އޯއައިސީގެ ފިގުހު އެކަޑަމީގެ މެންބަރުކަން ޑރ.ޝަހީމަށް

އިސްލާމީ ދައުލަތްތައް ޝާމިލުވާ އެންމެ ބޮޑު ބައިނަލްއަގުވާމީ ޖަމްއިއްޔާ ކަމުގައިވާ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ފިގުހު އެކަޑެމީގެ މެންބަރުކަމަަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ހަމަޖައްސައިފި އެވެ. 

އޯއައިސީގެ ފިގުހު އެކަޑެމީއަކީ އެއިރެއްގައި އިސްލާމީ އުންމަތަށް ކުރިމަތިވާ ބޮޑެތި މައްސަލަތަކާއި، މުޅިން އަލށް އުފެދޭ ތަފާތު އެކި ކަންކަމާ ގުޅޭ ގޮތުން އިސްލާމީ ފިގުހުގެ އަލީގައި މުސްލިމުން އަމަލުކުރަންވީ ގޮތްތަކާ ގުޅޭ ފަތުވާތައް ނެރޭ އެކަޑެމީއެކެވެ. 

އެ އެކަޑެމީގައި މީގެ ކުރިންވެސް ދިވެހި ބައެއް އިލްމުވެރިން ހިމެނިވަޑައިގެންފައިވެ އެވެ. އެގޮތުން ކުރީގެ ރައީސް އަލްއުސްތާޛު މައުމޫން އަބްދުލްގައްޔޫމާއި ކުރީގެ އުއްތަމަފަނޑިޔާރު ފާޟީލަތުއް ޝައިހު މުހައްމަދު ރަޝީދު އިބްރާހީމްވަނީ އެ އެކަޑަމީގެ މެންބަރުކަން ކުރައްވާފަ އެވެ. 

ޑރ.ޝަހީމު އޯއައިސީގެ ފިގުހު އެކަޑެމީގެ މެންބަރުކަމަށް އައްޔަންކުރީ އެ އެކަޑެމީގެ އިދާރީ ބައްދަލުވުމެއްގައި މި މަހުގެ އަށްވަނަ ދުވަހު ނިންމައިގެންނެވެ. 

އޭގެ އިތުރަށް ފާއިތުވި އޭޕްރީލު މަހުގައި މުސްލިމު ވޯލްޑް ލީގުގެ އެންމެ މަތީ މަޖިލީހުގެ މެންބަރުގެ މަގާމަށްވެސް ޑރ.ޝަހީމުވަނީ އައްޔަންކޮށްފަ އެވެ. 

މީގެ ކުރިން ޑރ.ޝަހީމުވަނީ އޯއައިސީގެ ބައެއް މަގާމުތައް އަދާކުރައްވާފަ އެވެ. އެގޮތުން އެ ޖަމްއިއްޔާގެ ސެކްރެޓަރީ ޖެނެރަލްގެ އެޑްވައިޒަރުކަމާއި އެ ޖަމްއިއްޔާއިން ހިންގާ ވޮއިސް އޮފް ވިސްޑަމް ސެންޓަރުގެ އެންމެ އިސްވެރިޔާގެ މަގާމު ޝަހީމު އަދާކުރެއްވި އެވެ. 

ޝަހީމަކީ ދުނިޔޭގެ އެންމެ ނުފޫޒުގަދަ 500 މުސްލިމުންގެ ލިސްޓުގައި މިހާތަނަށް ހިމެނިވަޑައިގެންނެވި ހަމައެކަނި ދިވެހި ޝަހުސިއްޔަތެވެ. ތަފާތު ދެ ފަހަރެއްގެ މަތިން އޭނާއަށް އެ ދަރަޖަ ލިބިވަޑައިގެންފައިވެ އެވެ.