މެންބަރުން ޗުއްޓީއަށް؛ 33 ޖަލްސާ، 82.9 ޕަސެންޓް މަސައްކަތް ނިންމި

ރައްޔިތުންގެ މަޖިލީހުގެ މި ދައުރު ނިންމުމަށް ފަހު މަޖިލީސް މެންބަރުންގެ ޗުއްޓީ މިރޭ ފަށައިފި އެވެ.

މަޖިލީސް މެންބަރުންގެ ޗުއްޓީ އޮކްޓޫބަރު މަހުގެ ފުރަތަމަ ދުވަހުގެ ނިޔަލަށް ދެމިގެންދާނެ އެވެ.

މި ދައުރުގެ ފަހު ޖަލްސާ މިރޭ ވަނީ ބާއްވާފަ އެވެ. ޖަލްސާގެ ރިޔާސަތު ބެލެހެއްޓެވީ ނާއިބު ރައީސް އަހްމަދު ނާޒިމެވެ. ޖަލްސާ ނިންމާލަމުން ނާޒިމް ވިދާޅުވީ މި ދައުރު ގައި 33 ޖަލްސާ ބޭއްވުނު ކަމަށެވެ. ޖަލްސާތަކު ގައި 75 ގަޑިއިރު ހޭދަވި ކަމަށެވެ.

އަދި ކޮމެޓީ ބައްދަލްވުންތަކުގެ އަދަދު 233 އަށް އަރާ ކަމަށް ވިދާޅުވި އެވެ. ކޮމެޓީ މަސައްކަތު ގައި މެންބަރުން ވަނީ 190 ގަޑިއިރާއި 29 މިނެޓް ހޭދަކޮށްފަ އެވެ. 

މެންބަރުން މިރޭ ޗުއްޓީ ފަށަނީ މި ދައުރަށް ހުށައެޅުނު މަސައްކަތްތަކުގެ ތެރެއިން 82.9 ޕަސެންޓް މަސައްކަތް ނިންމުމަށް ފަހު ކަމަށް ވެސް ނާޒިމް ވިދާޅުވި އެވެ. އަދި ވިދާޅުވީ މި ދައުރުގައި މުހިންމު މަސައްކަތްތަކެއް ކޮށްފައިވާ ކަމަށެވެ.

އާ ދައުރު ފެށޭނީ އޮކްޓޫބަރު މަހުގެ އެއްވަނަ ދުވަހު ކަމަށާ ފުރަތަމަ ޖަލްސާ އެ މަހުގެ ތިނެއް ނުވަތަ ހަތެއް ގައި ބާއްވާނެ ކަމަށް ވިދާޅުވި އެވެ.