މި އަހަރުގެ މިހާތަނަށް 1.2 މިލިއަން ފަތުރުވެރިން ރާއްޖެއަށް އައިސްފައިވާއިރު މި މަހުގެ ފުރަތަމަ 13 ދުވަހު އެވެރެޖުކޮށް ދުވާލަކު 6،536 ފަތުރުވެރިން ރާއްޖެއަށް އައިސްފައިވެ އެވެ.
ރާއްޖެއަަށް އެންމެ ގިނައިން ފަތުރުވެރިން ޒިޔާރަތްކުރާ ޔޫރަޕުގެ ގައުމުތަކުގެ ތެރޭގައި ހިމެނޭ އިޓަލީއާއި ޖަރުމަނުން ރާއްޖެއަށް އަންނަ ފަތުރުވެރިންގެ އަދަދު ލައްކައަކާ ކައިރިވެއްޖެ އެވެ.
ޓޫރިޒަމް މިނިސްޓްރީން މިމަހުގެ 13 ވަނަ ދުވަހު އާންމުކޮށްފައިވާ ތަފާސްހިސާބުތަކަށް ބަލާއިރަށް ޖަނަވަރީ އެއްވަނަ ދުވަހުން ފެށިގެން އޯގަސްޓު 13 ވަނަ ދުވަހުގެ ނިޔަލަށް ތިން ގައުމަކުން ލައްކައަކަށްވުރެ ގިނަ ފަތުރުވެރިން ރާއްޖެއަށް އައިސްފައިވެ އެވެ.
ފަތުރުވެރިކަމާ ބެހޭ ވުޒާރާއިން އާންމުކުރި ހިސާބުތަކަށް ބަލާއިރަށް މި އަހަރުގެ މިހާތަނަށް އިޓަލީން 93،153 ފަތުރުވެރިން ރާއްޖެއަށް އައިފައިވެ އެވެ. ޖަރުމަންވިލާތުން 90،336 ފަތުރުވެރިން އައިސްފައިވެ އެވެ، މި އަހަރު ހަތަރުވަނައަށް އެންމެ ގިނައިން ފަތުރުވެރިން ރާއްޖެއަށް އައީ އިޓަލީންނެވެ. ފަސްވަނައަށް ޖަރުމަނުންނެވެ.
މި އަހަރުގެ މިހާތަނަށް 1.2 މިލިއަން ފަތުރުވެރިން ރާއްޖެއަށް އައިސްފައިވާއިރު މި މަހުގެ ފުރަތަމަ 13 ދުވަހު އެވެރެޖުކޮށް ދުވާލަކު 6،536 ފަތުރުވެރިން ރާއްޖެއަށް އައިސްފައިވެ އެވެ. މި އަހަރުގެ މިހާތަނަށް އެވެރެޖުކޮށް ކޮންމެ ދުވަހު އައީ 5،607 ފަތުރުވެރިންނެވެ.
މި އަހަރުގެ މިހާތަނަށް ރާއްޖެއަަށް ޒިޔާރަތްކުރި ފަތުރުވެރިންގެ އަދަދު ފާއިތުވި އަހަރާ އަޅާބަލާއިރު 10.4 އިންސައްތަ އިތުރެވެ. އެވެރެޖުކޮށް ރާއްޖެއަށް އަންނަ ފަތުރުވެރިން އަންނަނީ 7.7 ދުވަސް ރާއްޖޭގައި ހޭދަކުރަމުންނެވެ.