މާދަމާ ދިވެހި ހައްޖުވެރިން ރާއްޖެއަށް އަންނަން ފަށާނެ
އެ ކޯޕަރޭޝަނުން ބުނި ގޮތުގައި ހައްޖުވެރިން ރާއްޖެއަށް އަންނާނީ ހަތަރު ދުވަހެއްގެ މަތިންނެވެ. ފުރަތަމަ ގުރޫޕު މާދަމާ އަންނާނެ އެވެ.
މި އަހަރު ހައްޖުގެ މަތިވެރި އަޅުކަމަށް ސައުދީ އަރަބިއްޔާއަށް ދިޔަ ދިވެހި ހައްޖުވެރިން މާދަމާ ރާއްޖެއަށް އަންނަން ފަށާނެ އެވެ.
ހައްޖު ކޯޕަރޭޝަނުންވަނީ އެ ކުންފުނީގެ ހަވާލުގައި ދިޔަ ހައްޖުވެރިން ރާއްޖެއަށް އަންނާނެ ތާރީހުތައް ހިއްސާކޮށްފަ އެވެ. މި އަހަރު ސައުދީ ސަރުކާރުން ރާއްޖެއަށް ދިނީ ޖުމްލަ 1،150 ހައްޖު ކޯޓާ އެވެ. މި ހުރިހާ ކޯޓާއެއް ސަރުކާރުން ދިނީ ހައްޖު ކޯޕަރޭޝަނަަށެވެ.
އެ ކޯޕަރޭޝަނުން ބުނި ގޮތުގައި ހައްޖުވެރިން ރާއްޖެއަށް އަންނާނީ ހަތަރު ދުވަހެއްގެ މަތިންނެވެ. ފުރަތަމަ ގުރޫޕު މާދަމާ އަންނާނެ އެވެ. އަދި ބާކީ ގުރޫޕުތައް އެހެން ދުވަސްތަަކުގައި އައިސް ހުރިހާ ހައްޖުވެރިންނަށް ރާއްޖެ އާދެވޭނީ ޖުލައި ހަތަރުވަނަ ދުވަހު އެވެ.
ހައްޖުވެރިން ރާއްޖެއަށް އަންނާނެ ދުވަސްތައް
- 24 ޖޫން
- 28 ޖޫން
- 1 ޖުލައި
- 4 ޖުލައި
މި އަހަރު ހައްޖަށް ދިޔަ 1،150 މީހުންގެ ތެރެއިން 50 މީހުންނަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް ސަރުކާރުގެ ހަރަދުގައި ހައްޖަށް ފޮނުވި ނިކަމެތިންނެވެ.
ސަރުކާރުން މިފަހަރު ފުރުސަތު ދިނީ ފަގީރުންގެ ލިސްޓުގައި ހިމެނޭ މީހުންގެ ތެރެއިން 50 އަހަރުން މަތީ މީހުންނަށެވެ. ހައްޖަށް ފޮނުވާނެ 50 މީހުން އިހުތިޔާރުކުރީ ގުރުއަތު ނަގައިގެންނެވެ.
ދިވެހި ހައްޖާޖީންގެ ތެރެއިން ހައްޖުގެ އެކަކު ނިޔާވި އެވެ. އިސްލާމިކް މިނިސްޓްރީން ބުނި ގޮތުގައި ހައްޖުގެ އަޅުކަން ނިމުނުއިރު ހައްޖާޖީންގެ ހާލު ރަނގަޅެވެ.
މި އަހަރުގެ ހައްޖު މިޝަނުގައި ފޯރުކޮށްދެވުނު ހިދުމަތްތައް ރަނގަޅު ކަމަށާއި، އަދި ރަނގަޅު ކުރަންޖެހޭ ކަމަށް ފާހަގަވެފައި ހުރި ކަންކަން އަންނަ އަހަރު ރަނގަޅު ކުރެވި ހިދުމަތް އިތުރަށް ފުރިހަމަކުރެވޭނެ ކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވި އެވެ.
ކޮމެންޓް
Republic of Maldives