އުތުރުގެ ޔޮޓު ވިޔަފާރީގެ އާ ސޮފުހާއެއް | އުލިގަން ޔޮޓް މެރީނާ އަޅަން ބިން ދީފި

މި އަހަރު މަސައްކަތް ފަށައި ހަ މަސްތެރޭ ހިދުމަތް ފަށާނެ 

އުތުރަށް އެންމެ ގިނަ ޔޮޓުތައް ބަނދަރުކުރާ އުލިގަމުގައި ޔޮޓް މެރީނާއެއް ހަދަން އެމްޕީއެލްއަށް އުލިގަން ކައުންސިލުން ބިން ހަވާލުކޮށްފި އެވެ. 

އެމްޕީއެލްގެ ސީއީއޯ މުހައްމަދު ވަޖީހު އިބްރާހީމް އިސްވެ ހުންނަވައި ހއ. އުލިގަމަށް މިހާރު ކުރައްވަމުންދާ ދަތުރުފުޅުމުގައި މިއަދު ވަނީ އުލިގަމުގައި ތަރައްގީ ކުރާ ޔޮޓް މެރިނާ އަޅަން ހާއްސަކޮށްފައިވާ ސަރަހައްދުގެ ބިން އެ ކުންފުންޏާ ހަވާލުކޮށްފަ އެވެ. 

އުލިގަމުގައި ބޭއްވި ރަސްމިއްޔާތެއްގައި އެމްޕީއެލްގެ ފަރާތުން ފަހުމުނާމާގައި ސޮއިކުރެއްވީ ކުންފުނީގެ ޗީފް އެގްޒެކުޓިވް އޮފިސަރު މުހައްމަދު ވަޖީހް އިބްރާހީމެވެ. އަދި އުލިގަމު ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އަހްމަދު މުއާޒް މުހައްމަދެވެ.

މި ސޮޔާ ބެހޭ ގޮތުން އުލިގަމްގައި ހުންނަވާ ސީއީއޯ ވަޖީހު "މިރާ" އަށް ވިދާޅުވީ ބިން ހަވާލު ކުރުމާއެކު ދެން މަސައްކަތް ފަށާނީ އިންވެސްޓަރެއް މެދުވެރިކޮށް ޔޮޓް މެރީނާގެ މަސައްކަތް ފަށާށެވެ. 

މި އެއްބަސްވުމުގެ ދަށުން އެމްޕީއެލް އިން އުލިގަމުގައި ޔޮޓް މެރިނާއެއް ތަރައްގޯކޮށް، ޔޮޓްތަކަށް ބޭނުންވާ ޚިދުމަތްތައް އުލިގަމުން ފޯރުކޮށްދޭން ބޭނުންވާ ވަސީލަތްތައް ގާއިމްކުރާނެ އެވެ.

އެމްޕީއެލްގެ ސީއީއޯ ވަޖީހް ވިދާޅުވީ އުލިގަމުގައި ޔޮޓް މެރީނާ ގާއިމްކުރުމުގެ އަމަލީ މަސައްކަތް މި އަހަރުގެ ތެރޭގައި ފެށިގެންދާނެ ކަމަށެވެ. އަދި އަމަލީ މަސައްކަތް ފެށުމުން ހަ މަސް ދުވަހުގެ ތެރޭގައި އެ މަސައްކަތް ފުރިހަމަކޮށް، ޚިދުމަތް ފޯރުކޮށްދޭން ފެށޭނެ ކަމުގެ ޔަގީންކަން އޭނާ ދެއްވި އެވެ. އަދި މިހާރު ކޮންސެޕްޓްވެސް ހަދައި، އިންވެސްޓަރުންނާ މަޝްވަރާކުރެވެމުންދާ ކަމަށް އޭނާ ވިދާޅުވި އެވެ. 

"ރައީސް ޑރ. މުހައްމަދު މުއިއްޒުގެ ވައުދުފުޅެއް އެއީ ދިވެހިރާއްޖޭގައި މެރިޓައިމް ސެކްޓަރު ވަރަށް ބޮޑަށް ފުޅާކުކުރުން. އުލިގަމަކީ ޒަމާނުންސުރެ، އާދަޔާ ހިލާފަށް ގިނަ ޔޮޓް ފަހަރު ޒިޔާރާތް ކުރާ ރަށެއް. ރަށުގެ ރައްޔިތުންނާއި ކައުންސިލްގެ ބޮޑު ކަންބޮޑުވުމެއް މި އުޅަނދު ފަހަރަށް ބޭނުންވާ ޚިދުމަތްތައް މި ރަށުން ފޯރުނުކޮށްދެވޭތީ،" ވަޖީހް ވިދާޅުވި އެވެ.

"އެހެންވެ އަޅުގަނޑުމެން މި ބެލީ ރައީސްގެ ވިސްނުންފުޅާ އެއްގޮތަށް ފުރަތަމަ ފަހަރަށް އުލިގަމުގައި ޔޮޓް މެރީނާއެއް ގާއިމްކުރަން. ކޮންސެޕްޓް ހަދާ ނިމި، އިންވެސްޓަރުންނާ ވާހަކަދައްކަމުން މި ދަނީ. މާލަސްތަކެއް ނުވެ ގަބޫލްކުރެވޭނީ މި އަހަރުގެ ތެރޭގައި (އަމަލީ) މަސައްކަތްތައް ފެށިގެންދާނެކަން. އޭރުން ހަ މަސް ދުވަހުގެ ތެރޭގައި މަސައްކަތް ނިންމާލެވޭނެ."

އުލިގަމު ކައުންސިލްގެ ރައީސް މުއާޒް ވިދާޅުވީ ޔޮޓް މެރީނާއެއް އުލިގަމުގައި ތަރައްޤީކުރުމަކީ އެ ރަށުގެ ރައްޔިތުން ދުވަސްވީ ހުވަފެނެއް ކަމަށެވެ.

"މި ރަށަށް ރާއްޖޭން ބޭރުގެ އުޅަނދު ފަހަރު ނާންނަ ދުވަސްވަރެއް ހަނދާން ނުނެތޭ. ޔޮޓް ފަހަރަށް ހިދުމަތް ދެވޭނެ ގޮތެއް ހޯދުމަށް ވޭތުވެރިޔަ ސަރުކާރުތަކާ ވާހަކަ ދައްކައިގެން މަސައްކަތް ކުރެވުނު. ވޭތުވެދިޔަ ސަރުކާރުތަކުން ސަރުކާރަކުން [ޔޮޓް މެރީނާއެއް ނެތިގެން] އަޅުގަނޑުމެން ފާޅުކުރި ކަންބޮޑުވުންތަކަށް އިޖާބައެއް ނުދެއްވާ. މި ރަށަށް މި ފުރުސަތު ފަހިކޮށްދެވިކަމަށްޓަކައި ރައީސް މުއިއްޒު އާއި އެމްޕީއެލްއަށް ޝުކުރު އަދާކުރަން،" މުއާޒް ވިދާޅުވިއެވެ.