ދެން އެންމެ އަވަހާ އެ ސުވާލު އުޖެންޑާ ކުރެވެން އޮތް ދުވަހަކަށް އެޖެންޑާ ކުރައްވާނެ ކަމަށް މަޖިލީހުގެ ރައީސް މިއަދު ވިދާޅުވެފައި ވެއެވެ.
އާއިލީ ކުއްލި ކަމެއް ދިމާ ވެގެން ކަމަށް ވިދާޅުވެ، ހައުސިން މިނިސްޓަރު ޑރ. އަލީ ހައިދަރު އަހުމަދު މިއަދު ރައްޔިތުންގެ މަޖިލީހުގެ ޖަލްސާގައި ޖަވާބުދާރީވެ ވަޑައިގަތުމަށް ހާޒިރުވެ ވަޑައެއް ނުގެންނެވި އެވެ.
މިއަދުގެ އެޖެންޑާގައި މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް މިނިސްޓަރު ހައިދަރާ ސުވާލު ކުރުން ހިމަނާފައި އޮތެވެ.
އޭނާ އެދިވަޑައިގެންފައި އޮތީ ގުޅީފަޅުން ބިން ލިބުނު ފަރާތްތަކަށް އިން ވަކިކޮށް ބިން ހަވާލު ކުރަން ފެށޭނީ ކޮން ދުވަހުންތޯ އާއި "ބިންވެރިޔާ" ސްކީމްގެ ދަށުން ކުރީ ސަރުކާރުން މާލޭގެ ރައްޔިތުންނަށް ބޯހިޔާވަހިކަން ދޭން ހަމަޖައްސާފައިވާ ގޯތިތައް ހަވާލު ކުރެވޭނީ ކިހާ ހިސާބެއްގައިތޯ އެވެ. މީގެ އިތުރުން ހުޅުމާލޭގެ ހިޔާ އަވަށް / ފޭސް ދޭއްގައި އިމާރާތްކުރާ 4000 ފްލެޓް ލިބުނުފަރާތް ތަކަށް އެ ފްލެޓްތައް ހަވާލު ކުރާނީ ކޮންއިރަކުންތޯ ވެސް ސުވާލުގައި ހިމަނުއްވާފައި އޮތެވެ.
އެޖެންޑާއަށް އެ ސުވާލު ކުރުމާއި މިނިސްޓަރުގެ ޖަވާބުދާރީވެ ވަޑައިގަތުން ލާފައި އޮތް ނަމަވެސް ޖަލްސާ ފައްޓަވައި މަޖިލީހުގެ ރިޔާސަތުން މަޖިލިސް ރައީސް އަބްދުއްރަހީމް އަބްދުﷲ ވިދާޅުވީ، މިއަދު ދިމާވި ކުއްލި އާއިލީ ކަމަކާ ގުޅިގެން މަޖިލީހަށް ވަޑައިގެންނެވެން ނެތްކަމަށް މިނިސްޓަރު ހައިދަރު މިއަދު ހެނދުނު އަންގަވާފައިވާ ކަމަށެވެ. އަދި އެންމެ އަވަހާ އެ ސުވާލު އުޖެންޑާ ކުރެވެން އޮތް ދުވަހަކަށް އެޖެންޑާ ކުރައްވާނެ ކަމަށެވެ.