ގާނޫނުއަސާސީއަށް 16 އަހަރު: މަޖިލީހުގެ ރައީސް ދެއްވީ ހައްގުތައް ކަށަވަރުކޮށްދޭނެކަމުގެ ޔަގީންކަން

މިހާރު އަަމަލުކުރަމުންދާ އައު ގާނޫނުއަސާސީ ތަސްދީގުކޮށް އެއަށް އަމަލުކުރަން ފެށިތާ 16 އަހަރު ފުރުމުގެ މުނާސަބަތުގައި ގާނޫނުއަސާސީން ރައްޔިތުންނަށް ދީފައިވާ ހައްގުތައް ކަށަވަރުކޮށްދީ ނެގެހެއްޓުމުގައި 20 ވަނަ ރައްޔިތުންގެ މަޖިލިސް ދެމި އޮންނާނެ ކަމުގެ ޔަގީންކަން އެ މަޖިލީހުގެ ރައީސް އަބްދުއްރަހީމް އަބްދުﷲ ދެއްވައިފި އެވެ. 

މިއަދު މަޖިިލީހުގެ ޖަލްސާ ފައްޓަވަމުން އަބްދުއްރަހީމް ވިދާޅުވީ ހުރިހާ މެންބަރުންނަށްވެސް އެނގިވަޑައިގަންނަވާނެ ފަދައިން މިއަދަކީ މިހާރު އަމަލުކުރަމުންދާ ގާނޫނުއަސާސީ އެއިރުގެ ރައީސުލްޖުމްހޫރިއްޔާ ރައީސް އަލްއުސްތާޛު މައުމޫން އަބްދުލްގައްޔޫމު ތަސްދީގުކުރެއްވިތާ 16 އަހަރު ފުރޭ ދުވަސް ކަމަށެވެ.

ކުރު ގޮތަކަށް އައު ގާނޫނުއަސާސީ އެކުލަވައިލުމުގެ ތާރީހަށް އެމަނިކުފާނު އަލިއަޅުވައިލެއްވި އެވެ. އެގޮތުން 2004 ވަނަ އަހަރު ގާނޫނުއަސާސީ އިސްލާހުކުރުމުގެ މަސައްކަތް ރައްޔިތުންގެ ހާއްސަ މަޖިލީހުން ފަށައި، އެ މަސައްކަތް މަޖިލީހުން ނިންމުމުން އެ ގާނޫނުއަސާސީ އެއިރުގެ ރައީސް ތަސްދީގުކުރެއްވީ 2008 ވަނަ އަހަރުގެ އޯގަސްޓު މަހުގެ 7 ވަނަ ދުވަހުގައި ކަން އަބްދުއްރަހީމް ފާހަގަކުރެއްވި އެވެ. 

ފެހި ގާނޫނުއަސާސީގެ ތާރީހަށް ކުރުކޮށް އަލިއަޅުވައިލެއްވުމަށްފަހު އަބްދުއްރަހީމްވަނީ އެ ގާނޫނު އަސާސީ އެކުލަވައިލި ހާއްސަ މަޖިލީހުގެ މެންބަރުންނަަށާއި، އެ ހާއްސަ މަޖިލީހުގެ ރައީސްކަން ކުރެއްވި މިހާރުގެ ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ގާސިމް އިބްރާހީމަށް ޝުކުރު އަދާކުރައްވާފަ އެވެ. 

"މި ފުރުސަތުގައި މިހާރު އަމަލުކުރަމުންދާ ފެހި ގާނޫނުއަސާސީ އެކުލަވައިލުމުގެ މަސައްކަަތްކުރެއްވި ހާއްސަ މަޖިލީހުގެ ހުރިހާ އިއްޒަތްތެރި މެންބަރުންނަށާއި، އެ މަޖިލީހުގެ ރިޔާސަތު ބެލެހެއްޓެވި މާމިގިލީ ދާއިރާގެ މެންބަރު ގާސިމް އިބްރާހީމަށް ވަރަށް ހާއްސަ ޝުކުރެއް ދަންނަވަން،" އަބްދުއްރަހީމް ވިދާޅުވި އެވެ. 

އެއާއެކު ގާނޫނުއަސާސީން ދިވެހި ރައްޔިތުންނަށް ކަށަވަރުކޮށްދީފައިވާ ހުރިހާ އަސާސީ ހައްގުތަކާއި މިނިވަންކަން ދިފާއުކޮށް ކަށަވަރުކޮށްދިނުމުގައާއި ގާނޫނުއަަސާސީން ރައްޔިތުންގެ މަޖިލީހާ މަތިކޮށްފައިވާ ވާޖިބުތައް އަދާކުރުމުގައި 20 ވަނަ މަޖިލިސް ދެމިއޮންނާނެ ކަމުގެ ޔަގީންކަން ހުރިހާ ރައްޔިތުންނަށް މަޖިލީހުގެ ރައީސް ދެއްވި އެވެ. 

"ގާނޫނުއަސާސީން އަޅުގަނޑުމެންނަށް ލިބިދީފައިވާ ހައްގުތައް ކަށަވަރުކޮށްދިނުމުގައި، އަދި ރައްޔިތުންގެ މަޖިލީހަށް މަތިކޮށްފައިވާ ވާޖިބު އަދާކޮށް މުއައްސަސާތައް ޖަވާބުދާރީކޮށް ރައްޔިތުންގެ މަޖިލީހާ މަތިކޮށްފައިވާ މަސްއޫލިއްޔަތު މި މަޖިލީހުން އަދާކުރާނެ ކަމުގެ ފުރިހަމަ ޔަގީންކަން ދިވެހި އެންމެހާ ލޮބުވެތި ރައްޔިތުންނަށް އަރުވަން،" އަބްދުއްރަހީމް ވިދާޅުވި އެވެ.