އިންޑިޔާއާއި ދިވެހިރާއްޖޭގެ ދެމެދުގައި އޮތް ގުޅުމުގެ ތެރެއިން ލިބޭ ތަރައްގީގެ ދީލަތި އެހީތަކުންނާއި އިންސާނީ ވަސީލަތް ތަރައްގީކުރުމުގެ ދާއިރާއިން އިންޑިޔާއިން ދޭ އެހީން ދިވެހި ރައްޔިތުންނަށް މަންފާކުރަމުންދާ ކަމުގައި ޝާހިދު ވިދާޅުވި
އިންޑިޔާގެ މިނިވަންދުވަހުގެ ތަހުނިޔާ އަރިސްކުރެއްވުމާއެކު އެގައުމަކީ ހުރިހާ މޫސުމެއްގައި ރާއްޖޭގެ އެކުވެރިޔާކަމަށް ކުރީގެ ހާރިޖީވަޒީރު އަދި އިދިކޮޅު އެމްޑީޕީގެ ރައީސް އަބްދުﷲ ޝާހިދު ފާހަގަކުރައްވައިފި އެވެ.
މިއަދު ފާހަގަަކުރާ އިންޑިޔާގެ މިނިވަންދުވަހުގެ މުނާސަބަތާ ގުޅިގެން އެކްސްގައި ކުރެއްވި ޕޯސްޓެއްގައި ޝާހިދުވަނީ އިންޑިޔާގެ ބޮޑުވަޒީރު ނަރެންދުރަ މޯދީއާއި އެ ގައުމުގެ ހާރިޖީވަޒީރު ޑރ.ސުބްރަމާނިޔަމް ޖައިޝަންކަރަށް ދުވަހުގެ ތަހުނިޔާ ވިދާޅުވެފަ އެެވެ.
އިންޑިޔާ ސަރުކާރާއި އެ ގައުމުގެ ރައްޔިތުންނަށް ތަހުނިޔާ ވިދާޅުވެ ދުވަހުގެ ހެޔޮ އެދުންތައް އަރިސްކުރެއްވުމަށްފަހު ޝާހިދު ވިދާޅުވެފައިވަނީ އިންޑިޔާއަކީ ހުރިހާ މޫސުމެއްގައިވެސް ރާއްޖޭގެ އެންމެ ގާތް އެކުވެރިޔާކަން ސާބިތުކޮށްދީފައިވާ ކަމަށެވެ.
އަދި ރާއްޖެއަށް ކުރިމަތިވާ ކޮންމެ ކާރިސާއެއްގައި އެންމެ ފުރަތަމަ އަދި އެންމެ ފުރިހަަމަ އެހީތެރިކަން ފޯރުކޮށްދޭ ގައުމަކީ އިންޑިޔާކަން ފާހަގަކުރައްވައި ޝާހިދު ވިދާޅުވީ ރާއްޖޭގެ ތަރައްގީގެ ދަތުރުގައި އިންޑިޔާއަކީ އަގުނުކުރެވޭނެ ބައިވެރިއެއް ކަމަށެވެ.
އިންޑިޔާއާއި ދިވެހިރާއްޖޭގެ ދެމެދުގައި އޮތް ގުޅުމުގެ ތެރެއިން ލިބޭ ތަރައްގީގެ ދީލަތި އެހީތަކުންނާއި އިންސާނީ ވަސީލަތް ތަރައްގީކުރުމުގެ ދާއިރާއިން އިންޑިޔާއިން ދޭ މަދަދުވެރިކަމުން ދިވެހި ރައްޔިތުންނަށް މަންފާކުރަމުންދާ ކަމުގައި ޝާހިދު ވިދާޅުވި އެވެ.
ޝާހިދު އިތުރަށް ވިދާޅުވެފައިވަނީ އިންޑިޔާއާައި ދިވެހިރާއްޖެއާ ދެމެދު އޮތް ގުޅުމަކީ ދިވެހި ރައްޔިތުން ވަރަށް ބޮޑަށް އަގުވަޒަންކުރާ ގުޅުމެއް ކަމަަށެވެ.
ޝާހިދު މިފަދައިން ވިދާޅުވެފައިވާއިރު އޭނާގެ ހާރިޖީވަޒީރު ކަމުގައި އިންޑިޔާއާ ރާައްޖޭގެ މެދުގައި އޮތް ގުޅުން ވަރަަށް ބޮޑަށް ބަދަހިވި އެވެ. ނަތީޖާއެއްގެ ގޮތުން ސަަރުކާރު ބަދަލުވުމަށްފަހުވެސް އިދިކޮޅު އެމްޑީޕީއާއި އިންޑިޔާގެ މެދުގައި ގާތް ގުޅުމެއް އޮވެ އެވެ.