"ކުރީ ސަރުކާރުން ވައުދުވި ހޮސްޕިޓަލްތައް މާ ރަނގަޅަށް މި ސަރުކާރުން ތަރައްގީ ކުރާނެ"
މިނިސްޓަރު ވިދާޅުވި ގޮތުގައި މި ސަރުކާރާއެކު މިދިއަ މުއްދަތުގެ ތެރޭ އޭގެ ތެރެއިން 20 މަޝްރޫއެއް ފަށާފައިވެ އެވެ.
އެމްޑީގެ ކުރީ ސަރުކާރުން ވައުދު ވެފައިވާ ހޮސްޕިޓަލްތައް އެއަށްވުރެ އަގު ހެޔޮކޮށް ފުރިހަމަ ހިދުމަތާއެކު ރައީސް ޑރ. މުހައްމަދު މުއިއްޒުގެ މި ސަރުކާރުން ތަރައްގީ ކުރާނެ ކަމަށް ހެލްތު މިނިސްޓަރު ޑރ. އަބްދުﷲ ހަލީލް ވިދާޅު ވެއްޖެ އެވެ.
ކޮންގްރެސް ޕާޓީގެ ހަރުގެ ޖަލްސާގައި ރޭ ބައިވެރިވެ ވަޑައިގެން މިނިސްޓަރު ވިދާޅުވީ މިދިއަ ސަރުކާރުގައި ނުބައްދަލު އަގު ތަކުގައި މަޝްރޫއުތައް ދީފައިވާ ކަމަށާއި އެ ސަރުކާރު ނިމުނު އިރު ބަޖެޓް ނެތް އެތައް މަޝްރޫއެއް ފަށަން ވައުދުތައް ވެފައިވާ ކަމަށާއި މިދިއަ ރިޔާސީ އިންތިހާބާއި ގާތްކޮށް މަޝްރޫއުތަކެއް އިއުލާން ކޮށްފައިވާ ކަމަށެވެ.
މިނިސްޓަރު ރޭ ވަނީ ހިސާބު ނަމްބަރުތަކެއް ވެސް ވިދާޅުވެފަ އެވެ. އެ ގޮތުން އެ ސަރުކާރުގެ ތެރޭގައި ސިއްހީ ދާއިރާއިން 57 މަޝްރޫއު އެވޯޑުކޮށް ބަޔަކާއި ހަވާލުކޮށްފައިވާ ކަމަށާާއި އޭގެ ތެރެއިން އެކި ސަބަބުތަކާ ހެދި 30 މަޝްރޫއު ހުއްޓިފައިވާ ކަމަށެވެ. މިނިސްޓަރު ވިދާޅުވި ގޮތުގައި މި ސަރުކާރާއެކު މިދިއަ މުއްދަތުގެ ތެރޭ އޭގެ ތެރެއިން 20 މަޝްރޫއެއް ފަށާފައި ވެއެވެ.
"އެ ބޭފުޅުން [ކުރީގެ ސަރުކާރުން] އިއުލާންކޮށްފައިވާ ހޮސްޕިޓަލްތައް އެއަށްވުރެ ހެޔޮ އަގުގައި ހިދުމަތަށް އެއްވެސް އުނިކަމެއް ނާންނާނެހެން ޑިޒައިނަށް މިގެނައި ބަދަލާއެކު މި ސަރުކާރުން ތަރައްގީ ކުރާނެ." މިނިސްޓަރު ވިދާޅުވި އެވެ.
ކޮމެންޓް
Republic of Maldives