ގޯތި ލިބިފައިވާ މަރުވެފައިވާ މީހުންގެ ބިންތައް ވާރިސުންނަށް ދެނީ

ކުރީ ސަރުކާރުން ހިންގި "ބިންވެރިޔާ" ސްކީމްގެ ދަށުން ގޯތި ލިބިފައިވާ މީހުންގެ ތެރެއިން މިހާރު މަރުވެފައިވާ މީހުންގެ ބިންތައް ވާރިސުންނަށް ދިނުމަށް ހައުސިން މިނިސްޓްރީން މިއަދު ހުޅުވާލައިފި އެވެ.

ހައުސިން މިނިސްޓްރީން މިއަދު ނެރުނު ކުރު ބަޔާނެއްގައި ބުނީ، ބިންވެރިޔާ ސްކީމުގެ ދަށުން ގޯތި ލިބިފައިވާ މީހަކު މަރުވެފައިވާނަމަ ކޯޓުން ވާރިސުން ސާބިތުކުރުމަށްފަހު، ގަޒިއްޔާ ނިމުނު ގޮތުގެ ރިޕޯޓު ހުށަހެޅުމަށެވެ.

މި ހުށަހެޅުން ހުށަހަޅާނީ މިނިސްޓްރީގެ ހިޔާވެހި ޕޯޓަލް މެދުވެރިކޮށެވެ. ގަޒިއްޔާ ނިމުނު ގޮތުގެ ރިޕޯޓާއެކު އެޕޮއިންޓްމެންޓަށް އެދުމުން އެގްރިމެންޓްގައި ސޮއިކުރުމުގެ އިންތިޒާމް ހަމަޖައްސައިދޭނެ ކަމަށް އެ ބަޔާނުގައިވެ އެވެ. މިކަން ކުރަން ވަކި މުއްދަތެއް ކަނޑައަޅާފައެއް ނުވެ އެވެ.

ކުރީ ސަރުކާރުން ގޯތި ދޭން ނިންމާފައި ވަނީ ހުޅުމާލެ، ގުޅިފަރު އަދި ގިރާވަރުފަޅުންނެވެ. ގުޅިފަޅުން 2،218 ގޯތި ކަނޑަން ނިންމާފައިވެ އެވެ. އަދި، ހުޅުމާލެ ދެވަނަ ފިޔަވަހިން 1407 ގޯއްޗާއި ހުޅުމާލޭގެ ތިންވަނަ ފިޔަވަހިން 699 ގޯތި ދޭން ނިންމާފައިވެ އެވެ.

ހައުސިން މިނިސްޓަރު ޑރ. އަލީ ހައިދަރު އިއްޔެ ރައްޔިތުންގެ މަޖިލީހުގައި ވިދާޅުވެފައި ވަނީ ގުޅިފަޅުން ގޯތި ދޫކުރެވޭނީ އެތަން ހިއްކައި ނިމި އަދި މާލެ ކަނެކްޓިވިޓީ ބްރިޖްގެ މަސައްކަތް ވެސް ނިމިގެން ކަމަށެވެ. އެއީ އެތަނަކީ މިހާރު ކޮންސްޓްރަކްޝަން ސައިޓަކަށް ވާތީ އެވެ.

ހުޅުމާލެ ދެވަނަ ފިޔަވަހިން ދޭން ހުރި ގޯތިތައް އޮކްޓޯބަރުގައި އަދި ހުޅުމާލެ ތިންވަނަ ފިޔަވަހިން ނޮވެމްބަރުގައި ގޯތި ދެވޭނެ ކަމަށް މިނިސްޓަރު ވިދާޅުވި އެވެ. އެ ދެ ސަރަހައްދު ވެސް ދަނީ ހިއްކަމުންނެވެ. އޭގެ އިތުރުން ގިރާވަރުފަޅުން ވެސް ގޯތި ދެވޭނީ ހިއްކައި ނިމުމުން ކަމަށާއި، ނުހިއްކާ ތަނަކުން އިން ކަނޑައި ރަޖިސްޓްރީ ނުދެވޭނެ ކަމަށް މިނިސްޓަރު ވިދާޅުވެފައިވެ އެވެ.