މި ރިސޯޓް ވިއްކާލުމުގައި މެދުވެރިއެއްގެ ގޮތުގައި އުޅެނީ ހައިއެންޑް ޕްރޮޕަޓީ ވިއްކާ ޖޭއެލްއެލް އިންނެވެ.
މީގެ 10 އަހަރު ކުރިން 2015 ވަނަ އަހަރު ރާއްޖޭގައި ހުޅުވި އެންމެ މަތީ ފަންތީގެ އެއް ރިސޯޓް ކަމަށްވާ އަމިއްލަފުށި ރިސޯޓް ވިއްކާލަން ސިންގަޕޫރުގެ ޖޭއެލްއެލް އިން ލިސްޓްކޮށްފި އެވެ.
ބޮޑެތި ޕްރޮޕަޓީތައް ވިއްކުމުގައި ހަރަކާތްތެރިވާ ސިންގަޕޫރުގެ ޖޭއެލްއެލްގެ ހޮޓެލްސް އެންޑް ހޮސްޕިޓަލިޓީ ގްރޫޕުން ވަނީ އަމިއްލަ ފުށި ވިއްކާލަން ރަސްމީކޮށް ލިސްޓްކޮށްފަ އެވެ.
މި ރިސޯޓް ތަރައްގީ ކުރީ ދިވެހި ކުންފުންޏެއް ކަމަށްވާ ކޯސްޓްލައިން އިންވެސްޓްމަންޓުންނެވެ. ގުދުރަތީ ގޮތުން ހިމާޔަތްކޮށްފައިވާ ބ. އަތޮޅު ޔުނެސްކޯ ވޯލްޑް ބަޔޮސްފިއާ ރިޒާވްގައި ހުންނަ ލަގްޒަރީ ރިސޯޓަކީ މީގެ އަހަރުތަކެއްގެ ކުރީގައި އެންމެ މަޝްހޫރު ރާއްޖޭގެ ޓޫރިޒަމަށް މަތީ ފަންތީގެ އަގު ޖެއްސި ކޮޓަރި ވިއްކުމުގައި އެންމެ މަޝްހޫރު އެއް ރިސޯޓެވެ. މި ރިސޯޓު ތަރައްގީ ކުރި ކުންފުނިން ވަނީ އޭގެފަހުން މި ސިނާއަތުގައި ގިނަ ކާމިޔާބީތަކެއް ހޯދާފަ އެވެ.
ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ފުރައިގެން 30 މިނެޓުން ސީޕްލޭންގައި ދަތުރުކުރެވޭ 68 ވިލާ މި ރިސޯޓަކީ މިފަހުގެ ތާރީހުގައި އެންމެ މަތީ އަގެއްގައި ވިއްކޭނެ ރިސޯޓަކަށް ވެގެންދާނެ ކަމަށް ވަނީ ބެލެވިފަ އެވެ.
ޖޭއެލްއެލް އިން ދަނީ ރާއްޖޭގެ ގިނަ ރިސޯޓްތަކެއް ވިއްކުމުގައި މެދުވެރިއެއްގެ ބައި އަދާކުރަމުންނެވެ. އެ ކުންފުނިން ވަނީ މިދިޔަ އަހަރުވެސް ލަގްޒަރީ ރިސޯޓެއް ވިއްކާލާފަ އެވެ.
އެ ކުންފުނިން މިދިޔަ އަހަރު 200 މިލިއަން ޑޮލަރުގެ މުއާމަލާތް ކޮށްފައިވެ އެވެ. އެ ކުންފުނީގެ މާލީ ރިޕޯޓުން އެނގޭ ގޮތުގައި ރާއްޖެއަކީ ޖޭއެލްއެލް އަށް ތެޔޮވަޅެއް ފަދަ ފައިދާ ބޮޑު ތަނެކެވެ. އެ ކުންފުނިން ރާއްޖޭގައި ވޭތުވެދިޔަ 10 ވަރަކަށް އަހަރުތެރޭގައި ވިއްކި ރިސޯޓްތަކުގެ އަގު ދެ ބިލިއަން ޑޮލަރު ނުވަތަ 30 ބިލިއަން ރުފިޔާއަށް އަރަ އެވެ.
ޖޭއެލްއެލް އިން މިހާތަނަށް އަހަރެއްގެ މައްޗަށް އެންމެ ގިނަ ޕްރޮޕަޓީ ވިއްކާފައި ވަނީ 2016 ވަނަ އަހަރު އެވެ. އެ އަހަރު އެ ކުންފުނިން އެންމެ މަތީ ފަންތި - އަޕްސްކޭލްގައި ވިއްކި ރިސޯޓުތަކުގެ އަދަދު 150 މިލިއަން ޑޮލަރަށް އަރަ އެވެ.
މި ސަރަހައްދުން ޕްރޮޕަޓީ ވިއްކުމުގައި ރާއްޖެއާ ވާދަ ކުރަން ބައެއް ގައުމުތަކުން ކައިރި ކުރި ނަމަވެސް ރާއްޖޭގައި ލިބޭ ވަރަށް އަގު ނުލިބޭކަން ޖޭއެލްއެލް އިން ފާހަގަ ކުރެ އެވެ. ރާއްޖޭގައި ވިއްކާ ރިސޯޓުތަކަށް ދުނިޔޭގެ އިންވެސްޓަރުންގެ މެދުގައި ބޮޑު އަގު ލިބޭ މައިގަނޑު ސަބަބަކީ ރާއްޖޭގައި އެންމެ މަތީ ފަންތީގެ ގިނަ ރިސޯޓް ތަކެއް ހުރުމުންނެވެ. އޭގެ ސަބަބުން ރާއްޖޭގެ ރިސޯޓްތަކުގެ ކޮޓަރިއަކުން ލިބޭ އާމްދަނީ ނުވަތަ ރެވެނިއުޕާ އެވައިލަބަލް ރޫމް (އާރުއީވީޕޭއޭއާރު) މައްޗެވެ.