ކުރީގެ ވެރިންނަށް ނައިބް ރައީސްގެ ހާއްސަ މެސެޖެއް

ރާއްޖޭގައި ކުރީން ވެރިކަން ކުރެއްވި ބޭފުޅުންނަށާއި އިސް މަގާމުތައް ފުރުއްވާފައިވާ ބޭފުޅުންނަށް ހާއްސަ މެސެޖެއް، ނައިބް ރައީސް ހުސެއިން މުހައްމަދު ލަތީފު ދެއްވައިފި އެވެ.

ނައިބް ރައީސް އިއްޔެ އެކްސްގައި ކުރެއްވި ޕޯސްޓެއްގައި ލިޔުއްވާފައި ވަނީ ކޮންމެ ކަމަކަށް ވެސް ވަގުތެއް އޮންނާނެ ކަމެވެ. އެ ވަގުތަށް އިހުތިރާމްކޮށް، ޝުކުރުވެރިވާން އެ ޕޯސްޓްގައި އަންގަވާފައިވެ އެވެ.

"ކޮންމެ ކަމަކީވެސް ވަގުތު ކަނޑައެޅިގެންވާ ކަމެކެވެ. އެއީ ދުނިޔޭގެ އާދައެވެ. އެ ލިބުނު ވަގުތަށް އިހުތިރާމުކޮށް ޝުކުރުވެރި ވުމުން ލިބޭ ގަދަރާއި، އުފާވެރިކަން މާ ރަނގަޅެވެ. އެއްވެސް ކަމަކީ ދާއިމަށް ތިމާގެ ހައްގެއް ކަމަށް ނުދެކޭށެވެ." ނައިބް ރައީސްގެ މެސެޖުގައިވެ އެވެ.

އެއީ ކޮން ކަމަކާ ގުޅިގެން ލިޔުއްވި މެސެޖެއްތޯ ގިނަ ބަޔަކު ސުވާލު އުފައްދާފައި ވަނިކޮށް، އެމަނިކުފާނު ވަނީ އެ މެސެޖުގެ މާނަ ވިދާޅުވެ ދެއްވާފަ އެވެ. އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ އެ މެސެޖަކީ ކުރިން ވެރިކަން ކުރެއްވި ބޭފުޅުންނާއި ދައުލަތުގެ އިސް މަގާމުތައް ފުރުއްވި ބޭފުޅުންނަށް ރައްދުކޮށް ދެއްވި މެސެޖެއް ކަމަށެވެ.

ނައިބް ރައީސް ވިދާޅުވީ އެ ބޭފުޅުންނަކީ ރައްޔިތުން ނިންމާފައިވާ ވަކި މުއްދަތަކަށް މަސްއޫލިއްޔަތު އަދާކުރައްވަން ޖެހިވަޑައިގަންނަވާ ބޭފުޅުން ކަމަށެވެ.

"އެ މުއްދަތު ހަމަވުމުން އެކަމަށް އިހުތިރާމް ނުކުރުމަކީ ރައްޔިތުންގެ ނިންމުމަށް އިހުތިރާމް ކުޑަކޮށް، އެނިންމުމަށް ގޮންޖެހުން ކަމުގައި ގަބޫލުކުރަން. އެފަދަ ބޭފުޅުން ކުރިއަށް އޮތް ތަނުގައިވެސް ޒިންމާދާރުކަމާއެކު ސަރުކާރު ޖަވާބުދާރީކޮށް، ރައްޔިތުންގެ ލޯތްބާއި އިހުތިރާމް ލިބޭ ގޮތަށް މަސައްކަތް ކުރިއަށް ގެންދަވާނެ ކަމަށް އުންމީދު ކުރަން،" ނައިބް ރައީސް ވިދާޅުވެފައިވެ އެވެ.

ނައިބް ރައީސް މި ޕޯސްޓް ކުރައްވާފައިވާއިރު، މިދިޔަ ބުރާސްފަތި ދުވަހުގެ ރޭ ޕްރޮސެކިއުޓާ ޖެނެރަލްގެ މަގާމުން ހުސެއިން ޝަމީމް ވަނީ ރައްޔިތުންގެ މަޖިލީހުން ވަކިކޮށްފަ އެވެ. އެކަމާ ގުޅިގެން އިދިކޮޅުން ސަރުކާރަށް ފާޑުކިޔަމުންދާއިރު، ސަރުކާރަށް ސަޕޯޓް ކުރާ ފަރާތްތަކުން ދަނީ އެ ނިންމުމަށް މަރުހަބާ ކިޔަމުންނެވެ.