ހުރިހާ ބޭންކްތަކާއި ގަވަރުނަރު ބައްދަލުކުރައްވައިފި

ގަވަރުނަރު އަހުމަދު މުނައްވަރު ރާއްޖޭގެ ހުރިހާ ބޭންކްތަކާއި ބައްދަލު ކުރައްވައިފި އެވެ.

ގަވަރުނަރު ބައްދަލުކުރެއްވި ބޭންކްތަކުގެ ތެރޭގައި ބޭންކް އޮފް މޯލްޑިވްސް، މޯލްޑިވްސް އިސްލާމިކް ބޭންކް، ސްޓޭޓް ބޭންކް އޮފް އިންޑިއާ، ބޭންކް އޮފް ސިލޯން، މޮރޭޝަސް ކޮމާޝަލް ބޭންކް، ކޮމާޝަލް ބޭންކް އޮފް މޯލްޑިވްސް، ހަބީބް ބޭންކް އަދި އެޗްއެސްބީސީ ހިމެނެ އެވެ. 

އެމްއެމްއޭ އިން ބުނީ މި ބައްދަލުވުން ތަކުގައި ބޭންކްތަކާއި އޮންނަ ގުޅުން މިހާރަށްވުރެ ރަނގަޅު ކުރުމަށާއި މާލީ ދާއިރާގެ ތަރައްގީއަށް ގުޅިގެން މަސައްކަތްކުރުމަށް މަޝްވަރާކޮށްފައިވާ ކަމަށެވެ.

ރާއްޖޭގެ މާލީ ދާއިރާއަށް ވަރަށް ބޮޑު ކުރިއެރުމެއް ގެނެސްދޭން މަސައްކަތް ކުރައްވާނެ ކަމަށް ރައްޔިތުންގެ މަޖިލީހުގެ މާލިއްޔަތު ކޮމިޓީގައި މުނައްވަރު ވަނީ ވިދާޅުވެފަ އެވެ. އަދި ޖީޑީޕީގެ ނިސްބަތުން މިހާރު މާލީ ދާއިރާއަކީ ހަ ޕަސެންޓް ކަމަށާއި އަމާޒަކީ ފަސް އަހަރުގެ ތެރޭގައި އެ އަދަދު ދެ ގުނަ ކުރުންކަމަށް ވެސް މުނައްވަރު ވަނީ ވިދާޅުވެފަ އެވެ. 

ގަވަރުނަރުގެ މަގާމަށް ވަޑައިގެން ރާއްޖޭގެ އިގްތިސޯދީ އަދި މާލީ ހާލަތު ރަނގަޅު ކުރުމަށް މުނައްވަރު ދަނީ އެކި ފަރާތްތަކާއި ގުޅިގެން މަސައްކަތް ކުރައްވަމުންނެވެ. ގަވަރުނަރުގެ މަގާމަށް މުނައްވަރު އައްޔަން ކުރެވުނީ މިދިޔަ ޖުލައި މަހުގެ 31 ވަނަ ދުވަހު އެވެ.