އިމާރާތް ކުރަން ނިންމާފައި ވަނީ އެސްޓީއޯގެެ ހެޑް އޮފީހާ އިންވެގެން އޮންނަ ބިމުގަ އެވެ. އެއީ 15،000 އަކަ ފޫޓުގެ ބިމެކެވެ.
ސަރުކާރުގެ ވިޔަފާރީގެ މައި ކުންފުނި އެސްޓީއޯ އިން 25 ބުރީގެ އިމާރާތެއް އަޅަން ނިންމާ އެކަން ކޮށްދޭނެ ބަޔަކު ހޯދަން އިއުލާނު ކޮށްފި އެވެ.
އެސްޓީއޯ އިން ކުރި އިއުލާނެއް ގައި ބުނެފައި ވަނީ ކުންފުނީގެ ވިޔަފާރި ފުޅާކުރުމާއެކު އިތުރު ޖާގަ ހޯދުމުގެ ބޭނުމުގައި މާލޭގައި 25 ބުރީގެ ކޮމާޝަލް އިމާރާތެއް އަޅަން ނިންމާފައިވާ ކަމަށެވެ. އިމާރާތް ކުރަން ނިންމާފައި ވަނީ އެސްޓީއޯގެެ ހެޑް އޮފީހާ އިންވެގެން އޮންނަ ބިމުގަ އެވެ. އެއީ 15،000 އަކަ ފޫޓުގެ ބިމެކެވެ.
ކޮންޓްރެކްޓާ ފައިނޭންސް އުސޫލުން މި މަސައްކަތް ކޮށްދޭނެ ބަޔަކު ހޯދަމުންދާ ކަމަށް ބުންޏެވެ. މަސައްކަތް ކުރިއަށް ގެންދާނީ އެސްޓީއޯގެ 15 ޕަސެންޓް އިކުއިޓީ ހިމެނޭ ގޮތަށެވެ. އެ ކުންފުނިން ބުނީ މި މަސައްކަތަށް ޝައުގުވެރިކަން ފާޅުކުރެވޭނީ 18 މިލިއަން ޑޮލަރު ނުވަތަ އެއަށް ވުރެ ބޮޑު މަޝްރޫއުއެއް ހިންގާފައިވާ ފަރާތްތަކަށެވެ.
އެ ކުންފުންޏަކުން ފާއިތުވި ފަސް އަހަރު ތެރޭ އެފަދަ މަސައްކަތެއް ކޮށްފައިވާން ޖެހެ އެވެ.
ޝައުގުވެރިކަން ފާޅުކުރުމުގެ ފުރުސަތު މި މަހުގެ 13 ގެ ނިޔަލަށް އޮންނާނެ އެވެ.
އެސްޓީއޯ އިން 25 ބުރީގެ އިމާރާތެއް އަޅަން ނިންމާފައި މި ވަނީ ހުޅުމާލޭގައި އެސްޓީއޯއިން ހަދާ "ގަލަށް" ވެފައިވާ ފަސްތަރީގެ ހޮޓާ ދޫކޮށްލުމަށް ފަހު އެވެ.