އަމިއްލަ ފަރާތްތަކުގެ ބިން ހިއްކުމުގެ މަޝްރޫއުތަކުން ފީއެއް
ބެލެވޭ ގޮތުގައި އަންނަ އަހަރުން ފެށިގެން މި ފީ ތައާރަފު ކުރާނެ އެވެ. މި ފީ ނަގާނީ އަމިއްލަ ފަރަތްތަކުން ހިންގާ މަޝްރޫއުތަކުންނެވެ،
އަމިއްލަ ފަރާތްތަކުން ރާއްޖޭގައި ހިންގާ ބިން ހިއްކުމުގެ މަޝްރޫއު ތަކުން އަންނަ އަހަރުން ފެށިގެން ބަޖެޓަށް އާމްދަނީ ހޯދަން ފީއެއް ނަގަން ފަށަން ތައްޔާރު ވެއްޖެ އެވެ.
"މިރާ" އަށް އެނގިފައިވާ ގޮތުގައި އަންނަ އަހަރު ދައުލަތަށް އާމްދަނީ ހޯދަން ތައަރަފުކުރާ ކަންތައްތަކުގެ ތެރޭގައި ބިން ހިއްކުމުގެ މަޝްރޫއުތަކުން ފީއެއް ނެގުން ވެސް ހިމެނެ އެވެ. ނަމަވެސް ފީގެ ގޮތުގައި ނަގާނެ މިންވަރާއި އެކަން ކުރާނެ ގޮތެއް އަދި އާއްމުކޮށްފައެއް ނެތެވެ. އެ މަސައްކަތް ފިނޭންސް މިނިސްޓްރީން ވަނީ ފަށާފަ އެވެ.
މިހާރު ވެސް ރާއްޖޭގައި އަމިއްލަ ގިނަ ފަރާތް ތަކުން ދަނީ ބިން ހިއްކުމުގެ ގިނަ މަޝްރޫއު ތަކެއް ހިންގަމުންނެވެ.
މި މަޝްރޫއުތަކުގެ ތެރޭގައި ގިނައިން ހިމެނެނީ ޓޫރިޒަމާ ގުޅުންހުރި މަޝްރޫއުތަކެވެ. މިގޮތުން ރިސޯޓް ތަރައްގީ ކުރުމުގެ ގިނަ މަޝްރޫއު ތަކެއް ވެސް ހިމެނެ އެވެ. މީގެ އިތުރުން ކޮންމެ އަހަރަކު ވެސް ރާއްޖޭގައި ހިނގާ ރިސޯޓްތަކުގެ ބީޗްތައް ބޮޑު ކުރުންފަދަ ގިނަ މަސައްކަތް ތަކެއް ވެސް ކުރެ އެވެ.
ފިނޭންސް މިނިސްޓްރީން ދަނީ އަންނަ އަހަރަށް ލަފާކުރާ ބަޖެޓު ތައްޔާރު ކުރުމުގެ މަސައްކަތް ކުރަމުންނެވެ. މިގޮތުން މިހާރުގެ އަންދާޒާ ދައްކާ ގޮތުގައި އަންނަ އަހަރު ދައުލަތަށް ހިލޭ އެހީއާއި އާމްދަނީގެ ގޮތުގައި 35.9 ބިލިއަން ރުފިޔާ ލިބޭނެ އެވެ.
ކޮމެންޓް
Republic of Maldives