ވިޔަފާރި ބަނދަރުގައި ނުގެންގޮސް ގިނަދުވަސްވީ މުދާތައް ނީލަމުގައި ވިއްކާލަނީ

ރާއްޖެއަށް މުދާ އެތެރެކޮށް މާލޭ ވިޔަފާރި ބަނދަރު ގައި ނުގެންގޮސް ގިނަދުވަސްވީ މުދާތައް ނީލަމުގައި ވިއްކާލަން ނިންމައިފި އެވެ.

މޯލްޑިވްސް ޕޯޓްސް ލިމިޓެޑުން ވަނީ ނީލަމުގައި ވިއްކާލަން ނިންމާފައިވާ މުދަލާ ތަކެތީގެ ލިސްޓު އާންމުކޮށްފަ އެވެ. ނީލަމުގައި ވިއްކާލާ ތަކެތި ބެލުން އޮންނާނީ މި މަހުގެ 20 ވަނަ ދުވަހު ހަވީރު ކަމަށެވެ. ނީލަން އޮންނާނީ 21 ވަނަ ދުވަހުގެ މެންދުރު 2:00 ގަ އެވެ.

ނީލަމަށް އަގު ހުށަހެޅުން ބަންދު ވާނީ ނީލަމަށް އެންމެ ފަހުން ހުށަހަޅާ އަގު ހުށަހަޅާތާ ފަސް މިނެޓްގެ ވަގުތެއް ދިނުމަށް ފަހު އެވެ. އަދި އެ ފަސްމިނެޓް ތެރޭގައި އިތުރު އަގެއް ހުށަހަޅައިފިނަމަ ކުރިން ދިން ފަސް މިނެޓްގެ އިތުރަށް ފަސްމިނެޓް އިތުރުވަމުން ގޮސް އަގެއް ހުށަނާޅާ އޮވެ ފަސްމިނެޓް ހަމަވުމުން ނީލަން ބަންދުވާނެ އެވެ.

މި ނީލަމުގައި ބައިވެރިވެވޭނީ އޮކްޝަން ޕޯޓަލްއަށް ސަބްސްކްރައިބް ކުރާ މީހުން ކަމަށް ވެސް ބުންޏެވެ.

މުދާ ނީލަން ކިޔުން ކުރިއަށް ގެންދެވޭނީ ކުންފުނީގައި މުދާ ނީލަންކިޔުމަށް ހެދިފައިވާ ގަވާއިދުގެ ދަށުންނެވެ. އަދި ބުނީ ސްކްރެޕްގެ ގޮތުގައި ނީލަމުން ނަންގަވާ މުދާ ހަމައެކަނި ކްލިއާ ކުރެވޭނީ ރީ-އެކްސްޕޯޓް ކުރެވޭ ގޮތަށް ކަމަށާ މުދާ ކްލިއާ ކުރުމަށް ދެވޭނީ 10 ދުވަހުގެ ފްރީ ސްޓޯރޭޖް މުއްދަތެއް ކަމަށެވެ.

މި ނީލަމުގައި ނުވިކޭ މުދާ ދެވަނަ ފަހަރަށް ނީލަން ކިއުމަށް އިއުލާން ކުރެވޭނީ އެމްޕީއެލްގެ އޮކްޝަން ޕޯޓަލުން ކަމަށް ވެސް ބުންޏެވެ.