ގާސިމްގެ ޝަކުވާ: ހޯޑެއްދޫ ފެކްޓަރީ ފަށަން ކުރީ ސަރުކާރުން ލޯނު ނުދިން

ހޯޑެއްދޫ މަސް ފެކްޓަރީ އޮޕަރޭޝަނަށް ގެންނަން 100 މިލިއަން ރުފިޔާގެ ލޯނެއް ދޭން ކުރީ ސަރުކާރުގައި އެދުމުން ނުދިން ކަމަށް ބުނެ ހޮރައިޒަން ފިޝަރީޒްގެ ބާނީ ގާސިމް އިބްރާހިމް ވިދާޅުވެއްޖެ އެވެ. 

މަހުގެ އަގަށް ސަރުކާރުން ގެނައި ބަދަލާ ބެހޭ ގޮތުން މާލިއްޔަތު ކޮމެޓީގައި ވާހަކަ ދައްކަވަމުން މުގައްރިރު މާމިގިލީ ދާއިރާގެ މެންބަރު ގާސިމް ވިދާޅުވީ ބޮޑު ކަންނެލި އެކްސްޕޯޓް ކުރާ ފަރާތްތަކަށް މިދިޔަ ސަރުކާރުން ފައިސާ ދިން ކަމަށާ ނަމަވެސް ހޮރައިޒަންގެ މަސް ފެކްޓްރީ އޮޕަރޭޝަނަށް ގެންނަން ލޯނެއް ދޭން އެދުމުން ނުދިން ކަމަށެވެ. 

"އަޅުގަނޑުމެންނަކީ 250 މިލިއަން ޑޮލަރު މަސްވެރިކަމަށް އިންވެސްޓްކޮށްގެން ތިބި ބައެއް. ކޮންމެ ކަމެއްގައި ވެސް އިންސާފެއް އޮންނަންވާނެ. ހަމަހަމަކަމެއް. ކުރީ ސަރުކާރުގައި އަޅުގަނޑުމެން ދެންނެވިން 100 މިލިއަން ރުފިޔާގެ ލޯނެއް ދޭން ހޯޑެއްދޫ ފެކްޓްރީ ފަށަން. އެކަމަކު އެ ނުދެއްވި،" ގާސިމް ވިދާޅުވި އެވެ. 

ހޮރައިޒަން ފިޝަރީޒް އަށް ހޯޑެއްދޫން 13.5 ހެކްޓަރުގެ ބިމެއް ހަވާލުކޮށްފައި ވަނީ 17 އަހަރުގެ މުއްދަތަށެވެ. ނަމަވެސް އެ ފެކްޓްރީގެ އޮޕަރޭޝަން މިހާތަނަށް ހިންގަމުންނެއް ނުދެ އެވެ.