ހަތަރު ގައުމަކުން ރާއްޖެއަށް އައި ފަތުރުވެރިންގެ އަދަދު ލައްކައަކަށްވުރެ އިތުރުވެފައިވާއިރު، އެ ހުރިހާ ގައުމަކުން ނިމުނު އަހަރު އައި ފަތުރުވެރިންނަށްވުރެ މި އަހަރު އައި ފަތުރުވެރިންގެ އަދަދު އިތުރެވެ.
ހަތަރު ގައުމަކުން ރާއްޖެއަށް އައި ފަތުރުވެރިންގެ އަދަދު ލައްކައަކަށްވުރެ މަތިވެ، އެވެރެޖުކޮށް ދުވާލަކު ރާއްޖެއަށް އަންނަ ފަތުރުވެރިންގެ އަދަދު 6،000 އާ ގާތްކުރާ މިންވަރަށް އިތުރުވެއްޖެ އެވެ.
އޯގަސްޓު މަހުގެ 27 ވަނަ ދުވަހާ ހަމައަށް ރާއްޖެއަށް އައި ފަތުރުވެރިންގެ ތަފާސްހިސާބުތައް ޓޫރިޒަމް މިނިސްޓްރީން އާންމުކޮށްފައިވާއިރު، އޯގަސްޓު މަހުގެ އެއްވަނަ ދުވަަހުން ފެށިގެން 27 ވަނަ ދުވަހުގެ ނިޔަލަށް ޖުމްލަ 160،854 ފަތުރުވެރިން ރާއްޖެއަށް އައިސްފައިވެ އެވެ. އެއީ ފާއިތުވި އަހަރުގެ އެ މުއްދަތުގައި ރާއްޖެއަށް އައި 141،588 ފަތުރުވެރިންނާ އަޅަބަލާއިރު 13.6 އިންސައްތަ އިތުރު އަދަދެކެވެ.
އެ މުއްދަތުގައި ރާއްޖެއަށް އެވެރެޖުކޮށް 5،958 ފަތުރުވެރިން ޒިޔާރަތްކޮށްފައިވެ އެވެ. އަދި އެ މުއްދަތުގައި އައި ފަތުރުވެރިން އެވެރެޖުކޮށް 7.8 ދުވަސް ރާއްޖޭގައި ހޭދަކޮށްފައިވެ އެވެ.
އޯގަސްޓު މަހުގެ 27 ވަނަ ދުވަހުގެ ނިޔަލށް ހަތަރު ގައުމަކުން ރާއްޖެއަށް އައި ފަތުރުވެރިންގެ އަދަދު ލައްކައަކަށްވުރެ އިތުރެވެ. އެއީ ޗައިނާއާއި ރަޝިޔާއާއި އިނގިރޭސިވިލާތާއި އިޓަލީއެވެ. އެއިން ކޮންމެ ގައުމަކުން ލައްކައަކަށްވުރެ ގިނަ ފަތުރުވެރިން އައިސްފައިވާއިރު ޖަރުމަނުން އަންނަ ފަތުރުވެރިންގެ އަދަދުވެސް ލައްކައަކާ ގާތަށްވަނީ ގޮސްފަ އެވެ.
މި އަހަރު ރާއްޖެއަށް އެންމެ ގިނަ ފަތުރުވެރިން އަންނަ ޗައިނާގެ ފަތުރުވެރިންގެ އަދަދު ދެ ލައްކައާ ގާތަށް އިތުރުވެފައިވާއިރު ނިމުނު އަހަރުގެ އޯގަސްޓު މަހުގެ 27 އާ ހަމައަށް ރާއްޖެއަށް އައި ފަތުރުވެރިންގެ އަދަދަށްވުރެ މި އަހަރު އައި ފަތުރުވެރިންގެ އަދަދު 10.4 އިންސައްތަ އިތުރުވެފައިވެ އެވެ.
މި އަހަރަށް ސަރުކާރުން ކަނޑައަޅާާފައިވާ އަމާޒަކީ ޖުމްލަ 2 މިލިއަން ފަތުރުވެރިން ރާއްޖެއަށް ގެނައުމެވެ. އަހަރުގެ ފަހުކޮޅުގައި ފަތުރުވެރިން އަންނަ މިންވަރު އަހަރުގެ ފުރަތަމަ ތިން މަހާ އެއްވަރަށް އިތުރުވެއްޖެނަމަ އެ އަމާޒު ހާސިލުވާނެ އެވެ.