ރިސޯޓް ވެރިންގެ ޖަމިއްޔާ އާއި އެމްއެމްޕީއާރުސީން ގުޅުން ހަރުދަނާ ކުރަން ސޮޔެއް

ރާއްޖޭގެ ޑެސްޓިނޭޝަން މާކެޓިން ސްޓްރެޓެޖީތައް ހަރުދަނާކޮށް، އެއްބާރުލުން އިތުރުކުރުމަށް އެމްއެމްޕީއާރުސީ އާއި ރިސޯޓް އޯނަރުންގެ ޖަމިއްޔާ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން މިއަދު އެއްބަސްވުމެއްގައި ސޮއިކޮށްފި އެވެ.

އެމްއެމްޕީއާރުސީގެ ސީއީއޯ އެންޑް އެމްޑީ އިބްރާޙިމް ޝިއުރީ ވިދާޅުވީ މަޓީއާއެކު މި މުހިންމު އެއްބާރުލުން ރަސްމީކޮށް ފެށުން މިއީ އަޅުގަނޑުމެންނަށް ލިބޭ ވަރަށް ބޮޑު އުފަލެއް ކަމަށެވެ

"މަޓީގެ ފުޅާ އިންޑަސްޓްރީ އިލްމާއި ތަޖުރިބާއަކީ އަޅުގަނޑުމެންގެ ޑެސްޓިނޭޝަން މާކެޓިންގެ މަސައްކަތްތައް ހަރުދަނާކުރުމުގައި އަގު ހުރި އެސެޓަކަށް ވާނެކަން ޔަގީން. އަޅުގަނޑުމެންގެ ސްޓްރެޓެޖިކް އަމާޒުތައް ހާސިލްކުރުމަށް އެބޭފުޅުންގެ ވިސްނުމާއި ސަޕޯޓު ވަރަށް ބޮޑު އެހީއަކަށް ވާނެ." ޝިއުރީ ވިދާޅުވި އެވެ.

މަޓީގެ ސެކްރެޓަރީ ޖެނެރަލް އަހުމަދު ނަޒީރު ވިދާޅުވީ އަބަދު ވެސް އެމްއެމްޕީއާރުސީއާ މަޓީ ގާތް މަސައްކަތުގެ ގުޅުމެއް ބާއްވަމުން އަންނަ ކަމަށާއި މިއަދުގެ މި އެމްއޯޔޫ ސޮއިކުރުމާއެކު އެ ގުޅުން އިތުރަށް ވަރުގަދަވާނެކަމަށް އުންމީދު ކުރާކަމަށެވެ.

މީގެ އިތުރުން، މަޓީގެ އެއްބާރުލުން ދިނުމަކީ އެމްއެމްޕީއާރުސީގެ ޑެސްޓިނޭޝަން މާކެޓިންގެ މަސައްކަތްތައް ފުޅާކުރުމަށް އެހީތެރިވެދޭނެ ކަމެއް ކަމަށާއި މިއީ ޝައްކެއް ވެސް ނެތްގޮތުގައި އަޅުގަނޑުމެންގެ ޑެސްޓިނޭޝަން ބްރޭންޑްއެއްގެ ގޮތުގައި ވަރުގަދަކުރުމަށާއި އަޅުގަނޑުމެންގެ ޖުމްލަ ޕާފޯމަންސް ޓާގެޓްތައް ހާސިލްކުރުމަށް މުހިންމު ކަމެއް ކަމަށްވެސް ނަޒީރު ވިދާޅުވި އެވެ. 

މި އެއްބަސްވުމުގެ ދަށުން ދިވެހިރާއްޖޭގެ ޑެސްޓިނޭޝަން މާކެޓިންގ ސްޓްރެޓެޖީތަކާއި ކެމްޕޭންތަކާއި އުކުޅުތައް ކޮންސެޕްޓުއަލައިޒްކޮށް އެކުލަވާލުމުގައި އެމްއެމްޕީއާރުސީއަށް އެހީތެރިވެ، އެޑްވައިޒަރީ ރޯލެއް އަދާކުރުމުގައި މަޓީއިން މުހިންމު ކަމަށް ވިދާޅުވި އެވެ.