"ކަމަނާ" ގެ 15 ޝޯ ހައުސްފުލް، ޑިމާންޑް ބޮޑުވެ އޮންލައިންކޮށް ޓިކެޓް ވިއްކުން ހުއްޓާލައިފި

ސެޓާން ސްޓޫޑިއޯ އާއި ކިޑް ޕްރޮޑަކްޝަން ގުޅިގެން އުފެއްދި "ކަމަނާ" ގެ 15 ޝޯގެ ޓިކެޓް މުޅީން ވިއްކިއްޖެ އެވެ. މިއީ މި ފަހުން ދިވެހި ފިލްމަކަށް ލިބުނު އެންމެ ބޮޑު ތަރުހީބެވެ.

ރޭ ޕްރިމިއާ ކުރި ފިލްމާއި ގުޅޭގޮތުން ފިލްމުގެ ޕްރޮޑަކްޝަން ޓީމުން ބުނީ އަންނަ މަހުގެ 8 ވަަނަ ދުވަހުގެ ނިޔަލަށް ހުރިހާ ޓިކެޓެއް ވިކި ހުސްވެފައިވާ ކަމަށެވެ. އެއީ 15 ޝޯ ގެ ޓިކެޓެވެ.

ފިލްމުގެ ޓިކެޓް ހޯދަން ވަރަށް ގިނަ ބަޔަކު ދަނީ ފޯނު އަދި ވައިބާ މެދުވެރިކޮށް މެސެޖު ކުރަމުން ކަން ފާހަގަކޮށް ޕްރޮޑަކްޝަން ޓީމުން ބުނީ ހުރިހާ ކޯލުތަކާއި މެސެޖުތަކަށް އެޓެންޑްވާން ދަތި ކަމަށްވެ އޮންލައިން ޓިކެޓިން މެދުކަނޑާލާފައިވާ ކަމަށެވެ.

"އެހެންވީމަ އަޅުގަނޑުމެން އެދެނީ އޮލިމްޕަހުގެ ޓިކެޓް ކައުންޓަރަށް ވަޑައިގެން ޓިކެޓް ނެންގެވުމަށް. ސަޕޯޓަރުންްގެ ތަރުހީބަށް ހިފެހެއްޓުމެއް ނެތް ޝުކުރު ދަންނަވަން،" 

ޕްރޮޑަކްޝަން ޓީމުން ބުނީ "ކަމަނާ" ދެއްކުމަށް އެދި ގިނަ ރަށްތަކަކުން ގުޅަމުންދާ ކަމަށެވެ. އެހެން ކަމުން ފިލްމު އަޅުވަން ބޭނުންވާ ރަށްތަކަށް އެ ފުރުސަތު ފަހިކޮށްދޭން މަސައްކަތް ކުރަމުންދާ ކަމަށެވެ.

"ކަމަނާ" އަކީ ރާއްޖޭގައި އާންމުވެފައިވާ އިޖުތިމާއީ ބޮޑު މައްސަލައެއް ކަމުގައިވާ ގެވެށި އަނިޔާ ކުރުމާއި ދެކޮޅަށް މުޖުތަމައު ހޭލުންތެރިކުރުމުގެ ގޮތުން ހަގީގީ ހާދިސާ އަކަށް ބިނާކޮށް އުފައްދާފައިވާ ފިލްމެކެވެ. ފިލްމްގެ ޑައިރެކްޓަރަކީ ސަޒާ އާއި ދިލަކަނި ފަދަ ފިލްމްތައް ބެލުންތެރިންނާއި ހަމަޔަށް ގެނެސްދީފައިވާ ޒުވާން ޑައިރެކްޓަރު ހުސައިން މުނައްވަރެވެ.