ހަ ކިލޯގެ ޑްރަގް އެތެރެކުރި ނެދަލޭންޑްސް މީހަކު ބަންދު ކޮށްފި

ރާއްޖެއަށް ހަ ކިލޯގެ ޑްރަގް އެތެރެ ކުރަން އުޅުނު ނެދަލޭންޑްސް މީހަކު އަތުލައިގެންފި އެވެ.

މި މައްސަލައިގައި އިއްޔެ ފުލުހުން ހައްޔަރުކޮށްފައި ވަނީ 30 އަހަރުގެ ނެދަލޭންޑްސް ފިރިހެނެކެވެ. އޭނާ ބަންދު ކުރުމަށް ނެރެފައިވާ ކޯޓް އަމުރުގައި ބުނެފައި ވަނީ އޭނާ އިއްޔެ ރާއްޖެއަށް އައިއިރު ގެނައި ލަގެޖުން މަސްތުވާތަކެތި ފެނިފައިވާ ކަމަށެވެ.

އެ ލަގެޖުގެ ތެރެއިން މަސްތުވާތަކެތި ހުރި ހަ ޒިޕްލޮކް ދަބަސް ފެނިފައިވާއިރު، އެތަކެތީގެ ބަރުދަނުގައި ހަ ކިލޯ ހުރި ކަމަށް ވެސް އަމުރުގައިވެ އެވެ.

ދަބަހުން ފެނުނު ތަކެތި ހުރީ ކްރިސްޓަލްތަކެއް ހެންނެވެ. އެހެންވެ، ޝައްކު އުފެދިގެން ބެލިއިރު އެއީ މަސްތުވާތަކެތީގެ ބާވަތެއް ކަމަށްވާ މެތެވެ.

ކޯޓުގައި ނެދަލޭންޑްސް މީހާ ބުނެފައި ވަނީ އޭނާ ރާއްޖެ އައީ ޗުއްޓީ ހޭދަކުރަން ކަމަށެވެ. މަސްތުވާތަކެތި ފެނުނު ލަގޭޖަކީ އޭނާ އެއްޗެއް ނަމަވެސް އޭގެއިން ފެނުނު އެއްޗިއްސަކީ އޭނާ އެއްޗެހި ނޫން ކަމަށެވެ. ޕެކް ކުރުމަށްފަހު އޭނާ ލަގެޖަށް އެތަކެތި ލީ އެހެން މީހަކު ކަމަށް ބުނެފައިވެ އެވެ.

އޭނާގެ ތަކެތި ނޫން ކަމަށް ބުނުމުން، ފުލުހުން ވަނީ ކޮންޓްރޯލް ޑެލިވަރީ އޮޕަރޭޝަނެއް ހިންގަން މަސައްކަތް ކޮށްފަ އެވެ. އެކަމަށް އޭނާ އެއްބާރުލުން ދިން ނަމަވެސް އެކަން ކުރެވޭގޮތް ނުވާ ކަމަށް ފުލުހުންނާ ހަވާލާދީ ކޯޓް އަމުރުގައި ބަޔާންކޮށްފައިވެ އެވެ. 

ކްރިމިނަލް ކޯޓުން ވަނީ އޭނާ 15 ދުވަހަށް ބަންދު ކުރަން އަމުރުކޮށްފަ އެވެ.