ނިރުފެހިގޭ އަލިފާން: މަރުވި އެންމެންނަކީ ކޮން ބައެއް ކަމެއް ނޭންގޭ

މ. ނިރުފެހި ގޭގެ ގަރާޖުގައި އަލިފާން ރޯވެ ހިނގި ނުރައްކާތެރި އަލިފާނުގެ ހާދިސާގައި މަރުވި އެންމެންނަކީ ކޮން ބައެއްކަން ދެނެގަނެވިފައި ނުވާ ކަމަށް ހޯމް މިނިސްޓަރު އަލީ އިހްސާން މިއަދު ވިދާޅުވެއްޖެ އެވެ. 

ނޮވެންބަރު 9، 2022 ވަނަ ދުވަހުގެ ރޭ މެންދަމު 12:30 ގައި ހިނގި އަލިފާނުގެ ހާދިސާގައި 10 މީހަކު މަރުވި އެވެ. އެ މީހުންގެ ހަށިގަނޑުތައް އިމާރާތުގެ ތެރެއިން ފެނުނުއިރު ވަރަށް ބޮޑަށް ވަނީ އަނދާފަ އެވެ. އެހެން ކަމުން އެއީ ކޮން ބައެއްކަން ދެނެގަންނަން އެހައި ފަސޭހައެއް ނުވި އެވެ. އަދި އެއީ ބިދޭސީން ކަމުން އެ މީހުންގެ މައުލޫމާތު ހޯދަން އިތުރު ހުރަސްތަކާ ވެސް ކުރިމަތިލާން ޖެހުނެވެ.

ނަމަވެސް ފަހުން ފުލުހުން ވަނީ އެ އެންމެންނަކީ ކޮން ބައެއްކަން ދެނެގަނެވިފައިވާ ކަމަށް ބުނެފަ އެވެ. އަދި އެންމެންގެ ހަށިގަނޑުތައް ގައުމަށް ފޮނުވި އެވެ.

ނަމަވެސް މިއަދު އޮތް ނޫސްވެރީންގެ ބައްދަލްވުމުގައި މިނިސްޓަރު އިހްސާން ވިދާޅުވީ އަލިފާނުގެ ހާދިސާ ގައި މަރުވި ބައެއް މީހުންނަކީ ކޮން ބައެއްކަން ޔަގީން ނުކުރެވޭ ކަމަށެވެ.

"އަދިއަދަށް ދާންދެން ވެސް އޭގެ ތެރެއިން ބައެއް މީހުންނަކީ އައިޑީ ނުކުރެވޭ މީހުން،" އިހްސާން ވިދާޅުވި އެވެ.

މިނިސްޓަރު މި މޭރުމުން ވާހަކަ ދެއްކެވީ ބިދޭސީންގެ މައްސަލައާމެދު ކަންބޮޑުވުންފާޅު ކުރައްވަމުންނެވެ. މިއަދުގެ ނޫސްވެރީންގެ ބައްދަލްވުމަކީ ރާއްޖޭގައި ތިބޭ ބިދޭސީން ދިރިއުޅޭނެ އެކޮމޮޑޭޝަން ބްލޮކުތަކެއް ގިނަ ހިދުމަތްތައް ލިބޭނެހެން ގާއިމުކުރުމަށް މެލޭޝިޔާ ކުންފުންޏަކުން ހުށަހަޅާފައިވާތީ އެކަމުގެ ތަފްސީލު ދޭން ބޭއްވި ބައްދަލްވުމެކެވެ. މިއަދު އެ ބައްދަލްވުން ބޭއްވީ އެކަމާ ގުޅޭ ސައްހަ ނޫން ބައެއް މައުލޫމާތުތައް ހާމަކުރަމުންދާތީ އެވެ.

ނިރުފެހިގޭ އަލިފާނުގެ ހާދިސާގައި މަރުވީ އިންޑިއާ ފަސް ފިރިހެނުންނާއި އިންޑިއާ ތިން އަންހެނުންނާއި ބަންގްލަދޭޝް ފިރިހެނަކާއި ބަންގްލަދޭޝް އަންހެނެކެވެ. މިއީ މިހާތަނަށް ހިނގި އަލިފާނުގެ އެންމެ ނުރައްކާތެރި / އެންމެ ގިނަ ބަޔަކު މަރުވި ހާދިސާ އެވެ.