"ދަނޑުވެރި މަންފާ" ގްރާންޓަށް އެދުން މެދުކަނޑާލައިފި

ދަނޑުވެރިންނަށް މާލީ އެހީތެރިކަން ފޯރުކޮށްދޭން ފެށި، "ދަނޑުވެރި މަންފާ" ގްރާންޓްގެ ފޯމު ބަލައިގަތުން ވަގުތީ ގޮތުން ހުއްޓާލައިފި އެވެ.

އެގްރިކަލްޗާ މިނިސްޓަރީން ހއ. ހދ. އަދި ށ. އަތޮޅުގެ ރަށްތަކަށް ހުޅުވާލި ފުރުސަތުގައި ގިނަ އަދަދެއްގެ ބަޔަކު މި ގްރާންޓަށް އެދިފައިވެ އެވެ. މިނިސްޓްރީން ބުނީ މިހާތަނަށް ލިބިފައިވާ އެޕްލިކޭޝަންތަކަށް ބަލާއިރު ކަނޑައަޅާފައިވާ އަދަދު ހަމަވެފައިވާ ކަމަށެވެ. އެހެންކަމުން އެޕްލިކޭޝަން ބަލައިގަތުން މެދުކަނޑާލާފައިވާކަމަށެވެ. އަދި ބުނީ މިހާރު ލިބިފައިވާ އެޕްލިކޭޝަންތައް އިވެލުއޭޓްކޮށް ނިންމުމަށްފަހު ފައިސާ ހުރި މިންވަރަކުން އިތުރު ފުރުސަތު ދޭނެ ކަމަށެވެ. 

މި ގްރާންޓް ޕްރޮގްރާމަކީ އެގްރިކަލްޗަރާއި އިފާޑް ގުޅިގެން ކުރިއަށްގެންދާ ގްރާންޓް ޕްރޮގްރާމެކެވެ. މި ޕްރޮގްރާމްގައި ހިލޭ އެހީގެ ގޮތުގައި ދޭން ކަނޑައަޅާފައިވާ ފައިސާގެ އަދަދަކީ 15.1 މިލިއަން ރުފިޔާ އެވެ. ފައިސާގެ އެހީތެރިކަން ފޯރުކޮށްދޭނީ ދެ ފިޔަވައްސަކަށް ބަހާލައިގެންނެވެ.