ރާއްޖޭގެ ސަލާމަތީ ކަންކަން ބަލަހައްޓަން ގެންނަ ތަކެތިން ޑިއުޓީ މައާފުކޮށްފި

ރާއްޖޭގެ ސަލާމަތީ ކަންކަން ބަލަހައްޓަން ގެންނަ ތަކެތިން ޑިއުޓީ މައާފު ކުރަން ސަރުކާރުން ނިންމައިފި އެވެ.

ރައީސުލްޖުމްހޫރިއްޔާ އަށް ލިބިދޭ އިހްތިޔާރުގެ ދަށުން، އިމްޕޯޓް ޑިއުޓީ މައާފުކުރުމާއ، އިމްޕޯޓް ޑިއުޓީ މައާފުކުރުމުގައި ޢަމަލުކުރާނެ އުސޫލުގެ ދެވަނަ މާއްދާ އަށް ގެނައި އިސްލާހާއެކު ރާއްޖެއަށް އެތެރެކުރާ ޑިއުޓީ މައާފު ކުރެވޭ ތަކެތީގެ ލިސްޓަށް ވަނީ އިތުރު ބާވަތްތަކެއް އިތުރުކޮށްފަ އެވެ.

ސަރުކާރުން ދަނީ ރާއްޖޭގެ ސަލާމަތީ ކަންކަމުގައި ބޭނުން ކުރަން ދިވެހި އަސްކަރީއާއަށް ޒަމާނީ ވަސީލަތް ހޯދަން މަސައްކަތް ކުރަމުންނެވެ. މިގޮތުން ސިފައިންގެ ބޭނުންތަކަށް ސަރަހައްދު ބަލަހައްޓަން މިހާރު ޑްރޯންގެ ބޭނުން ކުރެ އެވެ. މިއީ ދުނިޔޭގައި މިވަގުތު ހުރި އެންމެ ޒަމާނީ އެއް ޑްރޯން ކަމަށްވާ ތުރުކީގެ އުފެއްދުމެކެވެ. 

މިގޮތުން ގެނައި ބަދަލާއެކު ދިވެހިރާއްޖޭގެ ރައްޔިތުންގެ ސަލާމަތާއި ރައްކައުތެރިކަން ކަށަވަރުކުރުމުގެ ކަންކަން ބެލެހެއްޓުމަށް ޓަކައ،ި ސަލާމަތީ ހިދުމަތް ތަކުން ބޭނުންކުރުމަށް ރާއްޖެ އެތެރެކުރާ ތަކެތިން ވަނީ ޑިއުޓީ މައާފު ކުރަން ނިންމާފަ އެވެ. 

ރާއްޖެއަށް އެތެރެކުރާ މުދަލަށް ޑިއުޓީ ނަގައިގެން ދައުލަތަށް ކޮންމެ އަހަރުވެސް އެތައް މިލިއަން ރުފިޔާއެއް ލިބެ އެވެ. ޑިއުޓީ ނަގާ ލިސްޓުން އާއްމު ބޭނުންތަކާއި ބައެއް ޕްރޮޖެކްޓްތަކަށް ގެންނަ ތަކެތިން ޑިއުޓީ މައާފުކޮށް ދިނުމަކީ އާއްމުކޮށް ކުރާ ކަމެކެވެ.