލުކޮށްދިނުމަށް އެރަށު ކައުންސިލުން އެދިއްޖެ އެވެ.

ހިރިމަރަދޫ ކައުންސިލުން މިއަދު ވަނީ ލޯކަލް ގަވަމެންޓް މިނިސްޓަރު އާދަމް ޝަރީފް އުމަރާ ބައްދަލުކުރައްވާފަ އެވެ. މި ބައްދަލުވުމާ ގުޅޭ މައުލޫމާތު ހިއްސާ ކުރައްވަމުން މިނިސްޓަރު "އެކްސް" ގައި ކުރެއްވި ޕޯސްޓެއްގައި ވިދާޅުވީ ހިރިމަރަދޫ ރައްޔިތުން އެހެން ރަށަކަށް ބަދަލުވުމަށް ނިންމާފައިވާ ކަމަށް ކައުންސިލް މެންބަރުން ވިދާޅުވެފައިވާ ކަމަށެވެ.

"ހދ. ހިރިމަރަދޫ ރައްޔިތުން އެހެން ރަށަކަށް ބަދަލުވުމަށް ރައްޔިތުން ނިންމާފައިވާ ކަމަށް މިއަދުގެ ބައްދަލުވުމުގައި ކައުންސިލްގެ މެންބަރުން ވިދާޅުވި، ރައްޔިތުން ބޭނުންވަނީ ކ. ތުލުސްދޫއަށްކަން ފާހަގަ ކުރެއްވި،" މިނިސްޓަރު ވިދާޅުވި އެވެ.

އެކަމާމެދު މިނިސްޓްރީން ވަކި ގޮތެއް ނިންމާފައިވާ ކަމެއް މިނިސްޓަރު ހާމައެއް ނުކުރައްވަ އެވެ.

ހިރިމަރަދޫގެ ރަޖިސްޓްރީގައި އޮތީ 584 މީހުންނެވެ. އެންމެ ފަހުން 2022 ވަނަ އަހަރު ނެގި ބޯހިމެނުމުން އެނގޭ ގޮތުގައި، އެރަށުގައި ދިރިއުޅެނީ 293 މީހުންނެވެ. އޭގެ ތެރެއިން ދިވެހިންނަކީ 260 މީހުންނެވެ. 

މިއީ ހދ. އަތޮޅުގައި މީހުން ދިރިއުޅޭ ރަށްތަކުގެ ތެރެއިން އެންމެ ކުޑަ ރަށެވެ.