އާޓާމިނަލާއެކު ވީއައިއޭ އަށް އިތުރު 800 މުވައްޒަފުން އިތުރުވާނެ

ވެލާނާ އިންޓަނޭޝަނަލްގައި މިހާރު ހަދަމުން ގެންދާ އާ އިންޓަނޭޝަނަލް ޓާމިނަލް ހުޅުވެންވާއިރަށް މިހާރު ތިބި މުވައްޒަފުންގެ އަދަދަށް 20-15 ޕަސެންޓް އިތުރު ވެގެންދާނެ ކަމަށް އެމްއޭސީއެލްއިން ބުނެފި އެވެ. 

އެމްއޭސީއެލްގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވީއައިއޭ ހިންގާ އެމްއޭސީއެލްގެ ސީއީއޯ އަދި އެމްޑީ އިބްރާހިމް ޝަރީފު މުހައްމަދު ވިދާޅުވީ، މިހާރު ތިބި މުވައްޒަފުންގެ އަދަދު ކަމަށްވާ 4،000 މުވައްޒަފުންނަށް އިތުރު 20-15 ޕަސެންޓުގެ އިތުރުވުމެއް އަންނާނެ ކަމަށެވެ- މިއީ ގާތްގަނޑަކަށް 600-800 ވަޒީފާ އިތުރުވުމެކެވެ. 

"ކުންފުންޏެއް ކުރިއަށްދާއިރު ޓެކްނޮލޮޖީ އަށް އިންވެސްޓް ކުރާ ވަރަކަށް އެފިޝެންސީ ވެސް އަންނާނެ. މިސާލަކަށް ބެގޭޖު ހޭންޑްލް ކުރުމާއެކު ބަދަލުވާނެ. އެހެންވެ މިސާލަކަށް ބެގޭޖު ހޭންޑްލް ކުރަން މިހާރު 10 މުވައްޒަފުން ބޭނުންވާނަމަ އާ ޓާމިނަލްގައި 10 ބޭނުން ނުވެދާނެ. އާ ޓާމިނަލްގައި 5 ނޫނީ 7 ރޭންޖުގައި ހުންނާނީ. މިކަމުގެ ސަބަބުން ރިސޯސް ޔޫޓިލައިޒޭޝަށް ދަށްވާނެ،" ޝަރީފު ވިދާޅުވި އެވެ. 

ސަރުކާރުން ދަނީ މިއަހަރުގެ ފަހު ކުއާޓަރުގައި ވީއައިއޭ އާޓާމިނަލްގެ ބައެއް ހިދުމަތްތަކަށް ހުޅުވާލައި އަންނަ އަހަރުގެ ފުރަތަމަ ކުއާޓަރުގައި ޓާމިނަލް ރަސްމީކޮށް ހުޅުވުމެވެ. 

ބޭރުން ގިނަ ލޯނުތަކެއް ނަގައިގެން ތަރައްގީ ކުރާ ވީއައިއޭއަކީ މިހާރު ރާއްޖޭގައި ހިނގާ އެންމެ ބިޔަ އެއް މަޝްރޫ އެވެ. ވީއައިއޭ ތަރައްގީ ކުރަން ސަރުކާރުން ހިންގާ މަޝްރޫއުގެ އަގު ގާތްގަނޑަކަށް 800 މިލިއަން ޑޮލަރު (12.3 ބިލިއަން ރުފިޔާ) އަށްވުރެ ބޮޑެވެ. މި މަޝްރޫއުގެ ދަށުން ތަރައްގީކުރާ އާ ޕެސެންޖަރު ޓާމިނަލްގެ މަސައްކަތް ކުރަން ހަވާލު ކޮށްފައި ވަނީ ސައޫދީ ބިންލާދިން ގްރޫޕާ އެވެ. 

ނަމަވެސް މިދިޔަ ވެރިކަމުގައި މި ޓާމިނަލްގެ ކުރެހުމަށް ބަދަލު ގެނައުން ނޫންކަމެއް ނުކުރެ އެވެ. މުޅި މަސައްކަތް ވަނީ ލަސްވެގެން ގޮސްފަ އެވެ. މިކަން ހާމަވެގެން ދިޔައީ ވެރިކަން ބަދަލުވުމަށްފަހު ސަރުކާރުން މިކަން ގާތުން ބަލައި އާއްމު ކުރި ބައެއް މައުލޫމާތު ތަކުންނެވެ. އާ ޓާމިނަލް ހުޅުވެންވާއިރަށް ކުރަން ޖެހޭ ގިނަ މަސައްކަތް ކޮށްފައި ނެތް ކަމަށް ރައީސް ޑރ. މުއިއްޒު ވަނީ ވިދާޅުވެފަ އެވެ.

ވީއައިއޭގެ މި މަޝްރޫއުގެ ދަށުން ހެދި ދިގު މިނުގައި 3،400 މީޓަރު އަދި ފުޅާ މިނުގެ ކޯޑް އެފް ރަންވޭ މިހާރު ވަނީ ހިދުމަތަށް ދޫކޮށްލާފަ އެވެ. އެ ރަންވޭގެ އަގު 373 މިލިއަން ޑޮލަރު (5.7 ބިލިއަން ރުފިޔާ) އަށް އަރަ އެވެ. މީގެ އިތުރުން މިހާރު ވީއައިއޭގައި ރައްކާކުރެވޭ ތެލުގެ ތިން ގުނަ އިތުރަށް ތެޔޮ ރައްކާކުރެވޭ ފިއުލް ފާމެއް ވެސް ވަނީ ހަދައި ނިމުމުގެ މަގުމަތީގަ އެވެ. މި ފިއުލްފާމް ނިމުމުން މިހާރު ލޮރީ ގެންގޮސްގެން ބޯޓަށް ތެޔޮ އެޅުން ނިމިގެން ދާނެ އެވެ. މީގެ އިތުރުން މިހާރު ހުޅުވާ އާ ކާގޯ ޓާމިނަލްއާއެކު އިމްޕޯޓަށް / އެކްސްޕޯޓް އިތުރަށް ފަސޭހަ ވެގެން ދާނެ އެވެ.