ޖުޑީޝަރީ ކޮމިޓީން ސިއްރުކުރި އަޑުއެހުމުގެ ވާހަކަތައް ލީކުވެއްޖެ

ޕްރެސެކިއުޓާ ޖެނެރަލް ހުސައިން ޝަމީމު ވަކިކުރުމަށް ރައްޔިތުންގެ މަޖިލީހަށް ހުށަހަޅާފައިވާ މައްސަލައާ ގުޅިގެން ޖަވާބުދާރީވެވަޑައިގަތުމަށް އޭނާ ހާޒިރުކޮށްގެން ކުރިއަށްގެންދިޔަ ޖުޑީޝަރީ ކޮމިޓީގެ ބައްދަލުވުން ސިއްރުކޮށްފައިވަނިކޮށް އެ ބައްދަލުވުމުގައި ދެކެވުނު ވާހަކަތައް ލީކުވެއްޖެ އެވެ. 

އެ ބައްދަލުވުން ސިއްރުކުރުމަށްފަހު ބައްދަލުވުން ލައިވްކުރުން ހުއްޓައިލުމުން އެއްވެސް މީޑިއާއަކަށް ބައްދަލުވުމުގައި ދެކެވުނު ވާހަކަތައް އިވިފައިނުވެ އެވެ. އެހެންނަމަވެސް ޝަމީމު ކޮމިޓީގައި ދެއްކެވި ބައެއް ވާހަކަފުޅުތައް އޮންލައިން ބައެއް މީޑިޔާއިން ވަރަށް ތަފުސީލުކޮށް ރިޕޯޓުކޮށްފައިވެ އެވެ. 

އެ މައްސަލައާ ގުޅިގެން ޖުޑީޝަރީ ކޮމިޓީގެ މުގައްރިރު އަދި މަނަދޫ ދާއިރާގެ މެންބަރު ހުސްނީ މުބާރަކާ "މިރާ"އިން ދެންނެވި ސުވާލަކަށް ޖަވާބުދެއްވަމުން ވިދާޅުވީ ކޮމިޓީގައި ދެކެވުނު ވާހަކަތައް ބައެއް މީޑިޔާއިން ވަރަށް ތަފުސީލުކޮށް ރިޕޯޓުކޮށް، ޝަމީމުގެ ވާހަކަފުޅުތައް ކޯޓުކޮށްފައި ހުރިކަން ސަމާލުކަމަށް އައިސްފައިވާ ކަމަށެވެ. 

އިތުރަށް ހުސްނީ ވިދާޅުވީ އެ މައްސަލަ ބައްލަވާނެ ކަމަށެވެ. ނަމަވެސް ބައްލަވާނެ ގޮތެއް ވިދާޅުނުވެ އެވެ. 

މިއަދުގެ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިތުރަށް ޕީޖީ ޝަމީމުވެސް ބައްދަލުވުމުގައި ފޯނު ބޭނުންކުރެެއްވިކަން ކޮމިޓީގައި ހިމެނިވަޑައިގަންނަވާ މެންބަރު "މިރާ"އަށް ކަށަވަރުކޮށްދެއްވާފައިވެ އެވެ. 

މިއަދު ކޮމިޓީގައި ޝަމީމުވަނީ އޭނާއަށް އަމާޒުވާ ހުރިހާ ތުހުމަތުތަކެއް ދޮގުކުރައްވާފަ އެވެ. އަދި އޭނާ ވަކިކުރަން އުޅެނީ ނުފޫޒު ނުފޯރުވޭތީ ކަމުގައި ޝަމީމު ވިދާޅުވެފައިވެ އެވެ. އޭގެ އިތުރަށް ވަކިވަކި ތުހުމަތުތަކަށްވެސް އޭނާވަނީ ތަފުސީލުކޮށް ޖަވާބު ދެއްވާފަ އެވެ. 

ޝަމީމުގެ ވާހަކަފުޅުތަކަށްފަހު ކޮމިޓީން ފާސްކޮށްފައިވަނީ އޭނާ މަގާމުން ވަކިކުރުމަށެވެ. އަދި މިރޭ އޮންނަ 20 ވަނަ މަޖިލީހުގެ ފުރަތަމަ ދައުރު ނިންމާ ޖަލްސާގައި ޝަމީމު މަގާމުން ވަކިކުރުމުގެ މައްސަލަ ކުރިއަށްގެންދާނެ އެވެ.