އިކްރާމު މިނިވަންވުން: އިހުމާލުވި ބަޔަކަށް އެންމެ ފިޔަވަޅު އަޅާނެ، އަލުން ހައްޔަރު ކުރަނީ

ހުޅުމާލެ ދެ ވަނަ ފިޔަވަހީގައި ޖުލައި ފަހު ދުވަހު ހިނގި ނުރައްކާތެރި އެކްސިޑެންޓާއި ގުޅިގެން ހައްޔަރު ކުރި މީހުންގެ ތެރެއިން ކާރު ދުއްވަން އިން މީހާ ޝަރީއަތް ނިމެންދެން ބަންދު ކުރުމަށް ކުރި އަމުރުކުރި ބާތިލުކުރުމާއި ގުޅިގެން އެކަން ހިނގާ ދިޔަ ގޮތް ތަހުގީގުކޮށް އިހުމާލުވެފައިވާނަމަ އެންމެ ހަރުކަށި ފިޔަވަޅު އަޅާނެ ކަމަށް ހޯމް ލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެ އެވެ.

ހުޅުމާލެ ހިޔާ އަވަށް -- ވިނަރަސް ފްލެޓް ސަރަހައްދު ގައި އެކްސިޑެންޓް ހިނގީ ބާރު ސްޕީޑްގައި ދުއްވާފައި އައި ރޭސް ކާރެއް ކޮންޓްރޯލް ނުވެ އެވެ. އެނބުރެމުން އެނބުރެމުން އައި ރަތްކުލައިގެ އެ ކާރުން ޖެހުނީ އެވަގުތު މަގުގެ އެއް ފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގަ އެވެ.

އެކްސިޑެންޓްގައި އެމީހާ ވަރަށް ދުރަަށް ވިއްސައިގެންދިޔަ އެވެ. އޭނާ އިން ސައިކަލަށް ވެސް ބޮޑެތި ގެއްލުންވި އެވެ. އިހުމާލުން އަދި އެފަދަ ނުރައްކާތެރި އެކްސިޑެންޓެއް ހިނގުމުން ވެސް ކާރުގައި ތިބި މީހުން ވަނީ ކާރުދޫކޮށް ފިލާފަ އެވެ. މި މައްސަލައިގައި ކާރުގައި ތިބި ތިން މީހުން ހޯދުމަށްފަހު އެރޭ ފުލުހުން ވަނީ ހައްޔަރުކޮށްފަ އެވެ.

އެއީ، މ. ލޭންޑްއޮފްގާޑްން، އިބްރާހިމް އިކްރާމާއި ހ. ނޫރަންމާގެއާގޭ އިކްރާމުއްރަހުމާނާއި ގއ. ކަނޑުހުޅުދޫ އާޒާދު، ޖިނާހު އިސްމާއީލެވެ.

އެ ތިން މީހުންގެ ތެރެއިން އިކްރާމާއި އިކްރާމުއްރަހުމާނުގެ ބަންދާމެދު ގޮތެއް ނިންމަން ގެންދިޔައީ ކްރިމިނަލް ކޯޓަށެވެ. އެ ކޯޓުން ވަނީ ދެ މީހުން ޝަރީއަތް ނިމެންދެން ބަންދުކުރަން އަމުރުކޮށްފަ އެވެ. ޖިނާހު ގެންދިޔައީ ހުޅުމާލެ ކޯޓަށެވެ. އެކޯޓުން ވަނީ އޭނާ 15 ދުވަހަށް ބަންދު ކުރަން އަމުރުކޮށްފަ އެވެ.

ނަމަވެސް ބަންދުގެ މުއްދަތު ޖަހާފައިވަނީ ގާނޫނީ ވަކީލެއް ނެތި ކަމަށް ބުނެ އިކްރާމް ވަނީ މައްސަލަ ހައިކޯޓްގައި އިސްތިއުނާފު ކޮށްފަ އެވެ. ހައިކޯޓުން ވަނީ ކްރިމިނަލް ކޯޓުން ބަންދުގެ މުއްދަތު ކުރިއަށް ގެންގޮސްފައި ވަނީ ހައްގުތައް ނުދީ ކަމަށެވެ. އެހެން ކަމުން އެ ނިންމުން ވަނީ ބާތިލުކޮށްފަ އެވެ. އެ ނިންމުމާ އެކު އިކްރާމް ވަނީ މިނިވަންވެފަ އެވެ.

އިހުސާން ވިދާޅުވީ އެކަން ހިނގާ ދިޔަ ގޮތް ތަހުގީގު ކުރާނެ ކަމަށެވެ. އަދި އިހުމާލެއް ވެފައިވާނަމަ އެމީހަކަށް ނުވަތަ ބަޔަކަށް އެންމެ ހަރުކަށި ފިޔަވަޅު އެޅޭނެ ކަމަށެވެ. އަދި ވިދާޅުވީ އަކްރަމް އަލުން ހައްޔަރު ކުރުމަށް ކޯޓް އަމުރެއް ހޯދުމުގެ މަސައްކަތް ފުލުހުން ކުރަމުންދާ ކަމަށެވެ.