ޓޫރިސްޓު އެރައިވަލް: ޔޫރަޕުގެ އިތުރު ދެ ގައުމެއް ލައްކައަކާ ގާތަށް

ރާއްޖެ ދެ މިލިއަން ޓޫރިސްޓުންނަށް ކުރަމުންދާ ދަތުރުގައި އެންމެ ބޮޑު ކުރިއެރުމެއް މިވަގުތު ލިބެމުން ދަނީ ޔޫރަޕުގެ ގައުމުތަކުންނެވެ. އެ ބައްރުން އަންނަ ޓޫރިސްޓުންގެ އަދަދު ދަނީ އިތުރުވަމުންނެވެ. މިގޮތުން ކުރިއަށް އޮތް ހަފުތާއެއްގެ ތެރޭގައި ޔޫރަޕުގެ އިތުރު ދެ ގައުމަކުން އަންނަ ޓޫރިސްޓުންގެ އަދަދު ލައްކަައަކަށް އަރާނެ އެވެ.

ޓޫރިޒަމް މިނިސްޓްރީން އެންމެފަހުން ނެރުނު ހިސާބުތައް ދައްކާ މިވަގުތު ޓޫރިސްޓުންގެ އަދަދު ދެން އެންމެ އަވަހަށް އެއް ލައްކަ ފަހަނަ އަޅާނެ ދެ ގައުމަކީ އިޓަލީ އާއި ޖަރުމަނު ވިލާތެވެ. ރާއްޖެއަށް އެންމެ ފުރަތަމަ 1972 ގައި ޓޫރިސްޓުން އައި ގައުމު ކަމަށްވާ އިޓަލީން މިހާތަނަށް 89,563 ޓޫރިސްޓުން އައިސްފައިވެ އެވެ. އަދި ޖަރުމަނުވިލާތުން އައި ޓޫރިސްޓުންގެ އަދަދު ވެސް އުޅެނީ 88,566 ގަ އެވެ. 

ހިސާބުތައް ދައްކާ ގޮތުގައި މިދެ ގައުމުން އެވްރެޖުކޮށް މިދިޔަ ތިން ދުވަހުގެ ތެރޭގައި 900 އާ ގާތަށް ވަނީ ޓޫރިސްޓުން ރާއްޖެ އައިސްފަ އެވެ. 

ޓޫރިޒަމް ހިސާބުތައް ދައްކާ ގޮތުގައި ޗައިނާ ނަގާފައި އެންމެ ގިނައިން ޓޫރިސްޓުން އަންނަ ގައުމަކީ ރަޝިއާ އެވެ. އެ ގައުމުން މިހާތަނަށް 130,908 ޓޫރިސްޓުން ވަނީ ރާއްޖެއަށް ޒިޔާރަތްކޮށްފަ އެވެ. 

ރާއްޖޭގެ ޓޫރިޒަމަށް މި އަހަރު ބަލާއިރު ޔޫރަޕުން އަންނަ ޓޫރިސްޓުންގެ އަދަދު ވަނީ ޖޫންގެ ނިޔަލަށް ބަލާނަމަ 12.8 ޕަސެންޓުގެ އިތުރުވުމެއް ލިބިފަ އެވެ. މިދިޔަ އަހަރުގެ ޖޫން މަހު ޔޫރަޕުން 544,798 ޓޫރިސްޓުން އައިސްފައިވެ އެވެ. ނަމަވެސް މި އަހަރު އައި އަދަދު ވަނީ 614,691 އަށް އިތުރުވެފަ އެވެ.