ރާއްޖޭގެ އިގުތިސާދީ ސްޓްރެޓެޖީ އޮތީ ޑިމޮކްރަސީއާއި ދެމެހެއްޓެނެވި ތަރައްގީއާ ލާމެހިފައި: އަބްދުއްރަހީމް

ދިވެހިރާއްޖޭގެ އިގުތިސާދީ އިސްތިރާޖިއްޔާ ލާމެހިފައި ވަނީ ދިވެހި ދައުލަތުން ބަލައިގަނެފައިވާ ޑިމޮކްރެޓިކް އަގު ކުރުންތަކާއި ދެމެހެއްޓެނެވި ތަރައްގީގެ އުސޫލުތަކާ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ. 

އަބްދުއްރަހީމް މިފަދައިން ވިދާޅުވީ ޗައިނާގެ ގާނޫނު ހަދާ މަޖިލީހާއި އިންޓަ-ޕާލިމަންޓަރީ ޔޫނިއަން ގުޅިގެން ތަރައްގީވަމުން އަންނަ ގައުމުތަކުގެ ބަރުލަމާނުތަކުން ދެމެހެއްޓެނެވި ތަރައްގީގެ އަމާޒުތައް ހާސިލުކުރުމަށް ކުރަމުން އަންނަ މަސައްކަތްތަކާ ގުޅޭ ބެއިޖިންގައި ކުރިއަށްގެންދާ ސެމިނާގައި އިނގިރޭސި ބަހުން ދެއްވި ތަގުރީރެއްގަ އެވެ. 

އެމަނިކުފާނު ފާހަގަކުރެއްވީ ބަވަނަވެފައިވާ އިގުތިސާދީ ތަރައްގީގައި ހުރިހާ ގައުމެއްގެ ޝާމިލުވުން ކަށަވަރުކުރުމަށް ސްޓްރެޓެޖީތައް އެކުލަވައިލާއިރު ކޮންމެ ގައުމެއްގެ ތަރައްގީގެ ދަތުރަކީ ހާއްސަ ތަފާތު ދަތުރެއްކަން ގަބޫލުކުރަން ޖެހޭ ކަމަށެވެ. 

އެގޮތުން ރާއްޖެއަށް ކުރިމަތިވެފައިވާ ގޮންޖެހުންތަކާއި ރާއްޖެއަށް ލިބިފައިވާ ތަރައްގީގެ ފުރުސަތުތައްވެސް އެހެން ގައުމުތަކާ ތަފާތުކަން އަބްދުއްރަހީމް ފާހަގަކުރެއްވި އެވެ. އަދި ރާއްޖޭގެ ތަރައްގީގެ ސްޓްރެޓެޖީ ގުޅިފައިވަނީ ރާއްޖޭގެ ޑިމޮކްރެޓިކް އަގުކުރުންތަކާއި ދެމެހެއްޓެނެވި ތަރައްގީއާކަން އެމަނިކުފާނު ފާހަގަކުރެއްވި އެވެ. 

މަޖިލީހުގެ ރައީސްގެ ވާހަކަފުޅުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރިން ދައްކަވާފައިވާ ވާހަކަފުޅަކަށް ހަވާލާދެއްވައި ފާހަގަކުރެއްވި ރާއްޖެއިން ދެމެހެއްޓެނެވި ތަރައްގީއަށް ދޭ އަހަންމިއްޔަތު އެހެން ގައުމުތަކާ ގުޅިގެން ކުރާ މަސައްކަތްތަކުން، ހާއްސަކޮށް ޗައިނާއާ ގުޅިގެން ކުރިއަށް ގެންގޮސްފައިވާ މަސައްކަތްތަކުން ފެނިފައިވާ ކަމަށެވެ. 

އަދި ޗައިނާގައި އޮތް ޗައިނާ-ސައުތު އޭޝިޔާ އެކްސްޕޯގައި ދިވެހިރާއްޖޭގެ ގާނޫނު ހަދާ މަޖިލީހުގެ ނައިބުރައީސް އަހްމަދު ނާޒިމު ބައިވެރިވެވަޑައިގެންނެވިކަމަށާއި، އެމަނިކުފާނު އެ އެކްސްޕޯގައި ބައިވެރިވެވަޑައިގަތުމުން އިގުތިސާދީ މުހިއްމު މަޝްވަރާތަކެއް ކުރިއަށް ގެންދެވިފައިވާ ކަމަށް އަބްދުއްރަހީމް ވިދާޅުވި އެވެ. 

ޝާމިލުވަނިވި އިގުތިސާދީ ބަވަަނަވުމަކަށްޓަކައި ގައުމަތައް ގުޅިގެން މަސައްކަތްކުރުމާއި، ދެމެހެއްޓެނެވި ތަރައްގީގެ މުހިއްމުކަން ފާހަގަކުރައްވަމުން އަބްދުއްރަހީމް ވިދާޅުވީ ޗައިނާއާއި އެހެނިހެން ގައުމުތަކާ ގުޅިގެން ކުރިއަށް އޮތް ތަނުގައި މަސައްކަތްކުރަން ރާއްޖެއިން ބޭނުންވާ ކަމަށެވެ. 

ސެމިނާގައި ބައިވެރިވި ގައުމުތަކުގެ ވަފުދުތަކަށް ޗައިނާއިން އަދާކުރި މެހެމާންދާރީއަށް ޝުކުރު އަބްދުއްރަހީމް ޝުކުރު އަދާކުރެއްވި އެވެ.